Read Silimo 1 Korintus 2 Bible Online

1 Korintus 2 - Silimo bible

1 Korintus 2

¹Narilak norokhwi. Allah iak ai ogola hisogo oruakma, aphwami ʼgwiangma aʼge en eneperlak aʼge ai, an en selakma ʼbaksogo moʼgulhentau wegi ai re, an en niak opsogo nede ʼgagalak en, moʼgulhentau wegi erlak.

²An his henemin welat e, nogola en wene we aʼge eberu erlakma en, we, at Yesus Kristus paget eberiselat, logo re, at ebe e pam edikpoluk werigisa wene aiat eberik o, oluk nede epegi.

³Nede asogo eberegistik eberiselat e, an nuʼgwarek nebe mabenatma nogorlok en nuak erlik-erligat heneʼbek wegirik welegi ai o.

⁴Asogo welat e, aphwami onowene an nede ʼgagalak en, niak op en, ningsogo moʼgulhentegis erlak o. We, at Allah Arogun anni pam, moʼgulhentegismu, demat agama re, henil hegep ai o.

⁵Asogo moʼgulhentegis ai re, his henede aphwami enede ʼgagalak aʼge ai enebam eberak poluk wolom erlakma en, we, Allah anni oruak oluk, at ebam eberak poluk henede at ebam heʼberik pouwagoluk moʼgulhentegis ai o.

⁶Is aphwami enede hurle aʼge holugat, wene hurle aʼge ai enede ʼgagalogo moʼgulontogu lege o. Asogo moʼgulontogu lege ai re, is aphwami ʼgwiangma aʼge yema, onowene aʼge puk. Erlak o. Onuelak ʼgain enebe pobuk erlak ema aʼge o yogodak oruak aʼge yema, onowene ʼgagalak wene erlagat o.

⁷Wene ai Allah ede ʼgagalak wene hisogo welaga aʼge selakma ʼbaksogo moʼgulontogu lege o. Wene ai aphwami ʼgwiangma aʼge eneperlak aʼgeat de, naduk Allah en di aʼge yu aʼge walho erlakma en welat e, at enat nis obapnenebisoam nonogola nenagai houwagoluk ede epesi aʼge hisakhoat sebelak welaga.

⁸Aphwami ʼgwiangma aʼge onuelak ʼgaindek o yogodak oruak aʼge yema, wene ai enaluk om erlakma en modok eneperlagat oruak o. Enaluk wellepma re, nonue ʼgain Onuk Logo aʼge erliktogwi aʼge ano, ebe e pam edikpoluk wetlip erlagat o.

⁹Wene ai paget e, Allah iak disogo pelal wogo oruak, “At Allah en e, di aʼge yu aʼge aphwami en enil hogwi erlak. Enesaʼgo hologwi erlak. Enede en ʼgagalhogwi erlak. Aʼge re, ʼberlegat nis aphwami at ebe nenede welege aʼge nenebesimu oruak o,” [3] oluk pelal wokho pegesema oruak.

¹⁰Nenebesi aʼge ai, at Allah Arogun en di aʼge yu aʼge ʼbeneriso ai en, Allah ede hisogo welago aʼge ai eminat ʼbeneriselat, selakmayat ʼbaksogo moʼgulnentesi o.

¹¹Nis aphwami nonogola re, sa aluk. Nonuʼgwarek nonogola loʼbok nenaluk welege ani o. Ai ʼgelaʼgeat, Allah ogola re, is logon eneperlak nak. We, uʼgwarek Arogun emategat aluk welago yo.

¹²Nis en e, aphwami ʼgwiangma aʼge yema enarogun wege puk o. We, at Allah ebabut op en woknentesi aʼge nenaluk emagoluk e, at Arogun ʼbelakpou wagama hwerlege o.

¹³At Arogun hwerlegerik e, Allah ebabut op en woknentasu wene ai, aphwami Allah Arogun onogola oruak aʼge moʼgulontouwogoluk e, aphwami enede ʼgagalak aʼge en moʼgulnontogwiam moʼgulontogu lege puk. We, Allah Arogun en moʼgulnentasuam moʼgulontogu lege o.

¹⁴Wene Allah Arogun en woknentasu wene ai, is aphwami Allah Arogun onogola oruak aʼge nak pobi togwi ai en, is aphwami enebabut onotogat welat, pobi togwi erlak o. Asogo pobi togwi erlak ai re, is en e, “Wene ai aphwami uo aʼge en ogwi ʼgelaʼge ogwi o,” oluk ogwi ai en, wene ai pobi tu erlakma en oruak o.

¹⁵Asogo aʼgeat de, nis Allah Arogun nonogola oruak aʼge re, di wene yu wene pobi togu lege o. Asogo pobi togwiam e, is pema en e, nis nenebabut pobi nonobogwi erlak o.

¹⁶Wene ai paget, Allah iak pam pelal disogo oluk wokho pegesa, “Nenaik ʼgain Onuk Logo aʼge ede eberiso ai, sa ʼgelaʼge en aluk. At e, sa ʼgelaʼge en esaʼgo woru no,” [4] oluk is ap Allah iak moʼgulontogu legesa aʼge en, pelal wokho pegesa. Asogo aʼgeat de, nis Kristus ede eberiso wene ai tenak welege o.