Read Silimo 1 Korintus 13 Bible Online

1 Korintus 13 - Silimo bible

1 Korintus 13

¹Wene moʼgulhentegis ai obat aʼgeat de, op aʼge on tugulom aʼge mesik moʼgulhentaik ai o. An en aphwami enaʼgul onuk loʼbok logon eniak pam eselat, malaikat Allah en yoʼgo ʼbelagonobou wago aʼge ebano eniak pam eselat, eselarat de, aphwami enebe nedesogo weleik erlak holuk e, an we, sogoluak wei aʼge emin, lok aʼge emin, ik ogola neʼgak erlakma oborlogouk ʼgolok eselat, erledeng eselat, tiso ʼgelaʼge tagalom o.

²Ye, Allah iak opsogo nak moʼgulentasulat, wene aphwami onogola hisogo welago aʼge ai ʼberlegat naluk eselat, di wene yu wene ʼberlegat naluk welat, nede Allah pam modok heʼberik poluk e, dom mesik ebalema en henokho momu ʼbok louwagoluk moʼgulom aʼge elirat welat, eselarat de, aphwami logon enebe nedesogo weleik erlak holuk e, we ʼburlat osolom o.

³Di aʼge yu aʼge an neʼgikmu aʼge ʼberlegat aphwami enaʼge erlak aʼge soʼburentasulat, nebe modok wusogo odouk e nouwagoluk nepenen enat tiselat, tagalarat de, aphwami logon enebe nedesogo weleik erlak holuk e, we, ʼburlat almasogo tagalom o.

⁴Aphwami logon enebe enedesogo welat e, enepe mosogo welagai ai o. Asogo enedesogo welat e, enebabut op, ʼbou togwi erlak welat, onuʼgwarek en logo pogulat, erlikhorlogulat, togwi erlak ai o.

⁵Asogo welat e, eneʼgerli erlak tugulat, di aʼge yu aʼge onuʼgwarek enebaget logo pogulat, onolot het horogat welat, is logon en wiagabonobogwiam e, wene eʼgen dogo poluk welat, togwi erlak o.

⁶Asogo enedesogo welat e, is logon en hegitsogo tu erlakma en wiak ebele tugukhwe onogola enagai ho erlakma en welat, hegitsogo ogwiam nak e, onogola enagai hogwi o.

⁷Enedesogo welat, di wene yu wene enebam agoam e, enepe mosogo welat, enede Allah ebam heʼberik welat, op ema oluk onogola enagai hogulat, enede haʼbuksogo welat, togwi ai o.

⁸Asogo togulomtik e, agauwa mesik erlige re, Allah iak moʼgulontogwi ai aʼge pobuk moʼgulonto aʼge erlak agalat, aphwami eniak eneperlak aʼge elalin ogwi ai aʼge pobuk u aʼge erlak agalat, di wene yu wene enaluk welagai aʼge ai pobuk enaluk om aʼge erlak agalat, tua aʼgeat de, aphwami enebe enedesogo welagai ai aʼge nak e, erlak om aʼge erlakma en modok-modok welema o.

⁹Ai re, o yogodak e, wene ado pema nak nenaluk welat, Allah iak ado pema nak moʼgulontogulat, togu lege ai o.

¹⁰Aʼge re, pobuk ebe elemik lau ʼgu agoam, yogodak ado pema akhit nak oruak aʼge ai erlak ema o.

¹¹An nebe malik wei aʼge pam e, niak malik wei aʼge eniaksogo eselat, nede malik wei aʼge enede ʼgelaʼge welat, nede malik wei aʼge en enede eberogwi ʼgelaʼge eberiselat, taga legi aʼgeat de, yogodak nebe narlue egirik e, nebabut malik wei aʼge enebabut ʼgelaʼge ano arat ukpegi o.

¹²Yogodak ya re, is enapunak il orlomongtak aʼge enil yethogwi ʼgelaʼge, arogun aʼge nak yethogu lege o. Aʼgeat de, pobuk ebeat pobisogo yethul o. Yogodak e, wene ado pema nak nenaluk welege o. Aʼgeat de, pobuk at Allah en an nebe pobisogo aluk ai ʼgelaʼge, an en at Ebe pobisogo naluk eik o.

¹³Modok-modok welema re, nenede Allah pam heʼberik welege ai emin, op ema oluk nonogola nenagai hogu lege ai emin, aphwami enebe nenedesogo welege ai emin, wene ebe henagan eriayat welema o. Aʼgeat de, ebe logo ʼgelaʼge re, aphwami enebe nenedesogo wolom aiat o.