Read Silimo 1 Korintus 7 Bible Online

1 Korintus 7 - Silimo bible

1 Korintus 7

¹His en wene pelal wogo aʼge neʼbek perakpou wegep aʼge ano, oʼgo moʼgulhentaik o. Ap en e, hwami wogonobu erlakma en dedik weat wolom o.

²Aʼgeat de, ʼbabi tenontogu lemano oluk e, ap onugwami loʼbok wogo welat, hwami onogunlak loʼbok wogo welat, togulom o.

³Onogunlak en e, onugwami loʼbok, ye, onugwami en e, onogunlak loʼbok, enemin nogo ogulom ʼgelaʼgeat nogogu lemak o.

⁴Ye, hwami enebe re, onuʼgwarek eiye puk. Onogunlagat eiye o. Ye, ap enebe asogoat e, onuʼgwarek eiye puk. Onugwamiat eiye o.

⁵Holuk e, ogun ugwe emin nogo ogulom o. Hektak wolorogup o. Seʼban ogu lomogoluk holuk e, disogo ogulom, “Lodu paget weat wolomok o,” oluk wene hemin oluk en, seʼban ogu loroguptik e, pobuk hemin laʼbulogo wolomup o. Henede sebelu mia ai en e, Iblis en henede ʼgagalisomano oluk e, henemin laʼbulogo wolom ai o.

⁶Wene moʼgulhentegis ai re, wene harosogo moʼgulhentegis puk. We, henesaʼgo weregis o.

⁷Aphwami ʼberlegat, an hwami erlak aʼge weat welegi ʼgelaʼge wolomma re, op, oluk epasu legi aʼgeat de, at Allah en e, nenebabut loʼbok, at mesik ebabut muat, at mesik ebabut muat, hun domok han domok woknentesi ai en e, asogo mia o.

⁸His ap logon, honugwami erlak aʼge emin, his hwelani salisik aʼge emin, hwami sugwe aʼge emin, an welegi ʼgelaʼgeat wolomma re, op, oluk moʼgulhentegis ai o.

⁹Henede sebelu mia ago holuk e, honogunlak loʼbok, honugwami loʼbok, wogonobogu lomup o. Henebam aganhan agoam yogunat tenontoma re, wiak o. Honugwami loʼbok, honogunlak loʼbok, wogo wolomma re, op o.

¹⁰Ye, his ap logon, honugwami oruak aʼge emin, his hwami logon honogunlak oruak aʼge emin, an en henesaʼgo werik o. Aʼge re, an en puk. Nonue ʼgain Onuk Logo aʼge en henesaʼgo worua o. His hwami honogunlak ugonoboluk e, wing lagup o.

¹¹Hat hwe mesik hogun ukpoluk loboroguntik holuk e, ap mesik wo erlakma en we wolomup o. Weat wolom mia ago holuk e, hogun naduk aʼge anoat womup o. Ye, his ap ogo re, honugwami ugenebagup o.

¹²His ado pema henebaget e, wene nonue ʼgain Onuk Logo aʼge en u erlak aʼge, an enat moʼgulhentaik o. Hat ap Allah eiyagai aʼge en, hugwe ede Kristus ebam heʼberik pasu erlak aʼge wogo welegen aʼge, at en e, “Nogun neʼbirek hwedik wollo e,” oluk epasu holuk e, op o. Hat en, hugwe ai ukpo modok mia o.

¹³Ye, hat hwe Allah eiyagai aʼge en, hogun ede Kristus ebam heʼberik pasu erlak aʼge wogo welegen aʼge, at ap ai en e, “Nugwe neʼbirek laʼbulogo wollo e,” oluk epasu holuk e, hogun ai ukpoluk libom modok erlak o.

¹⁴At hwe Allah eiyagai aʼge en, ogun ede Kristus ebam heʼberik pasu erlak aʼge, wogo welat eʼbirek op laʼbuksogo welagai ai en e, ugwe en ogun ebe ano Allah eiyagai takpasu o. Ye, ai ʼgelaʼge at ap Allah eiyagai aʼge en, ugwe ede Kristus ebam heʼberik pasu erlak aʼge wogo welat eʼbirek obat laʼbuksogo welagai ai en, ogun en ugwe ebe ano Allah eiyagai takpasu o. Asogo enebe Allah eiyagai takpogwi erlak wellepma re, henemalik enebe Allah en aʼgeat de, oʼborl oʼgwe aʼgeat wellep o.

