Read Silimo 1 Korintus 11 Bible Online

1 Korintus 11 - Silimo bible

1 Korintus 11

¹An Kristus ebabut wokho taga legi ʼgelaʼge, his en e, an nebabut wokho togu lomup o.

²Wene di paget yu paget an nebam eberogulat, an moʼgulnegisema his moʼgulhentegis aʼge tenagat welegep ai en erlikhenebise legi o.

³Asogo aʼgeat de, wene mesigat yu nak e, henaluk om aʼge oluk epasu legi o. Nis ap nenebe loʼbok, nonue ʼgain Onuk Logo aʼge Kristus edik oruakma re, eragam wolom o. Ye, hwami enebe loʼbok e, onogunlak ʼgain edik oruakma re, eneragam wolom o. At Kristus ai re, aik ʼgain Allah edik oruakma re, eragam welago yo.

⁴Ap enebe loʼbok enaʼgul sum erlaʼgulogo aphwami lok odoktakma en seʼban ogulat, wene moʼgulhontogulat, togwi holuk e, nonue ʼgain Onuk Logo aʼge eʼgerli woru ʼgelaʼge de, togwi o.

⁵Ye, hwami enebe loʼbok e, onosum enaʼgul pam erlaʼguktak erlak welat aphwami lok odoktakma seʼban ogulat, wene moʼgulontogulat, togwi holuk e, onuʼgwarek en onogunlak loʼbok eneʼgerli woru ʼgelaʼgeat togwi o. Asogo togwi ai re, enasu hapsogo ʼbelak en tu ʼgelaʼge de, togwi o.

⁶At hwe mesik en osum aʼgul pam erlaʼgolu ebit holuk e, asu ʼbalu o. Hwami enasu hapsogo ʼbalogulat, horoksogo ʼbalogulat, togwiam eneʼgerli holuk e, onosum enaʼgul pam erlaʼguk tumu re, op o.

⁷Edipmu en e, ap enebe edip e, hwami puk. Hwami edip e, ap ai en e, ap enebe re, Allah erliktogwi aʼge ebe ʼgelaʼge, arogun ʼgelaʼge, oluk e, enaʼgul sum salugumu no yo. Aʼgeat de, hwami re, onogunlak erligonobogwi aʼge enarogun ʼgelaʼge o.

⁹Allah en e, hwami enebaget, ap walhesi puk. Ap enebaget e, hwami walhesi o.

¹⁰Ai en e, is hwami is malaikat Allah en yoʼgo ʼbelagonobou wago aʼge ebano enil welat e, onogunlak loʼbok eniak hwelak welagai u ʼgelaʼge onosum enaʼgul pam erlaʼgulogo wolom o.

¹¹Asogo aʼgeat de, nonue ʼgain Onuk Logo aʼge emin hwedik welat e, hwami re, ap erlak aʼge enemalek nak welat, ap e, hwami erlak aʼge enematek nak welat, wolom mia o.

¹²Edipmu, Allah en e, hwami ap aʼge wokho walhesi ai ʼgelaʼge, ap enebe hwami en dagonobogwi o. Aʼgeat de, di aʼge yu aʼge ʼberlegat, edip Allah nak o.

¹³Narilak norokhwi. Wene yu honuʼgwarek honogola eberip o. Hwami sum enaʼgul pam erlaʼguktak erlak welat, aphwami enebe lok odoktakma en seʼban u no?

¹⁴Ap e, enasu yat oruakma re, eneʼgerli ago aʼgeat de, is hwami re, enaʼgul sebelogo welemagoluk Allah en enasu yat aʼge wogentesimu oruakma re, “Enasu obat o,” oluk aphwami en erligonobogwi ani, oluk e, honuʼgwarek honogola en opogu legep erlak no?

¹⁶Aʼge re, is pema en e, ai paget wene ʼbalu aʼge oruak holuk e, nis emin, Allah eiyagai o di owi yu owi odoktogwi aʼge emin, mu aʼge tu erlakma en e, asogoat togu lege o.

¹⁷An en, wene yu henesaʼgo weriselat e, erlikhonobu puk aʼge mesik oruak o. His henebe odoktugu legep ai, op ago puk. Wiak nak ago yo.

¹⁸His wene naduk naduk moʼgulhentaik epegi re, yuat. Aphwami en e, “Is Allah eiyagai aʼge Allah owi werikmu odoktak poluk, is-is enebe pologwi o,” oluk moʼgulnegisema wene ai nesaʼgo hwelegitik, ado pema demat togwi oluk epegi o.

¹⁹Asogo togu legep ai re, at Allah en, “Is ai an neiyagai o,” oluk epasu aʼge, enagat emagoluk, henebe pulomat o.

