Read Silimo 1 Korintus 12 Bible Online

1 Korintus 12 - Silimo bible

1 Korintus 12

¹Narilak norokhwi. Allah Arogun en woknentasu wene ai heneperlak wolom ai nebit o.

²His naduk nonue ʼgain Onuk Logo aʼge heneperlak oruakma, ebabut wiak aʼge en dogwi asua iak erlak aʼge ebam de, heʼberik welemagoluk, we, ʼgebane ʼgelaʼgeat wokhonoboluk lasulat e, nelakhenebasu laga ai henalugat o.

³Wene yu henaluksogo moʼgulhentaik. Aphwami Allah Arogun onogola oruakma re, “At Yesus Allah en wiagap pouwak o,” oluk, heman po re, mia o. Ye, Allah Arogun onogola erlak holuk e, “Yesus e, an nue ʼgain Onuk Logo aʼge o,” oluk u miayat o.

⁴Nenebabut loʼbok hun domok woknentasu ai re, Allah Arogun mesigat aʼge enat woknentasu o.

⁵At nonue ʼgain Onuk Logo aʼge iabuk hun domok takpogu lege ai re, at ebe mesigat aʼgeat, iabuk takpogu lege o.

⁶Asogo iabuk takpogulat, neneʼgik hun domok togu lege aʼge ai, ebe ʼberlegat tuagoluk e, nenaik Allah mesigat aʼge enat nenebe loʼbok anni woknentasu o.

⁷Aphwami en e, “Is Allah Arogun onogola oruak,” oluk, enagat pobi nonobuagoluk, at en e, nenebe ʼberlek nenebaget nonogola loʼbok ʼgagaliso yo.

⁸At Allah Arogun e, at mesik wene ʼgagalogo ese lemagoluk wogoso. Ye, at Arogun ai enat, at mesik wene Allah paget di wene yu wene edip ʼbeliʼgogo aluk modok welemagoluk wogosoat o.

⁹Ye, at Arogun ai enat, at mesik ede Allah ebam heʼberik modok welemagoluk muat wogosoat o. Ye, at Arogun mesigat ai enat, at mesik en ou obabenebise lemagoluk anni wogosoat o.

¹⁰Ye, at mesik di aʼge yu aʼge elalinat taga lemagoluk wogeselat, at mesik en Allah iak moʼgulentasu lemagoluk wogeselat, at mesik en eselat e, “At ai Allah Arogun ogola welat tago, eselat, wiak aʼge arogun ogola welat tago yo, eselat,” enagat ʼbenerise lemagoluk wogeselat, at mesik en eniak eperlak aʼge elalinat ese lemagoluk wogeselat, at mesik eniak eneperlak aʼge osoma, at esaʼgo holholuk e, “Ebe disogo de, egei o,” oluk is eniak pam hegitsogo moʼgulentasu lemagoluk wogeselat, enebe loʼbok wogentasu ai o.

¹¹Asogo wogentasu ai re, Allah Arogun mesigat ai enat ede opoluk, di bele yu bele, togu lemagoluk enebe loʼbok meʼgit meʼgit wogentasu ai o.

¹²Nis aphwami nenebe mesigat aʼgeat de, neneʼgik, nonoyuk, logon nenebam aʼbigat oruak. Neneʼgik nonoyuk di aʼge yu aʼge aʼbigat oruak aʼgeat de, laʼbulogo nenebe mesigat ai ʼgelaʼge re, at Kristus ebe asogoat o.

¹³Nis e, nenebe ʼberlegat Yahudi aʼge et, Yunani aʼge et, eneragam aʼge et, enematekma welagai aʼge et, at Kristus ebe mesigat aʼge emin hwedik tuagoluk, at Arogun en ik olomu ʼbelapnenebegei ai o. Ye, ik elaruk mesigat noʼgwi ʼgelaʼge, at Arogun mesigat aʼge nonogola pesi ai o.

¹⁴Nis aphwami nenebe re, neneʼgik mesigat ai nak puk. We, neneʼgik nonoyuk nenebe pam di aʼge yu aʼge aʼbigat nenebam hwedik oruak o.

¹⁵Nonoyuk yu iak oso aʼge wellepma re, at en eselat, “An nebe eneʼgik puk. Mu aʼge ai en e, enebe enebam hwedik welegi erlak o,” oluk umu re, iak asogo ua ano pam, nenebe pam hwedik aʼge ai, momu wolom epegep? Mia o.

¹⁶Nenesaʼgo yu iak oso aʼge wellepma re, at en eselat, “An nebe enil puk. Mu aʼge ai en e, enebe enebam hwedik welegi erlak o,” oluk umu re, iak asogo ua ano pam, nenebe hwedik aʼge ai momu wolom epegep? Miayat o.

