Read Silimo 1 Korintus 9 Bible Online

1 Korintus 9 - Silimo bible

1 Korintus 9

¹An nematek welegi erlak no? At Allah en yoʼgo noboluk peraknobou waga erlak no? Nonue ʼgain Onuk Logo aʼge Yesus ebe an nil ho erlak no? Nonue ʼgain Onuk Logo aʼge neʼbirek hwedik welat tegis aʼge, henebe welegep ai erlak no?

²Is aphwami pema en an nebaget ogulat e, “At Paulus Kristus en yoʼgo po erlak,” oluk ogwi holuk e, his e, asogo u puk o. An yoʼgo noboluk peraknobou wagama wegi oluk e, his henebe nonue ʼgain Onuk Logo aʼge emin hwedik welegep ai pam enagat pobirak nobo yo.

³Aphwami en nobok wiak ogukhwe, an en disogo moʼgulentasu legi,

⁴“An Allah iabuk taga legi ai paget, neʼgik oʼgo soʼboru woknogulat, ik woknogulat, togukhwe, horlo erlak no? Horloat o.

⁵Ye, is ap logon Allah en yoʼgo onoboluk peragonobou waga aʼge emin, nonue ʼgain Onuk Logo aʼge osi eʼberlik aʼge emin, at Kepas emin, onugwami wogonoboluk noʼgwi ai ʼgelaʼge, an nak e, nugwe Allah eiyagai aʼge woluk neselom erlak no?

⁶Ye, at e, is ai yabuk wogwi erlak weat oruakhwe, an Barnabas neʼbirek nenematek nak en di aʼge yu aʼge neneʼgik oʼgo menoʼgogulat set hoposogo palo tu epegep?

⁷Ap tentara onuelak ʼgaindek en onosi weim obouwagoluk yoʼgo onobogwiam e, is onuʼgwarek en eneʼgik oʼgo meniʼgogo no epegep? Erlak o. Ye, is pema en anggur owi yogo poluk e, eʼgen egesisoam logon onuʼgwarek noʼgwei erlak no? Ye, at e, is pema onuam domba wam aʼbigat tenak welat e, agamu aʼbosu logon onuʼgwarek noʼgwi erlak no? Noʼgwiat o,” oluk moʼgulentasu legi.

⁸An wene egi ai re, nis aphwami en togu lege aʼge ebam elitsogo egi aʼgeat de, ebe Allah en wene nenesaʼgo weregei wene ano pam ai emin hegitsogo u erlak no? Egeimu enat egi o.

⁹Wene Allah en nenesaʼgo weregei wene ano pam, at Musa en disogo moʼgulentesi, “Aphwami en wam sapi wam oyuk en gandum agap lul wusogo eʼgen wouwagoluk poluk e, eʼgen logon at nouwano oluk, emde herle dopnosogo hettogup no yo. Logon nouwagoluk ukpogu lomup o,” [9] oluk moʼgulentesi ai, at Allah en wam sapi wam ai ede hwedik en egei no? Erlak o.

¹⁰Nis aphwami en yabuk wogulat, eʼgen ʼbalogulat, togulat e, “An logon naik o,” oluk nonogola nenagai hogulat yabuk wogulat, eʼgen ʼbalogulat, togu lege ai en, wene ai nis nenebaget egeimu pelal wogo oruak o.

¹¹Owi yorogwi ʼgelaʼge re, wene henedemu yerige ai o. Ye, ebe doru ʼgelaʼge re, his en di aʼge yu aʼge ʼgwiangma aʼge woknonto ai re, lok no? Erlak o. Elitsogo woknonto aʼgeat o.

¹²His en, is mu aʼge asogo wogonto hegirat holuk e, nis ebe eiye aʼge logon woknonto erlak no? “Woknonto hegirat o,” oluk moʼgulhentasu legi. Asogo aʼgeat de, nis logon woknontouwagoluk ogu lege erlak o. Op wene Kristus tegei wene ai, nis en moʼgulentil noʼgumu eʼgebela ʼgwe ʼbaluano oluk e, di aʼge yu aʼge logon woknonto aʼge oluk u erlakma en nenepe mosogo ukpogu lege o.

¹³Is ap Allah owi werik eiye welat yabuk eba togulat, onsoʼboru re, Allah owi ogola aʼge noʼgwi oluk e, heneperlak no? Ye, Allah uam warotluk narlik pogumu ebano odouk narlik pogulat asogoat pema ʼbalogo is noʼgwi oluk e, heneperlak no?

¹⁴Ai ʼgelaʼge re, at nonue ʼgain Onuk Logo aʼge en nenesaʼgo weriselat e, “Is aphwami en op wene moʼgulentil lagaimu re, is logon en op wene ai pegilsogo onsoʼboru wogontoat o,” oluk egei ai o.

