Read Silimo 1 Korintus 14 Bible Online

1 Korintus 14 - Silimo bible

1 Korintus 14

¹Henebabut e, aphwami enebe enede welagai ai aʼge henannisogo moʼgulogu lomup o. Moʼgulogulat e, Allah Arogun en enebabut loʼbok wogentasu wene ai eiye orogup en, honogola aganhansogo togu lomup o. Togulat, Allah iak ʼbaksogo moʼgulontogwi ai aʼge wokhontouwagoluk, logo pomup o.

²Sa en eniak eneperlakhwe elalinat oso ai, Allah Arogun ogola welat wene hisogoma aʼge oso ai en e, aphwami moʼgulentasu erlak aʼgeat de, at Allah ebam moʼgulosokhweat de, aphwami logon en pobi togwi erlak o.

³Asogo aʼgeat de, at sa en Allah iak aphwamiat ʼbaksogo moʼgulentasuam e, enede ago weriselat, enesaʼgo weriselat, enede sebeliselat, tiso ai o.

⁴Aʼge re, at eniak eneperlak aʼge elalin oso aʼge ai, ai uʼgwarek en ede ago weriso yo. Aʼgeat de, at mesik Allah iak aphwami ʼbaksogo moʼgulentasu aʼge ai nak e, Allah eiyagai odoktogwi aʼge ʼberlegat enede ago weragenebasu o.

⁵Aphwami eniak eneperlak aʼge elalin ogwi ai weiyat mia ʼgelaʼge aʼgeat de, Allah iak aphwami ʼbaksogo moʼgulontogwi ai nak e, logo ʼgelaʼge o. Ai en e, his henebe ʼberlegat aphwami eniak heneperlak aʼge elalinsogo umu re, an nagai aʼgeat de, ebe op modok e, his en Allah iak ʼbaksogo moʼgulontogulom aiyat nagai o. Aʼge re, eniak heneperlak aʼge elalin ogup holuk e, pobuk Allah eiyagai logon enede ago weragonobouwogoluk e, his heniak pam hegitsogo umu nak e, op o.

⁶Narilak norokhwi. An pobuk e, eniak neneperlak aʼge elalin aʼge moʼgulhentau weik holuk e, ai pam en obaphonobu no? Wene Allah ogola aʼge ʼbaksogo u erlakma en, wene naluk aʼge moʼgulhonto erlakma enat, Allah iak moʼgulhonto erlakma enat, wene seʼgeksogo moʼgulhonto erlagat, holuk e, obaphonobu no?

⁷Di ʼbiʼgong yu ʼbiʼgong arogun erlak aʼge iak inghogwiam, iak oso aʼgeat de, iak hun domok oso erlak holuk e, aphwami en e, “I, iak ai aʼge egei yo,” oluk noʼgosogo pobi tu no. Mia o.

⁸Aphwami weim louwogoluk amitmit sup ogwi ʼgelaʼge, ʼbiʼgong mesik iak loksogo oso aʼge ano, iak oʼgut ing-dingsogo oso holuk e, “Yogo, yogodak weim obuogoluk hegi o,” oluk seʼgeksogo pobirak erlakma en sa en hebik-hebeksogo tu no. Mia o.

⁹Ai ʼgelaʼge re, his en eniak heneperlak aʼge elalinat ogulat, henemde pam en wene seʼgeksogo ogwi erlakma re, wene ai noʼgosogo enaluk om no. Mia o. We, eʼgela herleʼgela moʼgulom o.

¹⁰ʼGwiangma di aphwami yu aphwami eniak loʼbok aʼbigat oruak epegi. Aʼge re, eniak ai ʼburlat ogwi puk. Seʼgeksogo ogwiam pobi togwi nak o.

¹¹Asogo aʼgeat de, is eniak oʼgut ʼbelakma an neperlak holuk e, at mesik en osoma, an en nesaʼgo noʼgosogo holu. Ye, an niak osoam, niak oʼgut ʼbelakma re, at en niak noʼgosogo esaʼgo holu. Mia o.

¹²Holuk e, at Allah Arogun en enebabut loʼbok wogentasu aʼge ai wokhontouwagoluk henede aganhansogo togu legep aʼgeat de, Allah eiyagai enede ago waronto aʼge holuk loksogo wokhontouwagoluk, aiyat logo pomup o.