¹⁷Nenebe yu re, nenil nak wellepma re, nenesaʼgo noʼgosogo hologullo. Ye, nenesaʼgo nak wellepma re, eʼben noʼgosogo ʼbalogullo.

¹⁸Aʼge re, at Allah ede opoluk enat neneʼgik nonoyuk nenebe di aʼge yu aʼge nenebe nenebam oruak aʼge yema ebaleʼgwe loʼbok hwedik taknenebesimu nenebe mesigat aʼge welege yu i o.

¹⁹Ye, nenebe yu re, neneʼgik ai nak wellepma re, nenebe noʼgosogo wollo.

²⁰Aʼge re, neneʼgik nonoyuk di aʼge yu aʼge nenebam aʼbigat oruak aʼgeat de, nenebe mesigat o.

²¹Ai en e, nenil en e, neneʼgik moʼguleselat e, “An e, hat erlakma re, op welle o,” oluk u mia o. Asogoat e, nenaʼgul en nonoyuk moʼguleselat e, “An e, hat erlakma re, op welle o,” oluk u miayat o.

²²Nenebe mesigat aʼge, neneʼgik nonoyuk di aʼge yu aʼge nenebam welaga ai re, mesik anni erlak aʼge ʼgelaʼge opogu lege aʼgeat de, ai op modogat o. Erlakma re, noʼgosogo togullo. Miayat o.

²³Nis neneʼgik nonoyuk nenebe pam hwedik welago aʼge ai, mesik orogole op holuk e, agauwak hwalogo tu mia o. Aʼgeat de, mesik orogole wiak holuk e, agauwak hwalogo pogulat, mesik neneʼgerli om aʼge ʼgelaʼge oruak holuk e, hisogo poluk agauwak hwalogo ebelogo pasulat, togu lege o. Neneʼgik nonoyuk di aʼge yu aʼge nenebe nenebam hwedik welago aʼge ʼberlegat agaikhe en e, agaikhe edeaptagalat, togu lemagoluk, at Allah en nenebe agauwak hwalogo walnentesi. Walnentasulat, neneʼgik nonoyuk nenebe nenebam hwedik welago aʼge logon ʼberlegat, hwerli waremano oluk, orogole wiak holuk, agauwak hwalogo pasulat, togu lemagoluk, ebale loʼbok hwederik nenebesi ai o.

²⁶Neneʼgik nonoyuk di aʼge yu aʼge nenebe nenebam hwedik welago aʼge, mesik ou en nonouk tiso holuk e, nenebe ebesigat nonouk togu lege o. Ye, neneʼgik nonoyuk di aʼge yu aʼge nenebe nenebam hwedik welago aʼge, mesik aphwami en erliktogwi holuk e, nenebe ebesigat nenagai hogu legeat o.

²⁷His henebe laʼbulogo Kristus ebe ʼgelaʼgeat welat e, henebe loʼbok, at eʼgik oyuk ʼgelaʼge ebam hwederik welegep o.

²⁸At Allah enat e, eiyagai nenebale loʼbok nenebasulat, naduk e, nis at iak moʼgulentil denaga lemagoluk yoʼgo nenebasulat, neneʼberlik e, at iak moʼgulentasu lemagoluk is logon yoʼgo enebasulat, is eneʼberlik e, wene moʼgulentasu lemagoluk is logon yoʼgo enebasulat, is eneʼberlik e, elalin aʼge togu lemagoluk is logon yoʼgo enebasulat, is eneʼberlik e, aphwami logon ou aʼge obabonobogu lemagoluk is logon yoʼgo enebasulat, ye, di aʼge yu aʼge lerontogu lemagoluk is logon yoʼgo enebasulat, onuelak ʼgain edik welemagoluk is logon yoʼgo enebasulat, aphwami o da aʼge ya aʼge eniak eneperlak aʼge pam wene ese lemagoluk is logon yoʼgo enebasulat, nenebe loʼbok asogo yoʼgo nenebesi.

²⁹Nis ʼberlek ai nenebe loʼbok, at iak woluk louwagoluk yoʼgo nenebesi aʼge welege no? Nis ʼberlegat Allah iak moʼgulontogu lege aʼge no? Nis ʼberlegat wene moʼgulontogu lege aʼge no? Nis ʼberlegat elalin aʼge togu lege no?

³⁰Nis ʼberlegat aphwami logon ou obabonobogu lege aʼge no? Nis ʼberlegat aphwami o da ya eniak neneperlak aʼge pam wene elalinat ogu lege aʼge no? Nis ʼberlegat eniak neneperlak aʼge ogwiam neniak pam hegitsogo ogu lege aʼge no? Erlak o.

³¹Ai en, narilak norokhwi. Allah Arogun en nenebabut loʼbok woknentasu ai aʼge, ebe op aʼge wokhontouwagoluk ningsogo togu lomup o.