¹⁵At ap ede Kristus ebam heʼberik pasu erlak aʼge ai ugwe ukpasu holuk e, ukpouwagat o. Ye, at hwe ede Kristus ebam heʼberik erlak aʼge ai ogun ukpoluk libago holuk e, lebemagat o. Allah en e, nenede haʼbuksogo op welemagoluk yoʼgo nenebesi ai en e, asogo togup holuk e, wene henebam erlak o.

¹⁶Hat hwe yu, hogola en e, “Pobuk nogun delu mia ema o,” oluk epasu legen a? Noʼgosogo haluk. Hat ap yu, hogola en e, “Pobuk nugwe delu mia ema o,” oluk epasu legen a? Noʼgosogo haluk.

¹⁷His e, Allah en henebe loʼbok yoʼgo henebasuam nonue ʼgain Onuk Logo en e, “Hat mesik disogo wolomup. Ye, hat agaikhen disogo wolomup o,” oluk moʼgulhentesi hegitsogoat wolomup o. Asogo welemagoluk, an en Allah eiyagai o da ya odoktogwi aʼge ʼberlegat enesaʼgo werise legi o.

¹⁸At ap mesik agap eʼgerlimu aʼge arat ʼbelak oruakma, Allah en yoʼgo pesirikmu en, pobuk agap ʼbelak erlak aʼge ʼgelaʼge eigoluk mesik tu mia o. Ye, at ap mesik e, agap eʼgerlimu aʼge ʼbelak erlak oruakma Allah en yoʼgo pesirikmu en, pobuk agap asogo ʼbalogup erlagat o.

¹⁹Enagap eneʼgerlimu aʼge asogo ʼbelak wolom aʼge emin, ʼbelak erlak wolom aʼge emin, ai logo puk. Erlak o. Ebe logo re, Allah iak hwelak poluk togulom aiat o.

²⁰Aphwami enebe loʼbok Allah en yoʼgo enebasuam welegesa ʼgelaʼgeat welemak o.

²¹Hat mesik, aphwami eneragam aʼge oruakma Allah en yoʼgo hebasu holuk e, “An disogo welegi aʼge o,” oluk, ai paget wenemennei eberogun. Pobuk e, hematekma hobogwi holuk e, “Nebit,” ogun o. “Ai op o,” oluk hematekmayat omup o.

²²At mesik aphwami eneragam aʼge oruakma re, nonue ʼgain Onuk Logo aʼge en yoʼgo hebesimu emin hwedik welat e, at ot ematekmayat agarik oruak o. Ye, at mesik e, ematekma oruakma yoʼgo hebesimu, nonue ʼgain Onuk Logo aʼge eragam aʼgeat agarik oruak o.

²³His henebe Allah en modok daksogo oʼgo ʼbalogo wokhenebegei ai en e, aphwami eneragam aʼge orogup no yo.

²⁴Holuk e, narilak norokhwi. His henebe loʼbok Allah en yoʼgo henebesimu welegep ʼgelaʼgeat, Allah emin hwedik welat asogoat wolomup o.

²⁵Wene hwelani salisik aʼge enebaget e, “Disogo togu lomup o,” oluk nonue ʼgain Onuk Logo aʼge en nenesaʼgo woru erlak aʼgeat de, wene an nede epasu legi aʼge yu moʼgulhentaik. Niak moʼgulhentaik yu re, his honogola en e, “Allah en Paulus ebe ede en wesimu ebabut heʼberik aʼge en moʼgulnesi ai demat o,” oluk henede opomup o.

²⁶Nis o yogodak wiak welege ya pam welat e, nenebe loʼbok welege hegitsogoat wolom o, oluk epasu legi.

²⁷His ap logon honugwami oruak aʼge holuk e, lologo ugonobuogoluk togup o. Ye, his logon honugwami erlak aʼge holuk e, hwami wogonobuogoluk heraonobogup no yo.

