Read Silimo 1 Korintus 15 Bible Online

1 Korintus 15 - Silimo bible

1 Korintus 15

¹Narilak norokhwi. Yogodak e, an en wene mesik honogola eberak henebaik. An en wene op wene moʼgulhentau wegimu, wegeptik e, henede op wene ai pam hurle egeptik welegep ai o.

²Op wene moʼgulhentau wegi wene aiat heneʼgik ʼbetesogo tenak wolorogup holuk e, ai pamat delhenebiso yo. Asogo aʼgeat de, his we ʼburlat almasogo henede Allah pam heʼberik poluk wolorogup holuk e, mia o.

³Wene naduk an moʼgulnegisema, wegi aʼgeat de, his pobuk moʼgulhentegis ai re, ebe disogo epegi. Nis wiak togu lege aʼge paget, at Kristus neneʼgik oʼgo worua oluk pelal wokho pegesa hegitsogoat ebe werigisa ai o.

⁴Werigisema re, ebe werak owikmu pei legesa. Pei legesema re, agauwa ʼbiren werak welagarik oruakma agauwa henaganak aʼge pam Allah en elalugaptegei. Elalugaptegei ai re, pageat Allah iak pelal wokho pegesa hegitsogoat elalugaptegei ai o.

⁵Elalugaptegeimu re, at Kepas il houwagoluk orogolema inaga. Eʼberlik e, is enebe 12 ebano enil houwagoluk onorogolema inagayat.

⁶Eʼberlik e, is at eʼberlik noʼgu legesa aʼge enebe 500, ye, logon eneminat, mesik erlige enil houwagoluk onorogolema inagayat. Is enil hegesa aʼge ai, enebe pema lok akhit yogodak enelaluk oruak aʼgeat de, logon wei oʼgwe nak e, enebe waregesa.

⁷Arat inotluk pobuk e, Yakobus il houwagoluk orogolemayat inaga. Pobuk e, at en yoʼgo onoboluk peragenebesi aʼge ebano logon enemin enebe ʼberlek en enil houwagoluk onorogolema inagayat o.

⁸Asogo onorogolema inetil waga lagarik, pobuk ebe pobuk e, an malik enede weʼgerlak erlakma dagagai ʼgelaʼge dagagi aʼgeat de, norogolema inagama nil hegi o.

⁹Nis Yesus en yoʼgo nonoboluk peraknenebesi aʼge ononuk oruak aʼgeat de, an nak e, nonuk erlak o. An en Allah eiyagai odoktak aʼge eʼgin-peʼgin tagenebasu legi ai paget an en, “Nebe Yesus en yoʼgo noboluk peraknobou waga aʼge o,” oluk, u re, mia o.

¹⁰Asogo u mia aʼgeat de, at Allah ebabut op en yoʼgo nebesimu disogo egirik welegi o. Yoʼgo nebesi ai we ʼburlat nebesi erlak ai en e, is logon ʼberlegat yabuk weiyat ʼgelaʼge wogukhwe, an nak e, aʼbik ʼgelaʼgeat wasu legi o. Aʼge re, asogo wasu legi ai re, an en wasu legi puk. Allah ebabut op en, neʼbiregat welat wasu o.

¹¹Yabuk ai ebe re, an nemin, is logon enemin, op wene moʼgulentil noʼgu lege aiat o. Wene aiat moʼgulhontogwiam, his en demat oluk wegep ai o.

¹²At Kristus waragoam, pobuk Allah en elalugaptegei, oluk moʼgulhontogu lege aʼgeat de, his logon en e, “Aphwami waragaiam Allah en enelalugabonobua erlak o,” oluk ogu legep ai nopaget.

¹³Aphwami waragaiam Allah en enelalugabenebisellep erlakma re, at Kristus waraga aʼge ai ogo elalugap telip erlagat o.

¹⁴At Kristus waragama Allah en elalugaptelip erlakma re, nis en wene we ʼburlat moʼgulontogullo yo. Ye, his en ogo re, wene demat oluk wegep ai re, we ʼburlat welep o.

¹⁵Nis en wene Allah paget obok ʼbeloʼgogulat e, “At en e, Kristus elalugaptegeimu nenil hege o,” oluk moʼgulontogu lege. Aʼge re, aphwami waragaiam Allah en enelalugabenebisellep erlak wellepma re, at Kristus elalugaptelip erlagat o. Ye, at elalugaptelip erlakma re, is pema en e, “His en ogulat, Allah en asogo tegeimu nenil hege o, oluk ogu legep ai re, henepenen enat heniak eseiyat ogu legep o,” oluk hegitsogoat moʼgulnentelep o.

