Read Silimo 1 Korintus 8 Bible Online

1 Korintus 8 - Silimo bible

1 Korintus 8

¹His en e, “Dogwi asua uam warogwi ai re, wene edip e, disogo oluk nenaluk nak o,” ogu legep ai re, nis pobi tige o. Aʼge re, wene asogo enaluk welat e, onuʼgwarek en erlikhorlogwi aʼgeat de, aphwami enebe enede hwedik welat togwi ai nak e, enede hurleabonobogwi ai o.

²At mesik ogola en epasulat e, “An wene arat naluk o,” oluk epasu aʼgeat de, at dokhumsogo aluk om aʼge re, owan eperlak welarat de, oso yo.

³Asogo aʼgeat de, at mesik en, Allah ebe ede hwedik holuk e, Allah en at ai ebe aluk o.

⁴Dogwi asua uam worogwi ai re, dogwi asua ʼgwiangma aʼge yema ebe erlak aʼgeat, oluk nenaluk o. Nenaik Allah ebe mesigarat. ʼBiren erlak o.

⁵Is aphwami yema en ogulat e, “Nis e, nenaik ebam heʼberik welege aʼge nenasua yuat o,” oluk e, ʼbogorl pam aʼge paget emin, ʼgwiangma aʼge paget emin, ogwi ai o. Asogo ogwi ai, enasua aʼge aʼbigat oruakma re, onuk oruak e, aʼbigat oruak o.

⁶Asogo aʼgeat de, nis nenaik Allah ebe mesigarat o. ʼBiren erlak o. Di aʼge yu aʼge ʼberlegat at en walhesimu re, nenebe at ebagerat welege o. Asogoat, nonue ʼgain Onuk Logo aʼge Yesus Kristus ebe mesigarat o. Di aʼge yu aʼge ʼberlegat Allah en walhesi ai, ebe at Yesus en walhesirik, nenebe at enat delnenebegeimu nenelaluk welege.

⁷Aʼgeat de, wene ai aphwami ʼberlegat enaluk puk. Is logon naduk e, enede dogwi asua pam heʼberik welat erliktogu legesarikmu no oluk e, pobuk wam dogwi asua uam werak aʼge ʼgwerik noʼgulat, ebam eberogwi o. Enede owan welat, noʼgwiam e, onogola wiak ago ai o.

⁸Di aʼge yu aʼge noʼgwi aʼge ai en Allah eʼbek woknonoboluk louwa erlak o. Nis no erlakma en mo ul holuk e, nal omul erlak o. Ye, nul holuk e, agaikhen sabuthorlul erlagat o.

⁹His yogunat no aʼgeat de, noʼgwiam en, is aphwami logon enede owan aʼge wiak emano oluk e, henebabut heberlogo welemis o.

¹⁰Hat mesik en e, wene ai haluk welat o wam dogwi asua uam worogumu ʼgoluk hebe hurotluk nagun holuk e, at agaikhen ede owan aʼge en il hioluk ogola en e, “An mesik naigat o,” oluk ogola ʼgagalua erlak no? ʼGagalotluk nouwayat o.

¹¹Hat en e, “An wene naluk o,” oluk asogo tua ai pam, hare mesik ede owan aʼge paget Kristus waraga aʼgeat de, hat en wiagap pagun ai o.

¹²Henarilak honorokhwi enede owan aʼge enil salogo wiagabonobogulat, enede daintak pogulat, togu legep ai re, Kristus ebeat il salogo togu legep o.

¹³Holuk e, noʼgwi aʼge ai pam en an nare ebe wiagap paikno oluk e, at ebaget e, an wam dogwi asua uam werak aʼge ʼgwerik no erlakma en modok ukpasu leik ani o.