¹³Is logon eniak an neperlak aʼge pam elalinat seʼban ogulat e, nedemu en ese legi aʼgeat de, ebe pobi taga legi modok erlak ai en e, at mesik en is mesik eniak eperlak aʼge pam elalin oso aʼge ai en eselat e, “Naik Allah. Eniak eneperlak aʼge ai an nuʼgwarek niak pam hegitsogo moʼgulentasu leik en e, hat Harogun en enebabut wogentasu ano aʼge mesik woknemak o,” oluk seʼban ese lemak o.

¹⁴

¹⁵Holuk e, an noʼgosogo tik. Disogo tik. Seʼban ai re, Allah Arogun en moʼgulnosokhwe eniak neperlak aʼge pam elalinat eselat, nonuʼgwarek neniak pam nede pobirak poluk en eselat, tik o. Ye, weni ai re, Allah Arogun en moʼgulnosokhwe eniak neperlak aʼge pam elalinat weriselat, nonuʼgwarek neniak pam nede pobirak poluk en weriselat, tigat o.

¹⁶Ai ʼgelaʼge re, hat mesik Allah Arogun en moʼgulhosokhwe eniak heperlak aʼge elalinat eselat, “Naik Allah o,” oluk hau worogun holuk e, at mesik eperlak aʼge en pobirak erlak welat, “Wene egei ai demat emak o,” oluk u ʼgelaʼge, “Amin,” oluk u no? Wene hat ogun ai re, at eperlak en, asogo u mia ai o.

¹⁷Holuk e, hat en asogo Allah hau opsogo worogun aʼgeat de, at ai ede opsogo ago werak pagun no? Erlak o.

¹⁸Eniak eneperlak aʼge elalinat ogwi ai re, his en e, weiyat ogu legep. An nak e, aʼbigat oso yo, oluk, “Naik Allah o,” oluk hau werise legi o.

¹⁹Aʼge re, an Allah eiyagai enemin odoktak welat wene moʼgulentaigoluk e, eniak neperlak aʼge aʼbik enam elalin aʼge u erlak, we, pobi tu aʼge nak niak weisogoat huabenam nak umu re, op o, oluk moʼgulentasu legi.

²⁰Narilak norokhwi. Wene honogola eberogu legep ai re, malik wei aʼge en onogola eberogwi ʼgelaʼge eberogu lorogup o. We, malik pou ʼget dogo aʼge en wiak togwi eneperlak welagai ai ʼgelaʼge welat, henede enarlue aʼge enede ʼgelaʼge hurlesogoat welemis o.

²¹At nenaik Allah ʼgain Onuk Logo aʼge en nenesaʼgo weregei wene ano pam wene mesik disogo egeimu pelal wogo oruak, “An en aphwami yema, wene is logon eniak oʼgut mennak aʼge eniak pam moʼgulentasulat, is logon ap ʼbok aʼge enemde pam moʼgulentasulat, tik o. Asogo moʼgulentaik aʼgeat de, enesaʼgo holua erlak nak o,” [12] oluk egeimu pelal wokho pegesa.

²²Wene Allah Arogun en moʼgulentasuam eniak eneperlak aʼge pam elalin ogwi ai re, aphwami enede Allah pam heʼberik pogwi aʼge ai pobi tuagoluk ogwi puk. We, is logon enede Allah pam heʼberik pogwi erlak aʼge ai en pobi tuagoluk asogo ogwi o. Aʼgeat de, Allah Arogun en wogentasuam, Allah iak ʼbaksogo moʼgulontogwi ai re, enede Allah pam heʼberik pogwi erlak aʼge enebaget puk. We, is enede Allah pam heʼberik pogwi aʼge en pobi tuagoluk moʼgulontogwi o.

²³His Allah eiyagai mesikmu odoktak welat, henebe ʼberlek en eniak heneperlak aʼge pam elalinat ogumu, is wene eneperlak aʼge emin, enede Allah pam heʼberik pogwi erlak aʼge emin, heneʼbek ʼgumarik, is en e, “Yema re, enede ʼbalagama ogwi o,” oluk moʼgulhontouwa erlak no? Moʼgulhontouwayat o.

²⁴Asogo aʼgeat de, his henebe ʼberlek en, Allah iak ʼbaksogo ogwiam, at mesik ede Allah pam heʼberik erlak aʼge emin, wene eperlak aʼge emin, heneʼbek ʼgumarik, at en e, disogo u o, “Eige. An wiak tegismu wene nebam oruak hegi o,” oluk ede epasuam e,

²⁵at ogola hisogo aʼge ʼbagua o. ʼBagosoam e, ede sebelak poluk at ebe ʼgonurak welat Allah erliktogulat, disogo ua, “Demat Allah emin welegep o,” oluk moʼgulhontouwa.