¹⁵Asogo egei aʼgeat de, an e, op wene pegilsogo asogo wo erlakma en welegi o. An nebaget asogo woknemagoluk wene yu pelal wokho perakpou wegi puk. An asogo woknemagoluk tiso erlak welegi oluk e, erlikhwerlasu legi aʼge yu re, at mesik en niak erlagap po re, nebit o. An nebe waromma en de, op o.

¹⁶Op wene moʼgulentil nese legi ai re, moʼgulonto aʼgeat moʼgulentil nese legi ai en e, erlikhorlo modok mia o. Moʼgulonto erlakma en mo umu re, eige. Nuʼgwarek nebe alemat om ebeletak o.

¹⁷An asogo moʼgulentil nese legi ai, an nogola en ʼgagalogo moʼgulentil denagallema, neʼgik oʼgo woknogwiam, wasulle o. Aʼge re, an nede ʼgagalu erlak oruakma, Allah en yoʼgo noboluk eiye taknebesi ai en oʼgo erlak aʼge moʼgulentil denaga legi ai o.

¹⁸Holuk e, an neʼgik oʼgo noʼgwe woknum. Ai re, ebe yu. Oʼgo woknum ʼgelaʼge, op wene ai oʼgo erlak weat moʼgulentil denagalat nogola op welegi ai o. Asogo moʼgulentasuam e, oʼgo woknum hegit aʼgeat de, asogo mesik woknogwiam wo erlak welegi ai nak e, op o.

¹⁹An e, aphwami eneragam aʼge welegi puk. Nemategat welegi aʼgeat de, aphwami enebe aʼbigat Kristus ebaget wogenebigoluk e, aphwami ʼberlegat eneragam aʼge ʼgelaʼge egirik denaga legi o.

²⁰Aphwami Yahudi aʼge Kristus ebaget wogenebigoluk e, an nebabut Yahudi aʼge enebabut wokho taga legi o. Ye, aphwami wene Allah en nenesaʼgo weregei wene at Musa en moʼgulentesi wene ano, an hologo tagalom erlak aʼgeat de, is logon hologo welagai aʼge Kristus paget wogenebigoluk e, an nebabut wene ai nesaʼgo hologo welago aʼge ʼgelaʼge taga legi o.

²¹Ye, is logon wene Allah en nenesaʼgo weregei wene at Musa en moʼgulentesi wene ai, enesaʼgo hologwi erlak aʼge logon Kristus ebaget wogenebigoluk e, an nebabut wene ai hweliso erlak aʼge ʼgelaʼge welegiat o. Ai re, an wene Kristus en nenesaʼgo weregei wene ai hologo modok welat e, wene Allah en nenesaʼgo weregei wene ai an hwelak erlak welegi puk. Hologo welegiat o.

²²Is aphwami enede owan aʼge Kristus paget wogenebigoluk e, an nebabut e, nede owan aʼge ʼgelaʼge welegi o. Is aphwami ʼberlegat enebabut togwi aʼge loʼbok taga legi ai re, is aʼge pema delenebigoluk en de, asogo taga legi o.

²³An is aphwami ʼberlegat enebabut asogo wik-wok taga legi ai re, is enemin op aʼge eiye omogoluk op wene ai pagerat taga legi o.

²⁴Sa omut oruak. Sa omut oruak, oluk louwogoluk e, enebe lo aʼge eriano, enebe ʼberlegat lagai aʼgeat de, mesigat aʼge naduk lolukmu oʼgo op aʼge wogogwi ano heneperlak no? Ai ʼgelaʼgeat, oʼgo op aʼge wokhontouwagoluk e, pungtak henannisogoat laga lomup o.

²⁵Onomut erlak emano oluk, di aʼge yu aʼge ukpoluk onuʼgwarek en degelhorlogwi ai o. Is e, ʼgare-ʼgare perlene wiak om aʼge pagerat wogontouwagoluk degelogwi ai o. Aʼgeat de, nis e, wiak ema erlak aʼge woknontouwagoluk di paget yu paget degelogu lege ai o.

²⁶Ai enat, an lasu legi ai re, ʼga laik hwe, oluk yogunat lasu legi puk. Norogole dokhumat lasu legi o. Ai ʼgelaʼge re, aphwami eneʼgik eʼgerlik poluk at mesik en mesik weriselat, at mesik en mesik weriselat, togulat almasogo wema waronobogwi erlak ai ʼgelaʼge, an we yogunat taga legi puk.

²⁷Is aphwami logon op emagoluk op wene moʼgulentil nese legi aʼgeat de, nuʼgwarek uknoboma naleikno oluk, nuʼgwarek en nebe wathorlo ʼgelaʼge, nede ningsogo sebeliselat, aphwami eneragam welat eniak hologo welagai ʼgelaʼge, an nebe niak eragam weleigoluk nesaʼgo weriselat, taga legi o.