Read Silimo 1 Korintus 16 Bible Online

1 Korintus 16 - Silimo bible

1 Korintus 16

¹Yogodak e, his en uang odoksogo henarilak honorokhwi Allah eiyagai logon onobouwogoluk egep ai re, wene is Allah eiyagai o Galatia aʼge moʼgulentegis ai ʼgelaʼgeat tip o.

²An nebe wagoam e, odoktogup no yo. We, ya pamat hari Minggu pam nin hwedik nan hwedik ogulat, henebe loʼbok heneʼgikmu agoam, odoksogo onoboluk e, tenak wolomup o.

³Onoboluk e, ap woluk louwa aʼge his en, “Is elit o,” oluk epagup aʼge holuk yoʼgo onobomup o. Asogo yoʼgo onoboluk oruakma, an nebe weiktik e, his en enebegep aʼge ai woluk louwagoluk, suesiʼga ʼbalogo o Yerusalem peragenebaik o.

⁴Aʼge re, an nebe lo ʼgelaʼge ago holuk e, an neminat lul o.

⁵An o Makedonia laiyogoluk nede epegirikmu re, eba laiktik da ʼgwil ya ʼgwil arat laiktik en, his heneʼbek pobuk weik o.

⁶Heneʼbek weiktik e, an his henemin agauwa weiyat weleiktik en de a? O wiak oruakhwe agauwa mesik eminsogo weleiktik en de a, his en o an laik epegimu eba peraknebagup en oluk moʼgulhentegis o.

⁷An asogo o momu laigoluk lasulat e, agauwa mesik erlige nemin wolom e, nebit o. We, nonue ʼgain Onuk Logo aʼge en obat ua holuk e, an agauwa weiyat logon eminsogo henemin wolomul o, oluk nede epasu legi o.

⁸Weik en e, o Efesus yema aphwami, “Wene nenebit o,” oluk wene ʼbalogwi aʼge enebe aʼbigat oruak aʼgeat de, an en is logon moʼgulentasuam wene wo aʼge aʼbigat oruak ai en e, yema weleiktik en Hari Pentakosta arat takpoluk en weik o.

¹⁰At Timotius ano, an en nonue ʼgain Onuk Logo aʼge paget taga legi ʼgelaʼge tago aʼge his heneʼbek wema ai, ebe wago holuk e, his henemin ogorlok erlaksogo welemagoluk, ebe opsogoat womup o.

¹¹At wagoam e, is aphwami pema en, “At ebe mia o,” oluk onogola mi-miarak po modok erlak o. At togolik neʼbek wagalat e, nenarilak nonorokhwi ado pema ebano eminat niaumagoluk yerentarok welegi ai en e, at opsogo lethogu lomup o.

¹²Nenarilak Apolos ano en e, is nenarilak nonorokhwi pema ebano wogonoboluk heneʼbek wemagoluk, pobuk naduk ede ʼgagalise legi aʼgeat de, at yogodak ya wom oluk epasu erlak o. Aʼge re, pobuk wom epasu holuk e, wemayat o.

¹³Henebabut heberlogo welat e, henede Allah pam heʼberik poluk, ningsogoat edik wolomup o. Henebabut ap enede haʼbuktak aʼge enebabut ʼgelaʼge welat e, henannisogoat welemis o.

¹⁴His di aʼge yu aʼge tuogoluk e, aphwami enebe henedesogoat togu lomup o.

¹⁵Narilak norokhwi. Wene mesik yu henede ʼgagalik. At Stefanus eiyagai enemin ebano re, enebe henaluk o. O propinsi Akhaya eba re, is naduk Allah eiyagai egesarik e, is Allah eiyagai logon lerontogu lomogoluk enedemu enat epegesarik en lerontogwi ai o.

¹⁶Is enebabut ʼgelaʼge holuk, is logon is enemin ningsogoat togwi holuk e, ʼberlegat eneragam ʼgoluk eniak hologo wolomup o.

¹⁷Stefanus o, Fortunatus o, Akhaikus o, neʼbek wegesarik, his en an nebaget togulom ʼgelaʼge, is en op togwi ai en, nogola nagai hasu legi o.

¹⁸Is wegesema re, an nogola op aga ʼgelaʼge, his honogola op ema o. Holuk e, is aphwami pema enebabut is ʼgelaʼge holuk e, hau doʼgoksogo waronobogu lomup o.

¹⁹Allah eiyagai o propinsi Asia da ya odoktogwi aʼge yema en his hau wathenebigisa o. Ap Akwila ugwe Priskila eʼbiregat, ye, Allah eiyagai is onowi pam odoktogwi aʼge enemin en, nonue ʼgain Onuk Logo aʼge emin hwedik welat hau aʼbigat wathenebigisa o.

²⁰Ye, nenarilak norokhwi o yema aʼge ʼberlek enat hau wathenebigisayat o. “Nis nenebe ʼberlek Allah eiyagaiat o,” oluk e, his-hisat hau worugulat henemde motok-motok ʼbogu lemis o.

²¹An Paulus nuʼgwarek neʼgik en pelal wokho hau wathenebegis ai o.

²²At mesik en, nonue ʼgain Onuk Logo aʼge ede hwedik erlak holuk e, Allah en at ai ebe hweim pouwak o. Aʼge re, nonue ʼgain Onuk Logo aʼge perlene suk o, u ʼgelaʼge, Maranatha, oluk egi ai o.

²³Nonue ʼgain Onuk Logo aʼge Yesus ebabut op ano en ʼgwelakhentarok modok welemak o.

²⁴Kristus Yesus emin hwedik welat e, henebe ʼberlegat nede oluk hau wathenebegis ai o.