¹⁶Aphwami waragaiam Allah en enelalugabenebelip erlak wellepma re, at Kristus ebe elalugaptelip erlagat o.

¹⁷At Kristus Allah en elalugaptelip erlakma re, his en, “Wene ai demat o,” oluk wegep ai, we ʼburlat welepma re, his wiak togu legep aʼge ai, wene henebam wellep o.

¹⁸Ai ʼgelaʼge, is logon Kristus emin hwedik welat waregesa aʼge ai re, nal elebat o.

¹⁹Nis en e, “Obapnonobua o,” oluk nenede Kristus ebam heʼberik pegerik nonogola nenagai hogu lege ai o. Aʼge re, yogodak ya nenelaluk welat nak asogo opogu lomultik e, pobuk nenelalugapnenebelip erlak wellepma re, is aphwami ado pema en, “Eige. Nede e,” oluk is logon moʼgulonto erlakma en, nis nak moʼgulnontogullep o.

²⁰Asogo aʼgeat de, at Kristus waragama en, Allah en demat elalugap pesimu oruak o. Asogo elalugap pesimu oruak ai re, soʼboru naduk naduk dorogwi ai ʼgelaʼge, is waregesa aʼge, at Kristus naduk elalugap pesi ai o.

²¹At ap mesik en waragai edip moʼgulegei ai ʼgelaʼge, at ap mesik en enelaluk agai edip moʼgulegei ai o.

²²At Adam emin hwedik welat e, nenebe ʼberlegat waraga lege ai ʼgelaʼge, nis Kristus emin hwedik oruakma re, Allah en nenebe ʼberlegat nenelalugapnonobuayat o.

²³Asogo aʼgeat de, Allah en nenebaleʼgwe loʼbok hegit-hegit nenelalugapnonobua o. Soʼboru naduk naduk dorogwi ai ʼgelaʼge, at Kristus naduk elalugap pesimu no oluk e, at ebe wema ai erlige, nis Kristus osi aʼge nenelalugapnonobua o.

²⁴Nenelalugapnonobuarik e, o ologun pam arat ema o. Ai erlige re, at Kristus en enebe ʼgain welagai aʼge ai emin, eiye welagai aʼge ai emin, enanni welagai aʼge ai emin, modogat erlagap poluk e, di aʼge yu aʼge, at eragam oruak aʼge ʼberlegat nenaik Allah eragam welemagoluk eʼgikmu pouwa o.

²⁵Asogo pouwa ai, at Allah en Kristus eselei aʼge ʼberlegat oyuk en al ʼbesilogo onobouwagoluk eragam onobouma ai owan oruakhwe, at Kristus ebe ʼgain modogat welema o.

²⁶Eselei aʼge ebe pobuk oyuk en al ʼbesilogo erlagap pouwa ai, ebe re, waragai edip aiat o.

²⁷Allah iak pelal disogo wokho oruak, “Di aʼge yu aʼge ʼberlegat at eragam arat onobou waga o,” [13] oluk egesema pelal wogo oruak. “ʼBerlegat eragam onobou waga o,” oluk egesema oruak aʼgeat de, at Allah en onobou wago aʼge uʼgwarek ebe Kristus eragam ʼgwilo erlak, oluk enagat oruak o.

²⁸Di aʼge yu aʼge ʼberlegat Allah en omlogo eragam onobou wagoam e, at ʼGain Allah ematek onuk logo welat di owi yu owi at eragam welemagoluk, at omlogo uʼgwarek en e, “Naik. Hat en di aʼge yu aʼge ʼberlek arat an neragam nebegen ai re, an yogodak hat heragam sebelogo welegi o,” oluk moʼgulema.

²⁹Wene mesik e, is aphwami waregesa aʼge pobuk enelalugabonobua modok erlak wellepma re, is enebaget is ado ik olomu ʼbelabonobogwi ai re, noʼgosogo togwi epegep. Nopaget ik olomu ʼbelabonobogulom.

³⁰Ye, nis ogo re, hup erlige yuk oʼgwe modok noʼgu lege ai, nopaget noʼgulom epegep. Asogo noʼgullo erlagat o.

