Read Silimo 1 Korintus 5 Bible Online

1 Korintus 5 - Silimo bible

1 Korintus 5

¹Aphwami en, ap his aʼge mesik hwe wo puk aʼge wesirik oruak oluk obok ogulat moʼgulnegisema nesaʼgo hwelegis o. Is aphwami Allah iak eneperlak aʼge en asogo togwi erlak aʼge, ap ai aik ugwe aʼge wesirik oruak ai o.

²Asogo togukhweat de, his erlikhorlogu legep ai o. His en tu re, henede wiak otluk, ap wiak tiselat oruak ai, lebikpo aʼge henemin laʼbulogo welegep ai o.

³An nebe walegat welegi aʼge re, nede his henemin welege ʼgelaʼge o. Ai en, nebe henemin welat u ʼgelaʼge re, nonue ʼgain Onuk Logo aʼge Yesus onuk ʼbalogo re, at ap wiak tiselat oruak ai wene ebam pegimu oruak o. Holuk e, his mesikmu odoktogwiam, an nede henemin welege ʼgelaʼge ai en, nonue ʼgain Onuk Logo aʼge Yesus anni pam, disogo tip.

⁵Ap ai ede nonue ʼgain Onuk Logo aʼge wema ai erlige wagalat deluagoluk e, yogodak ebe Iblis en wiagaruagoluk, at Iblis at wogomup o.

⁶Aphwami en eniak ebam elitsogo ogulat, “Eʼgen soʼboru roti aʼge poruagoluk ʼgwelabogwi aʼge wei nak ogola ʼgwelebak poma re, roti ebe ʼberlegat periso yo,” oluk ogwi ano heneperlak no? Henaluk welarat erlikhorlogu legep ai op puk. Wiak o.

⁷Aphwami Yahudi aʼge seni Paskah noʼgulat, domba wam wusogo, eʼgen roti poruagoluk ogola ʼgwelabogwi aʼge lebikpoluk, periso erlak aʼge nak noʼgwi ʼgelaʼge tip o. Nonuam domba wam Paskah aʼge woru ʼgelaʼge, Kristus nis nenebaget arat werigisa ai en e, henebe roti ʼget periso erlak aʼge egeptik welegep ʼgelaʼge demat orogup en, eʼgen roti poruagoluk ʼgwelabogwi aʼge naduk aʼge lebikpogwi ʼgelaʼge, wiak togu legep aʼge ai hosogo ukpomup o.

⁸Holuk e, seni Paskah noʼgulat, eʼgen roti poruagoluk ogola ʼgwelabogwi aʼge ogola ʼgwelebak erlak aʼge noʼgwi ʼgelaʼge, nis wiak togulat, ʼbabi tenontogulat, togulom mia o. We, nenede mesigat welat, demat aʼge nak togu lomok o.

⁹An en nadugat wene pelal wokho heneʼbek perakpou wagalat e, disogo moʼgulhentegis ani o, “His e, is aphwami ʼbabi tenontogwi aʼge enemin laʼbuksogo wolorogup o,” oluk moʼgulhentegis ani o.

¹⁰Asogo moʼgulhentegis ai re, is aphwami Allah iak eneperlak welat ʼbabi tenontogwi aʼge emin, enemikmik wiak togwi aʼge emin, lalonobogwi aʼge emin, enede dogwi asua pam heʼberik welat erliktogwi aʼge emin, is ai enebaget moʼgulhentegis erlak o. Is asogo togwi aʼge enemin wolorogup o, oluk elimu re, is aphwami ʼgwiangma aʼge yema modok ugonoboluk libelep o.

¹¹Asogo moʼgulhentegis ai re, wene ebe disogo. At mesik en eselat e, “An henare Allah omlogoat o,” oluk eselarat de, ʼbabi tenentasulat, emikmik wiak tagalat, dogwi asua pam heʼberik poluk erliktagalat, iak orlouk wiak wene yagentasulat, aʼbosu honuk honuk ʼbaluogoluk noʼgwi ano aʼge nasu modok welat, aphwami lalenebiselat, tago aʼge ai ʼgelaʼge enebe enemin laʼbuksogo wolom erlakma en, soʼboru enemin nagup erlagat, oluk moʼgulhentegis ani o.

¹²Is aphwami Allah iak eneperlak aʼge wene an en enebam po no? Erlak o. We, Allah en enebam pouwa aʼge oruak o. Allah iak pelal wokho pogulat, disogo egesa, “At mesik heneʼgerlakma welat wiak tago aʼge ai, lebikpomup o,” [7] oluk egeimu pelal wokho pegesema oruak ai en e, ap mesik his Allah eiyagai enemin odoktugu legep aʼge en wiak tago holuk e, his en wene ebam po erlak no? Poat o.