²⁸Aʼge re, his ap en honugwami hwerlagup holuk e, ai wiak tigep oluk ogup no yo. Ye, his hwelani salisik aʼge en honogunlak hwerlagup holuk e, ai wiak tigep oluk ogup no yo. Aʼgeat de, wogonobogulat, di eʼgin yu eʼgin hagup ai en e, asogo houwano oluk egi o.

²⁹Narilak norokhwi. Yogodak e, o ologun pam lai legerik welege o. Yogodak ya pam welat e, ap onugwami wogo aʼge ai, wogo erlak aʼge ʼgelaʼge welemak, oluk epegirik en de, moʼgulhentegis o.

³⁰Aphwami logon nge togwi aʼge holuk e, nge togwi erlak aʼge ʼgelaʼge welemak o. Ye, is logon onogola enagai hogwi aʼge holuk e, enagai hogwi erlak aʼge ʼgelaʼge welemak o. Ye, is logon di aʼge yu aʼge oʼgo ʼbalogo horlogwi aʼge ai, eiye agai erlak aʼge ʼgelaʼge welemak o.

³¹Ye, is logon ʼgwiangma di aʼge yu aʼge horlogwi aʼge ai, horlogwi erlak aʼge ʼgelaʼge welemak o. Asogo egi ai re, di aʼge yu aʼge ʼgwiangma welago aʼge ʼberlek arat erlak ago ai en egi o.

³²His e, hwami enebaget, ap enebaget, honogola wenemennei eberak erlak welemagoluk moʼgulhentegis o. Asogo egi ai re, ap onugwami erlak aʼge en e, nonue ʼgain Onuk Logo aʼge ede op emagoluk, at ebaget logo poluk enede eberogwi o.

³³Asogo aʼgeat de, ap onugwami wogo aʼge ai re, onugwami enede op emagoluk, di aʼge yu aʼge ʼgwiangma aʼge logo poluk enede eberogwi o.

³⁴Asogo eberogulat e, enede ʼbiren agai ai o. Hwelani salisik onogunlak erlak aʼge ai re, enebe emin, enede emin, nonue ʼgain Onuk Logo aʼge paget wolomogoluk e, at ebaget logo poluk enede eberogwi ai o. Aʼge re, is hwami onogunlak oruak aʼge ai re, onogunlak enede op emagoluk, is enebaget di aʼge yu aʼge ʼgwiangma aʼge logo poluk enede eberogwi ai o.

³⁵Wene asogo moʼgulhentegis ai re, wam ʼgoʼbi erlilogo pogwi ʼgelaʼge, “Di togup. Yu togup,” oluk wene ʼbalegis puk. We, his op emagoluk moʼgulhentegis o. Holuk, his e, henede we aʼge pam eberu erlakma en, nonue ʼgain Onuk Logo aʼge paget hegitsogo togulat, opsogo togulat, togwi modok welemagoluk egi o.

³⁶Ap mesik en hwele salisik iak tago aʼge welat, ogola en e, “An disogo wiak welegi. Hwele ai ebe waik o,” oluk ebam aganhan ago holuk e, at ogola asogo epasumu re, hwele ebe woat o. Asogo wouwa ai wiak puk. Op o.

³⁷Aʼge re, at mesik, aphwami logon en ede ʼgagalogwiam e, uʼgwarek ede hurle agalat e, ede uʼgwarek en sebelogo re, “Erlak o. An hwele niak taga legi aʼge ai, asogoat we welemak o,” oluk ogola epasu holuk e, ai obat o.

³⁸Ap ano en hwele iak tiso aʼge ano wasu holuk e, ai op aʼgeat de, wo erlakma en mo oso holuk e, ai op modogat o.

³⁹Is hwami re, onogunlak enebe enelaluk oruakhwe, ap mu aʼge mesik wogonobu mia o. We, onogunlak enebe waragai holugat, onogola enagai opogwi aʼgeat wogonobu o. Aʼge re, yogunat wogonobu mia o. We, nonue ʼgain Onuk Logo aʼge emin hwedik aʼge holuk wogonobu o.

⁴⁰Asogo wogonobu aʼgeat de, wogonobu erlakma en weat wolomma re, enede opsogo wolom epasu legi o. Asogo epasu legi ai re, Allah Arogun nogola welat epasu legi o.