Read Silimo 2 Korintus 1 Bible Online

2 Korintus 1 - Silimo bible

2 Korintus 1

¹Narilak norokhwi. An Paulus Allah ede eberegei pam, Yesus Kristus en yoʼgo noboluk e, peraknobou waga aʼge ano nenare Timotius ano neʼbirek en his Allah eiyagai o Korintus odoktogu legep aʼge emin, o propinsi Akhaya da ya eba welegep aʼge ʼberlek emin, wene yu pelal wokho heneʼbek perakpou wege ai o.

²Nenaik Allah nonue ʼgain Onuk Logo aʼge Yesus Kristus eʼbirek enebabut op ano en, op aʼge wokhontogulat, henede haʼbugaphonobogulat, togu lemak o.

³Nonue ʼgain Onuk Logo aʼge Yesus Kristus aik Allah ai erliktogu lomok o. At nenaik Allah ebabut opma re, aphwami di paget yu paget enede wiak oruakma, edeabonoboluk enede obabenebiso yo.

⁴Aphwami logon di eʼgin yu eʼgin hogulat enede wiak oruakma, nis en is enede op emagoluk enede sebeluagoluk e, at Allah en nis asogo di eʼgin yu eʼgin hogulat nenede wiak agoam, nenede sebeliso yo.

⁵At Kristus di obotut yu obotut hil hil pobuk ebenagaikmu loksogoat hesi ai ʼgelaʼge, nis asogoat hogu lege o. Asogo hogumu at Kristus en nis nenede op otluk pobuk ebenagaikmu op emagoluk nenede sebeliso modok welago yo.

⁶Nis di eʼgin yu eʼgin hogu lege ai pam, Allah en his henede op emagoluk henede sebeliselat, henebe delhenebiselat, tuayat o. Ye, nis di eʼgin yu eʼgin hogumu Allah en nenede sebeliso ai pam, his asogoat di eʼgin yu eʼgin hogulat henepe mosogo wolorogup holuk e, Allah en henede op emagoluk henede sebeluayat o.

⁷Di obotut yu obotut nenemin hegitsogo hogu lege ai ʼgelaʼge, nenede op emagoluk Allah en nenemin hegitsogoat nenede sebelua o, oluk naluk ai en e, his op orogup ani o, oluk nenede mesigat ʼgaroksogo welege o.

⁸Narilak norokhwi. Nis o propinsi Asia etleba en di eʼgin yu eʼgin taknonobogu legesa ai heneperlak wolom nebit en moʼgulhentaik o. Asogo taknonobogulat, eʼgin modok aʼbik nis en tu mia aʼge nenebam pegesema, “Nis nenelaluk wolomul erlak hegi o,” oluk nenede hwenik aga.

⁹Enebe modok waronobuogoluk onobok ʼbalogumu, “Nis arat waromul hegi o,” oluk opogwi ʼgelaʼge aga ai o. Asogo agoam, nenede nonuʼgwarek nenebe pam nak eberak poluk wolom erlakma en, we, at Allah aphwami waragaiam enelalugabenebiso aʼge ano pam heʼberik poluk welemagoluk asogoat aga ai o.

¹⁰Nis nenebe modogat watnonobua o, oluk epegerikmu en, at Allah enat delnenebegeitik e, pobuk delnonobuayat o. Ye, nis nenebaget his heneminat seʼban ogu lege ano pam, pobuk ogo delnenebise lemayat o, oluk e, nenede at ebam eberak poluk welege. His en, nis nenebaget seʼban ogwi modok wolorogup ano pam, at Allah ebabut op en nis delnenebisoam e, is aphwami pema aʼbik en enil nontoluk e, Allah hau woruayat ani o.

