Read Silimo 1 Korintus 4 Bible Online

1 Korintus 4 - Silimo bible

1 Korintus 4

¹His en nis nenebaget e, “Is enebe Kristus eragam aʼge, wene Allah ede epasu wene aphwami ʼgwiangma aʼge eneperlak aʼge moʼgulentil noʼgwi aʼge o,” oluk pobirak nonobogu lomup o.

²Is ap ʼgain enaʼge di aʼge yu aʼge is eneragam aʼge eneʼgikmu welemagoluk enebabut ʼbalogo re, enebabut haʼbuktak aʼge holugat onobogwi.

³Aʼge re, an en asogo tagoam e, his en de a? Is logon en de a, ogulat e, “At hegit tago de a? Wiak tago de a,” oluk nemdema woknio re, mia epasu legi o. Ye, an nuʼgwarek en u ogo re, miayat o.

⁴An nuʼgwarek en, “Wiak mesik tu erlakma,” oluk epasu legi ai pam, wene nebam aʼge noʼgorlik erlagat o. We, at nonue ʼgain Onuk Logo aʼge en wene nebam pasulat, noʼgorliselat, tu o.

⁵Ai en e, at en wene aphwami enebam pasulat, noʼgorliselat, tua ai erlige owan lau wom erlak oruakhwe, his en is logon wene enebam pogulat, noʼgorlogulat, tu modok erlak o. We, at nonue ʼgain Onuk Logo aʼge ebe wemarik en de, aphwami en hubaʼgo hisakho togwi aʼge selakma pasulat, Disogo tul, oluk opoluk onogola sebelak oruak aʼge ebano ʼbaksogo pasulat, tuma ai yetharok wolom o. Asogo ʼbaksogo pasuam e, Allah en e, op tigisa aʼge ebebe loʼbok erligonobu aʼgeat erligonobua o.

⁶Narilak norokhwi. An wene moʼgulhentegis ai re, his pema en e, “His honue ai mia aʼge re, nis nonue yu nak e, logo yo,” oluk erlikhwerlagupno oluk moʼgulhentegis o. Asogo erlikhorlo mia oluk e, disogo ogwi epegi, “Wene Allah iak pelal wogo oruakhwe ebam louksogo mesik ogup no yo,” oluk ogwi ano pobi tuagoluk, nis Apolos eʼbirek nenebam elitsogo moʼgulhentegis ai o.

⁷“Is pema eba mia aʼge re, an nak e, logo modok, oluk ogu lomup,” oluk sa en moʼgulhentesimu ogu legep. His henaʼge di aʼge yu aʼge hwerlogu legep ai, Allah enat wokhentasu erlak no? At enat wokhentasu o. Asogo wokhentasuam horlogu legep aʼgeat de, his en walhegep aʼge ʼgelaʼge honuʼgwarek en erlikhorlogu legep ai nopaget.

⁸His di aʼge yu aʼge arat hwerlegep hegi. Arat ʼgain egep hegi. Nis uo ʼgelaʼge oruakhwe, his nak e, ʼgain hononuk logo aʼge arat egep hegi. His asogo ʼgain hononuk logo aʼge elepma re, nis neneminat ʼgain nononuk logo aʼge wollo yo. Aʼgeat de, erlak o.

⁹Nis ai re, aphwami enapseri aʼge aphwami enilem selakma enebe mi-miarak onoboluk eneʼgerli wusogo waronobogwi ai ʼgelaʼge, nis Allah en yoʼgo nonoboluk peraknonobou wagama wege aʼge ai, aphwami emin, malaikat emin, enil pam asogoat taknonobogwi o.

¹⁰Nis e, Kristus paget nenebe uo aʼge ʼgelaʼge oruakhweat de, his nak e, Kristus emin hwedik welat henede ʼgagalak welegep hegi o. Nis maben ʼgelaʼge oruakhwe, his nak e, henannisogo welegep hegi. Nis onogola en mi-miarak nonobogukhweat de, his nak e, erlikhonobogwi hegi o.

¹¹Nis o page eba en yogodak hwerli, soʼboru emin, ik emin, neleat welege ani. Asogo welat, nonosum erlak aʼgeat oruakma ʼgoʼbu watnonobogukhwe, nonowi erlakma, o di owi yu owi denaga lege.

¹²Asogo denagalat, di aʼge yu aʼge horlouwogoluk, yabuk nonuʼgwarek en, nenannisogo wokho horlogu lege. Aphwami en heman nonobogwiam, nis en nenede aganhan enebam pogulat, di obotut yu obotut taknonobogwiam, nenepe mosogo welat,

¹³nonobok wiak ʼbalogwiam, neniak sakhosogo moʼgulontogulat, togu lege. Asogo togukhwe, o page en yogodak hwerli aphwami yema ʼberlek en e, ollong hosogo lebikpogwi ʼgelaʼge, nis asogo taknonobogwiat oruak o.

¹⁴An en pelal wasu legi yu re, his heneʼgerli werigoluk wasu legi puk. We, his henebe an neiyagai demat aʼge ʼgelaʼge nede hwedik welat henesaʼgo werise legi o.

¹⁵His Kristus emin hwedik oruakma re, ap wene moʼgulhontogwi aʼge enebe 10.000 aʼbigat oruak aʼgeat de, henaik e, aʼbik puk. We, eneiyagai dagonobogwi ʼgelaʼge, an enat wene op wene ai moʼgulhentau wegirik Kristus Yesus emin hwedigaphenebegimu welegep ai pam, henaik nemategat egirik welegi o.

¹⁶Ai enat, “An nebabut wemit o,” oluk niak ningsogo henesaʼgo werise legi o.

¹⁷His an nebabut wagup ani oluk, nomlogo Timotius, nuʼgwarek en deregis aʼge ʼgelaʼge ebe nede hwedik aʼge heneʼbek perakpou wegi ai o. At en e, nonue ʼgain Onuk Logo aʼge eʼbirek hwedik welat, at ebaget ebabut haʼbuksogo tago aʼge heneʼbek wemarik e, disogo moʼgulhontouwa o, “At Paulus Kristus emin hwedik welat, is Allah eiyagai o di owi yu owi odoktogwi aʼge at uʼgwarek tago aʼge ebabut wouwagoluk, disogo moʼgulentasu o,” oluk honogola ebesogo moʼgulhentauma o.

¹⁸An his heneʼbek weik erlak oluk e, his logon honuʼgwarek en erlikhwerlegep ai o.

¹⁹Asogo aʼgeat de, nonue ʼgain Onuk Logo aʼge en ede opoluk e, “Obat, lak o,” oluk moʼgulnoso holuk e, an perleneat heneʼbek weik o. Weiktik e, is logon erlikhorlogwi aʼge ai, eniak ua aʼge nesaʼgo hwelik puk. We, enanni oruak a? Erlak a, oluk enebabut ʼbalik o.

²⁰Ai re, “Allah eragam welege o,” oluk, eniak pam ua holuk e, enak ago puk. We, enannisogo togu lema holuk, enagat ago yo.

²¹Aʼge re, an his heneʼbek ʼgoʼbu woluk wom ʼgelaʼge, weiktik e, niak ningsogo moʼgulhentau wom henagai a? At e, niak sakhorak poluk henebe nedesogo moʼgulhentau wom henagai a. His en ʼge ʼgelaʼge henagai epegep.