²⁶Holuk e, narilak norokhwi. Noʼgosogo togulom. Disogo togulom o. His henebe odoktak poluk e, at mesik en weni Allah paget edip lebiselat, at mesik en e, wene seʼgeksogo moʼgulhentasulat, at mesik en Allah ogola wene hisogo aʼge moʼgulhentasulat, at mesik en wene eniak heneperlak aʼge pam elalinat osokhwe, at mesik en his heniak pam hegitsogo moʼgulhentasulat, togulat e, Allah eiyagai enede ago wusogo di wene yu wene eba ʼberlek elirat asogo ogulom o.

²⁷Is pema en, eniak eneperlak aʼge pam elalinat uogoluk holuk e, enebe ʼbiren de a? Henagan de a, umu re, op. Ugan e, erlak. Aʼge re, pobuk naduk ogwiam e, at mesik en his heniak pam hegitsogo moʼgulhontogulom e, op o.

²⁸Aʼgeat de, at mesik his heniak pam hegitsogo moʼgulhonto aʼge ebe erlak holuk e, is eniak eneperlak aʼge elalin ogwi aʼge ai, Allah eiyagai odoktak oruakma eba eniak erlagat wolom. Eniak erlagat welat e, Allah at moʼgulogu lemak o.

²⁹Ye, Allah iak moʼgulontogwi aʼge ai enebe ʼbiren en de a? Henagan en de a, moʼgulhonto yo. Asogo moʼgulhontogukhwe re, his logon en, wene hegit oso ogulat, wiak oso ogulat, ebabut ʼbalogulom o.

³⁰Asogo aʼgeat de, Allah en at mesik hweriogo welago aʼge wene ede ʼgagaliso holuk e, moʼgulhontouwagoluk e, at naduk moʼgulhentasu laga aʼge ano re, iak erlagat mo u o.

³¹Ai ʼgelaʼge re, henebe ʼberlek en wene moʼgulogo henaluk agalat, henede ʼgagal agalat, tuogoluk e, henebe ʼberlegat mesik mesik pobuk naduk Allah iak ʼbaksogo moʼgulontogulom o.

³²At Allah re, yogun hesabele tiso aʼge puk. At e, we, hegitsogo nak tiso ai en e, is ap Allah iak moʼgulontogwi aʼge ai, wene moʼgulontogu lemagoluk at Arogun en enebabut wogentasu aʼge ai eiye otluk welat, onuʼgwarek enat, “An disogo moʼgulentaik, asogo moʼgulentaik,” oluk ogulom o. Wene Allah en nenesaʼgo weregei wene ano pam pelal wokho pasulat e, “Hwami re, eniak erlaksogoat eneragam wolom o,” oluk egei ai en e, Allah eiyagai o di owi yu owi odoktoluk welagai ʼgelaʼge, his henebe odoktak welat e, hwami eniak erlagat wolom o. Eniak sagalogumu no yo.

³³

³⁴

³⁵Aʼge re, is hwami en wene mesik moʼguluogoluk holuk e, Allah eiyagai odoktak oruakma, eniak sagalu mia ai en e, onowi pam loluk onuʼgwarek onogunlak enebam hin wo yo.

³⁶Allah iak o di owi yu owi lasu ai re, edip his no? Ye, at e, his nak henebaget moʼgulhentau wegesa no a?

³⁷At mesik en e, “An en Allah iak moʼgulhontouwagoluk, Allah Arogun en nebabut ai woknesimu o,” eselat, ye, at e, “Mu aʼge tuagoluk woknesimu o,” eselat, oso holuk e, at en e, “Wene Paulus en egei ai re, nonue ʼgain Onuk Logo aʼge en nenesaʼgo weregei aʼge, pelal wokho neneʼbek perakpou waga ai o,” oluk at pobirak poluk wouwak o.

³⁸Aʼgeat de, wene ai wo erlakma en ukpasu holuk e, his en ap ai ebe wo erlakma en ukpogu lomup o.

³⁹Yogo. Narilak norokhwi. Allah iak ʼbaksogo moʼgulontogu lomogoluk logo poluk henannisogo togu lomup o. Aʼge re, is logon en eniak eneperlak aʼge elalinat uogoluk ogwi holuk e, wene ʼbalogup no yo.

⁴⁰Aʼge re, di wene yu wene hegitsogo ogulat, seʼgeksogo ogulat, togu lomup o.