²⁰Aʼgeat de, his nonue ʼgain Onuk Logo aʼge ebam eberak welat, aʼbosu nouwogoluk mesikmu odoktak poluk e, honsoʼboru loʼbok, henegeik loʼbok, horloluk, “An naduk naik o,” oluk nil lagaimu re, is pema erlak aʼge nele pamat mo ogulat, is nin pema aʼbosu aʼbigat noluk enede ʼbalagalat, togu legep ai re, nonue ʼgain Onuk Logo aʼge osoʼboru noʼgulat, egeik neʼgak noʼgulat, noʼgu legep puk.

²²His asogo togu legep ai nopaget. Soʼboru noʼgulat, ik noʼgulat, tu re, honowi werik erlak a? Ye, Allah eiyagai aʼge enemin odoktugu legep aʼge honogola en mi-miarak pogulat, eneʼgikmu erlak aʼge eneʼgerli emagoluk togulat, togu legep ai o. An wene no aʼge moʼgulhentaik. Erlikhenebik a? Erlak o. An wene yu paget erlikhenebik erlak o.

²³Wene asogo togulom aʼge paget, nonue ʼgain Onuk Logo aʼge en moʼgulnesimu re, an en his moʼgulhentegis ai o.

²⁴Nonue ʼgain Onuk Logo aʼge Yesus ap enebabut wiak aʼge en woruagoluk, ap mesik hubaʼgo yoʼgo laga ai erlige, at Yesus en e, soʼboru roti aʼge eʼgikmu wesirik e, Allah hau wusogo eʼgik en ʼgusogo poluk e, disogo moʼgulentesi, “Soʼboru yu an nebeat o. An his henebagerat watnobua ai, nebam eberak wolorogup en e, disogoat togu lomup o,” oluk osi wogentesi.

²⁵Asogo wogentesimu arat neʼgesema re, ik eʼbe aʼbosu neʼgak aʼge asogoat eʼgikmu wesirik e, disogo moʼgulentesi, “Nemep enamogo wareik ai pam Allah en wene ʼget aʼge wusogo wokhenebigoluk egei ai, nemep neʼgak aʼge ebe yuat o. Holuk e, disogo noʼgulat e, pobuk an nebam eberak wolorogup en, disogoat noʼgu lomup o.

²⁶Soʼboru roti aʼge disogo noʼgulat, aʼbosu neʼgak aʼge disogoat noʼgulat, togulat e, his en e, “Nonue ʼgain Onuk Logo aʼge asogo werigisa o, oluk wene ai is logon moʼgulonto ʼgelaʼge re, disogoat noʼgu lomup o. Asogo noʼgwi oruakma, hwerli, an weik ai hwerli en de, erlak ema o,” oluk moʼgulentesi.

²⁷Hat mesik en nonue ʼgain Onuk Logo aʼge ebam eberak welat, osoʼboru nasulat, egeik neʼgak nasulat, no puk aʼge welarat de, nagun holuk e, nonue ʼgain Onuk Logo aʼge ebe paget, emep paget, wene hebam pouwa aʼge oruak o.

²⁸Is nin logon en, at Ebe pobirak erlak, soʼboru ai aʼge noʼgulat, aʼbosu ai aʼge noʼgulat, noʼgulat e, onuʼgwarek en wene enebam pagathorlogwi ai en e, his henebe loʼbok e, honuʼgwarek en henebabut ʼbalip o. Asogo ʼbelakpoluk en, soʼboru ai aʼge noʼgulat, anggur eʼgen aʼbosu ai aʼge noʼgulat, tu o.

³⁰Asogo enebabut ʼbelak erlak welat noʼgwi ai en, enebe aʼbigat ou wogulat, enanni erlak agalat, togukhwe re, is pema waragai ai o.

³¹Aʼgeat de, nonuʼgwarek en nenebabut ʼbalogo noʼgwi holuk e, Allah en wene nenebam pouwa erlak o.

³²Asogo aʼgeat de, at Allah en e, “Is ai aphwami oʼborl oʼgwe aʼge enemin laʼbulogo wene enebam poluk wiagabonobo ai wiak o,” oluk, at en nenebabut ʼbalogo en, nenesaʼgo weriso yo.

³³Ai enat, narilak norokhwi. Aʼbosu asogo nouwogoluk holuk e, aphwami his aʼge logon enebe owan wom erlak oruak holuk e, yerentarok wolomup o.

³⁴His henebe odoktak oruakma, wene henebam emano oluk e, his logon soʼboru nele holuk e, honowi pam en noluk en de, wom o. Ye, wene mesik e, an nebe weiktik en de, hegirap paik o.