³¹Narilak norokhwi. Henede nonue ʼgain Onuk Logo aʼge Kristus Yesus ebam heʼberik poluk nemin hwedik welege ai en, an his honomot wasu legi oluk epasulat disogo moʼgulhentaik. An e, nin erlige nan erlige nebe watnobuogoluk togukhwe nepe mosogo welegi o.

³²An o Efesus yema welat, aphwami wam seiye ebabut wiak aʼge emin yeik pogwi ʼgelaʼge nemin yeik pogu lege ai, aphwami ʼgwiangma aʼge paget yeik pogwi ʼgelaʼge yeik pelema re, no aʼge sabuthwerlele epegep. Aphwami waregesa aʼge enelalugabenebelip erlak wellepma re, is pema en egesa ʼgelaʼgeat, disogo olu o, “Nis nenebe o tonoat waromulmu re, yogodak ya we lodu nenelaluk welat, seni nouwogoluk nonogola nenagaisogo welat noʼgu lomok o,” [14] oluk egesa ʼgelaʼgeat olu o.

³³Aphwami en ogulat e, “Is logon enebabut wiak aʼge enemin hwedik togup holuk e, his henebabut op aʼge wiak ema o,” oluk ogwi ai demat oluk, honuʼgwarek en henebe lalogup o.

³⁴Wiak togu legep aʼge ai ukpoluk e, yogodak henebabut heberlemis o. His logon Allah ebe heneperlak welegep ai en, heneʼgerli weriogoluk moʼgulhentegis o.

³⁵Asogo aʼgeat de, hat ap mesik en wene hin wokniasulat e, “Aphwami waregesa aʼge ai Allah en noʼgosogo enelalugabonobua epegen. Enelalugabonoboluk e, enebe noʼgorak aʼge enelalugabonobua,” oluk egen ai re,

³⁶hede erlak enat egen ai o. Di aʼge yu aʼge owi ʼgwiangma pelogo ʼbelabise legen aʼge ai re, aphwami waragai ʼgelaʼge, owi ai agap muk ago erlak holuk e, ebe ʼbaktu mia o.

³⁷Owi ʼgwiangma pelogo ʼbelabise legen ai re, ebe pobuk ʼbaktagalat ema aʼge pelogo ʼbelabise legen puk. We, gandum eʼgen de a? At e, di aʼge yu aʼge eʼgen owi de a, eʼgen nak pelogo ʼbelabise legen o.

³⁸Pelogo ʼbelabisoam e, at Allah ede opoluk enat ebe agauwak hwaliso. Di owi yu owi ebe loʼbok hun domok agauwak hwalisoat o.

³⁹Di aʼge yu aʼge elaluk aʼge ʼberlek e, ebe mesik aʼge puk. We, aphwami nenebe muat, wam ebe muat, sue ebe muat, hiane ebe muat.

⁴⁰Ye, di aʼge yu aʼge ʼbogorl pam aʼge oruagat, ʼgwiangma aʼge oruagat. Aʼge re, ʼbogorl pam aʼge orogole loʼbok op o, oluk ogwi ai muat. Ye, ʼgwiangma aʼge orogole loʼbok op o, oluk ogwi ai muat o.

⁴¹Mo op yeriso ai muat o. Dugwi op yeriso ai muat o. Hwesagal op dialiso ai muat o. Asogo aʼgeat de, hwesagal ai ebe loʼbok hun domogat dialiso yo.

⁴²Ai ʼgelaʼge, Allah en aphwami werak aʼge asogoat enelalugabonobua o. Nenebe werak muk agai aʼge ai, owi ʼgwiangma pelogo ʼbelabogwi ʼgelaʼge, ʼgwiangma sebelnonobolukmu re, pobuk nenebe muk ago erlak aʼge nenelalugapnonobua o.

⁴³Nenebe werak nenanni erlak enebit hogwi aʼge ai, ʼgwiangma sebelnonobolukmu re, pobuk nenebe nenannisogo oruakhwe erliknonobu aʼge nenelalugapnonobua o.

⁴⁴Nenebe waragaiam nenagap ʼgwiang aʼgeat ʼgwiangma sebelnonobogwi o. Aʼge re, pobuk at Allah Arogun en nenebe nenelaluk modok wolomul aʼge nenelalugapnonobua o. Nenagap ʼgwiang aʼge welege yu re, Allah Arogun en nenelalugapnenebisoam nenebeat wolomul o.

