Read Silimo 1 Korintus 6 Bible Online

1 Korintus 6 - Silimo bible

1 Korintus 6

¹His Allah eiyagai aʼge, his-his nak en, hat mesik en at mesik wene ebam pagun holuk e, Allah eiyagai aʼge en ʼbelingholuk wene ai ebam pogulat, noʼgorlogulat, tuagoluk yoʼgo onobo erlakma re, is aphwami wiak togwi aʼge yoʼgo onobogu legep ai nopaget. Heneʼgerli erlak a?

²Pobuk Allah eiyagai en aphwami ʼgwiangma aʼge yema wene enebam pogulat, noʼgorlogulat, tua ai heneperlak no? Asogo togup holuk, wene weiyat aʼgeat de, his en ʼbelingholuk en de, wene enebam pogulat, noʼgorlogulat, togulom erlak no?

³Nis enat, is malaikat Allah en yoʼgo ʼbelagonobou wago aʼge ebano, wene enebam pogulat, noʼgorlogulat, tul ai heneperlak no? Holuk e, nis ʼgwiangma yema welat, aphwami wene di paget yu paget enebam agoam, nis en ʼbelingholuk wene enebam pogulat, noʼgorlogulat, togulom erlak no? Asogoat togulom o.

⁴Wene asogo aʼge henebam ago holuk e, ʼbelingholuk wene henebam pogulat, noʼgorlogulat, tuagoluk salak yoʼgo onobogu legep. Nis Allah eiyagai en e, “Is ai enebabut wiak o,” oluk ogu lege aʼge ai yoʼgo onobogu legep a?

⁵Heneʼgerli werise legi o. His henarilak honorokhwi enemin, hat mesik en at mesik wene ebam pagun holuk e, ap Allah omlogo ede modok ʼgagalak welat wene ʼbeliʼgogo erlagap po aʼge ap mesik erlak no? Oruagat epasu legi o.

⁶Aʼgeat de, hat ap mesik en e, hare mesik wene ebam poluk e, aphwami enede Allah pam heʼberik pogwi erlak aʼge en ʼbeliʼgogo wene ebam pogulat, noʼgorlogulat, tuagoluk yoʼgo enebasu legen ai o.

⁷His-his nak henarilak honorokhwi enemin aʼgeat de, henemin wene ʼbal-ʼbal modok welegep ai en mabenat aga legep ai o. His e, wiagaphonobogwiam en de, henepe mosogo wolomma re, wiak a? Almerak honobogwi holuk ukpegep ho re, mia ya? Obat o.

⁸His e, henarilak honorokhwi enemin aʼgeat de, wiagabonobogulat, almerak onobogulat, togu legep ai o.

⁹Aphwami wiak togwi aʼge Allah eragam enebasumu eba eiye ema erlak o, oluk e, heneperlak no? Honuʼgwarek en lalogup no yo. ʼBabi tenontogwi aʼge emin, dogwi asua pam heʼberik welat togwi aʼge emin, ap onugwami aʼge ʼbabi tenontogwi aʼge emin, ap en hwami tenontogwi ʼgelaʼge is ap-ap togwi aʼge emin,

¹⁰yogorlia wogwi aʼge emin, enemikmik wiak togwi aʼge emin, aʼbosu honuk honuk ʼbaluogoluk noʼgwi aʼge ano noʼgwi modok welagai aʼge emin, eniak orlouk wiak wene yagontogwi aʼge emin, eneʼgik abusak wogwi aʼge emin, is aphwami asogo togwi aʼge ai ʼberlegat Allah eragam enebasumu eba eiye modok ema erlak o.

¹¹Nadugat his logon asogo togu legep aʼgeat de, yogodak e, Allah en honogola op emesogo henebesirik, henebe at uʼgwarek paget pagathwerlesimu welegep o. Wene henebam welaga aʼge ai, nenaik Allah Arogun en nonue ʼgain Onuk Logo aʼge Yesus Kristus onuk pam, noʼgorlogo wokhesirik Allah emin laʼbolik henebesimu welegep o.

¹²His aʼge mesik en eselat e, “An di aʼge yu aʼge yogunat tiselom nak o,” oluk oso aʼgeat de, an nogola en e, di aʼge yu aʼge ʼberlek ai en obabonobu nak puk. Di aʼge yu aʼge ai anni agalat e, aʼge en an nebe eragam nobo re, nebit o.

¹³Is logon en e, disogo ogwi, “Noʼgwi aʼge ai nonogum paget o. Ye, nonogum ai noʼgwi aʼge paget o,” oluk ogwi. Asogo ogwi aʼgeat de, ʼbirenerat, at Allah en pobuk erlagap pouwa aʼge oruak o. Allah en, nenebe yu re, ʼbabi tenontogu lemagoluk walnentesi puk. At e, nonue ʼgain Onuk Logo aʼge pagerat walnentesi ai o. Nenebe yu eiye re, nonue ʼgain Onuk Logo aʼge oruak o.

¹⁴Allah en e, nonue ʼgain Onuk Logo aʼge waragarikmu en elalugaptegei ʼgelaʼge, at anni pam, nis nenelalugapnonobuayat o.

¹⁵Nis nenebe yu re, Kristus eʼgik oyuk ʼgelaʼge welege o, oluk heneperlak no? Holuk e, nenebe Kristus eʼgik oyuk welege ai aʼge wokho, hwami enebabut danian aʼge ai enemin hwedigaptu no? Modok erlak o.

¹⁶Is ap hwami enebabut danian aʼge ai enemin hwedigap poluk e, enebe mesigarat agai o, oluk e, heneperlak no? Allah en eselat e, “Is enebe ʼbiren aʼgeat de, pobuk mesigat emarik welema o,” [8] oluk egeimu pelal wokho pegesema oruak ai o.

¹⁷Nis nenebe paget asogo togu lege aʼgeat de, nonue ʼgain Onuk Logo aʼge emin hwedigap poluk e, at emin nenede mesigat aga lege ai o.

¹⁸ʼBabi tenontogwi ai aʼge tenontouwano oluk, hweiye ʼbogologu lomup o. Di wiak yu wiak togwi ai re, enebe oʼborl oʼgwe yuat togwi. Aʼgeat de, ʼbabi tenontogwi ai nak e, onuʼgwarek enebeat wiagap pagathorlogwi ai o.

¹⁹His en e, “Allah en, Arogun woknentesimu, nenebe at owi werik welege o,” oluk e, heneperlak no? Henebe honuʼgwarek eiye puk. At eiyeat o.

²⁰At Allah en e, henebe arat oʼgo daksogo ʼbalogo wokhenebegeimu welegep ai en e, aphwami en Allah erliktuagoluk e, henebe at ebaget opsogo togu lomup o.