Read Silimo 1 Korintus 3 Bible Online

1 Korintus 3 - Silimo bible

1 Korintus 3

¹Narilak norokhwi. An en naduk e, wene aphwami Allah Arogun onogola oruak aʼge moʼgulontogwi ʼgelaʼge re, moʼgulhonto erlak o. Asogo moʼgulhonto erlak ai re, his Kristus emin hwedik tigeptigat de, henebabut honotogat welat, malik ʼget dogo aʼge ʼgelaʼge welegep ai en e, aphwami enebabut asogo oruakma moʼgulontogwi ʼgelaʼge moʼgulhentegis ai o.

²An en e, aphwami enarlue aʼge soʼboru erik aʼge wogontogwi ʼgelaʼge, his wene hurle aʼge wo mia ai en e, wene hurle aʼge moʼgulhonto erlak o. We, malik ʼget dogo aʼge agamu wogontogwi ʼgelaʼge, wene selakma aʼge nak moʼgulhentegis ai o. Aʼge re, yogodak e, asogoat wene hurle aʼge moʼgulhonto aʼgeat de, miayat welegep ai o.

³His-hisat ʼbou togulat, wene ʼbalogulat, togu legep holuk e, henebabut e, aphwami enebaburat welegep o. Aphwami enebabut onotogat welat togwi ʼgelaʼge togu legep ai en moʼgulhentegis o.

⁴Asogo togulat, his pema en e, “Nis Paulus akhit aʼge,” ogulat, ye, his nin pema en e, “Nis Apolos akhit aʼge,” ogulat, ogu legep holuk e, henebabut e, aphwami enebaburat welegep o.

⁵At Apolos ai sa no. Ye, an Paulus sa no. Nis ai nonue ʼgain Onuk Logo aʼge enat ede opoluk neniabuk loʼbok togu lemagoluk yoʼgo nenebesimu re, at eragam aʼge welege o. Asogo welat, wene moʼgulhentigema re, henede Yesus ebam heʼberik pegep ai o.

⁶Wene ai, soʼboru owi yorogwi ʼgelaʼge, an en yeregis o. Ye, at Apolos en e, ik herlelil laga o. Ye, ebe re, at Allah enat logap pesi o.

⁷Ebe logo onuk oruak e, owi yeriso aʼge ai puk. Ik herleliso aʼge ai pugat o. We, logo onuk oruak e, Allah en ebe logap pasu aiat onuk logo oruak o.

⁸An owi yeriso aʼge ai emin, at ik herleliso aʼge ai emin, nemin hegit aʼgeat de, neneʼgik oʼgo re, nenebe loʼbok yabuk togu lomul aʼge hegitsogoat woknontouwa o.

⁹His henebe ai Allah iabuk ʼgelaʼge oruakma re, nis neʼbirek en Allah paget wokho pogu lege o. Mesik e, henebe Allah owi ʼgelaʼge oruakma re, nis neʼbirek en e, Allah owi wusogo honobogu legeat o.

¹⁰At Allah ebabut op en yoʼgo nebesimu re, o ai waʼgi re, an o nede weʼgerlak aʼge en weregismu re, is muon en ebam louksogo worogwi ai o. Aʼge re, aphwami enebe loʼbok, o waʼgi ai pam louksogo woruogoluk holuk e, pobirak poluk en enede weʼgerlogo woru o.

¹¹At Allah en e, “O waʼgi ai re, Yesus Kristus ebeat welemak o,” oluk dalegei ai en e, at ap mesik en e, o waʼgi mu aʼge dalu modok mia o.

¹²O waʼgi ai delak oruakma, ebam louksogo re, is pema en oʼgo eʼgin aʼge ʼbalogo, emas aʼge pam worogulat, perak aʼge pam worogulat, helebeʼgen permata aʼge pam worogulat, worogwi o. Asogo worogukhwe re, is pema en e, e aʼge pam worogulat, e eʼgela herleʼgela un aʼge pam worogulat, ʼbuk aʼge pam worogulat, worogwi ai o.

¹³Asogo worogumu, at Kristus pobuk wema ai erlige re, aphwami en o werigisa aʼge loʼbok op a? Wiak a, oluk odouk pam walhasuam, ʼbaksogo enagat agokhwe enil houwa o.

¹⁴Asogo walhasuam e, at mesik en o waʼgi ano pam weregei aʼge odouk nasu erlak welema holuk e, eʼgik oʼgo wogemayat o.

¹⁵Asogo aʼgeat de, at mesik en o weregei aʼge, odouk nasu holuk e, o wi nasumu enebe degelogo enebei lagai ʼgelaʼge, at o weregei aʼge ai ebe nak e, degelogo pei louwa aʼgeat de, oʼgo nalema o.

¹⁶Nis nenebe Allah owi werigat, oluk e, heneperlak no? Allah Arogun nonogola owi wusogo welago, oluk e, heneperlak no?

¹⁷His henebe, at Allah owi werigat welegep ai, at en aʼgeat welegep o. Holuk, his en Allah owi werik ai wiagap poma re, at en his wiagaphonobuayat o.

¹⁸Honuʼgwarek en henebe lalogup no o. Hat ap mesik en e, “An aphwami yema onowene aʼge nede ʼgagalak o,” oluk epasu legen holuk e, hedemu dem wene ai ʼgagaluagoluk e, aphwami onowene ai hede ebis emak o.

¹⁹Aphwami ʼgwiangma aʼge en e, “Nis aphwami nonowene nenede modok ʼgagalak o,” oluk opogwi holuk e, Allah en e, “Enede ebis oruak o,” oluk epasu. Is ap Allah iak pelal wokho pogu legesa aʼge en e, “ʼBaik herle pogwiam ʼgotnoksogo wathasu ʼgelaʼge, is aphwami ʼgwiangma aʼge yema enede ʼgagalak ʼgelaʼge welat lalonobogwi ai pam, ʼgotnok osoam e, Allah en wiagabonobua aʼge oruak o,” [5] oluk pelal wokho pegesa.

²⁰Ye, wene mesik e, yuat, “Is aphwami enede ʼgagalak aʼge en enede eberogwi ai re, we ʼburlat eberogwi o, oluk nenaik ʼgain Onuk Logo aʼge en aluk o,” [6] oluk pelal wokho pegesema oruagat.

²¹Holuk e, an Paulus nebe emin, at Apolos ebe emin, Kepas ebe emin, o ʼgwiangma yema ʼberlegat emin, enelaluk welagai ai emin, waragai ai emin, o yogodak ya welago aʼge emin, pobuk ema aʼge emin, eba ʼberlegat e, his eiye ai en e, his en e, “An nue ai o,” oluk aphwami aʼge paget erlikhwerlagup o.

²³His henebe ai, eiye re, Kristus o. Ye, Kristus ebe eiye re, Allah at o.