¹²Nis erlikhorlogu lege ai, ebe disogo oluk. Nis is aphwami ʼgwiangma aʼge logon eneʼgerlak oʼgwe welat, is enebaget togu lege re, weiyat ʼgelaʼge o. Aʼge re, his henebaget nak e, logo ʼgelaʼgeat togu lege o. Ai re, aphwami ʼgwiangma aʼge enede ʼgagalak aʼge en togwi ʼgelaʼge togwi erlak o. We, at Allah ebabut op ano en, nenede mesigat op welat togu lemagoluk nenebabut woknentesimu togu lege aʼge ai nenede eberogulat, “Nis op togu legema o,” oluk erliktogu lege ai o.

¹³An en e, wene his en onuk elirat moʼgulogulat, pobi togulat, tu aʼge nak pelal wokho heneʼbek perakpou wegi o. Naduk e, an en perakpou wegi aʼge ai wei nagat pobi tigep. Aʼge re, pobuk nak e, ʼberlegat pobi togup epasu legi. Asogo pobirak poluk e, nonue ʼgain Onuk Logo aʼge Yesus wema ai erlige, nis en e, his henebaget honomot wul ai ʼgelaʼge, his en e, nis nenebaget nonomot wagubat o.

¹⁵Asogo pobi togubat o, oluk epegi ai en, his agauwa ʼbirenam honogola henagai hagup en e, an nadugat o Makedonia yema wagalat his heneʼbek til til weiktik e, pobuk togolik lasulat ogo heneʼbek til tilat, o Yudea laigoluk lasumu, his en letniouwak oluk epegi o.

¹⁷Asogo weigoluk epegi aʼgeat de, pobuk mo egi ai re, an niak ʼbiren epegep? An nede en e, “Disogo tik o,” oluk wenemennei eberiselat e, nuʼgwarek nogola nagai en, “I o,” oluk ningsogoat oluk en, pobuk, “Erlak o,” oluk oso epegep?

¹⁸Erlak o. At Allah iak demat nak moʼgulnentasu ai ʼgelaʼge, nis en ogo, “I o,” oluk en, “Erlak o,” ogulat, moʼgulhontogu lege erlak.

¹⁹At Allah omlogo Yesus Kristus, an nebe en moʼgulhentasulat, Silas en moʼgulhentasulat, Timotius en moʼgulhentasulat, moʼgulhentige aʼge ano ebabut e, “I o,” oluk en, “Erlak o,” oluk oso erlak. Allah en, “I o. Wokhentaik o,” oluk obok moʼgulnonto ʼgelaʼge, Yesus ebe woknentesimu oruak aiat o.

²⁰At Allah en di aʼge yu aʼge obok moʼgulnentesi aʼge ai ʼberlek e, “I o, wokhentaik o,” oluk u ʼgelaʼge, Yesus ebe woknentesimu oruak ai en e, nis at emin hwedik welat Allah erliktogulat e, “Demat emak o,” oluk u ʼgelaʼge, “Amin,” oluk ogu lege ai o.

²¹At Allah enat, his emin, nis emin, Kristus ebam heʼberik nenebesimu welege. Nenebe at uʼgwarek paget togu lemagoluk yoʼgo nenebasulat, silo ʼgelaʼge nenebasulat, tagalat e, di aʼge yu aʼge pobuk loksogo nouwogoluk, naduk naduk ʼgomuk noʼgwi ʼgelaʼge, Allah en nis nenebaget ʼberlegat nenebesi aʼge pobuk woknentaigoluk, naduk nadugat Arogun naduk nenedemu pesimu welege o.

²³An o Korintus heneʼbek wom erlakma en mo egi ai re, his henede wiak emano oluk mo egi aʼge ano, at Allah en nedemu il niasu aʼge en aluk o.

²⁴His henede Allah pam heʼberik pegep aʼge ai, demat oluk henede haʼbuksogo welegep ai en e, nis en, “Henede ai aʼge pam heʼberik po yo,” oluk neniak ningsogo moʼgulhontul erlak o. We, his honogola henagai hagup en e, lethontogu lege ai o.