⁴⁵Wene asogo oluk, Allah iak pelal wogulat e, “Ap Adam naduk aʼge ai, ebe elaluk aʼge walhesi,” [15] oluk pelal wokho pegesa. Aʼgeat de, ap Adam pobuk aʼge ai, Arogun en enelalugabenebiso aʼge waga.

⁴⁶Allah en, ap naduk nadugat walhesi ai re, at pobuk mu aʼge ai Arogun en nenelalugapnonobua ai aʼge walhesi puk. Nenagap ʼgwiangma aʼge naduk walhesirikmu en, Arogun en nenelalugapnonobua aʼge ai pobuk waga.

⁴⁷Allah en naduk nadugat ap Adam ai ebe ʼgwiang aʼge walhesimu re, ebabut ʼgwiangma aʼgeat o. Aʼgeat de, ap Adam pobuk aʼge ai ʼbogorl pam enat waga.

⁴⁸Is aphwami logon enebe ʼgwiangma egesa aʼge enebe re, at Allah en naduk nadugat Adam ebe ʼgwiang aʼge walhesi aʼge ai ʼgelaʼgeat oruak o. Aʼgeat de, is logon enebe ʼbogorl pam egesa aʼge enebe re, at pobuk ʼbogorl pam en waga aʼge ai ʼgelaʼgeat oruak o.

⁴⁹Nis yogodak, at Allah en Adam ebe ʼgwiang aʼge walhesi aʼge ai nenemin hegitsogo welege ʼgelaʼge, pobuk at ʼbogorl pam aʼge ai nenemin hegirat wolomul o.

⁵⁰Narilak norokhwi. Wene yu moʼgulhentaik. Nenebe nenagap ʼgwiang aʼge waragai aʼge yu emin e, Allah en eragam nonobouema eba eiye omul modok erlak o. Ye, nenebe muk agai aʼge yu emin pobuk nenebe otok modok wolomul aʼge eiye omul modok erlagat o.

⁵¹Aʼgeat de, wene Allah ogola hisogo aʼge yu moʼgulhentaik. Nis nenebe ʼberlegat waromul erlak aʼgeat de, nenebe loʼbok mu aʼgeat taknonobouwa o, oluk demat moʼgulhentegis.

⁵²Mesik erligeat, enil hopnik poluk dek ogwi ʼgelaʼge, ʼbiʼgong iak ologun ʼgoboksogo ʼbagua o. Asogo ʼbagosoam e, aphwami waregesa aʼge enebe muk om erlakma en onotok modok welema aʼge agauwak heliʼgogo enelalugabonoboluk e, nis ʼberlegat nenebe muat taknonobouwa o.

⁵³Nenebe muk aga lege aʼge yu, muk agai erlak aʼge sum ʼbuktogwi ʼgelaʼge ʼbuktogulat, nenebe waraga lege aʼge yu, waragai erlak aʼge ʼbuktogulat, tul o.

⁵⁴Nenebe muk aga lege aʼge yu, muk agai erlak aʼge ʼbuktogulat, ye, waraga lege aʼge yu, waragai erlak aʼge ʼbuktogulat, tul o. Asogo ʼbuktul ai pam, wene disogo oluk pelal wokho pegesa aʼge ai demat ema o, “Di aʼge yu aʼge haumsogo noʼgwi ʼgelaʼge, At Allah anni emarik e, waragai aʼge edip ai, erlagap pouwa o.” [16]

⁵⁵Asogo erlagap poluk, iak esegen wokhasulat, “Waragai aʼge edip yu, hanni ʼge. Hiak en ʼbalenebise legen ano hiak anni ʼge,” [17] oluk egeimu pelal wokho pegesa aʼge ai demat ema o.

⁵⁶Waragai aʼge edip iak en lebilnenebiso ai ebe re, nis wiak togu lege ai pam iak en lebilnenebisoam waraga lege aiat o. Ye, wiak togu lege aʼge anni aga ai ebe re, wene Allah en nenesaʼgo weregei ai pam anni aga o.

⁵⁷Aʼge re, nonue ʼgain Onuk Logo aʼge Yesus Kristus tegei ai pam, Allah en nenanniapnenebasuam nenanni aga lege oluk, nenaik Allah hau worogu lomok o.

⁵⁸Ai enat, narilak norokhwi. Henebe nede. Henede hurlesogoat, haʼbuksogo wolomup. Nonue ʼgain Onuk Logo aʼge emin hwedik welat e, at ebaget di bele yu bele togwiam alemat ema erlak o, oluk, loksogoat togwi modok wolomup o.