Read Silimo 2 Korintus 10 Bible Online

2 Korintus 10 - Silimo bible

2 Korintus 10

¹An Paulus Kristus ebabut op enago aʼge ano ebabut wik-wok, nuʼgwarek en wene mesik henesaʼgo werik o. Is logon en e, “At Paulus ebe horoksogo nenemin welat e, ebabut sakhosogo wene moʼgulnentasu. Aʼgeat de, ebe walegat welat e, ebabut ogorlok erlaksogoat ningsogo moʼgulnentasu o,” oluk ogwi aʼge ano pobuk heneʼbek weiktik nebabut nogorlok erlak welat niak ningsogo moʼgulhentaikno oluk, pobi togup en e, niak sakhosogo moʼgulhentegis o. Is ai en e, “Paulus lak ai re, aphwami enebabut onotogat welat enebabut wokho togwi o,” oluk nonobok wiak ʼbalogwi aʼge ai, nebabut nogorlok erlaksogoat niak ningsogo wene yagentau weigoluk wenemennei eberise legi o.

³Nis nenebe ʼgwiangma welat aphwami segen waʼgun pam weim obogwi ʼgelaʼge obogu lege erlak o.

⁴Nis weim obogu lege ai ebe re, aphwami enesegen onuwaʼgun pam obogu lege puk. We, Allah anni aʼbik welago aʼge ano esegen uwaʼgun pam, o weim eʼgat pam ningsogo werik aʼge ai, elit moluktu ebelerak ai en obogu lege o. Is aphwami logon enede en e, “Allah ai ebe nenebit o. Is aphwami muon en nak e, at ebe enaluk om erlagat o,” oluk onuʼgwarek en erlikhorlogwi aʼge ai, nis en segen waʼgun ai pam e, elirat mabenabonobo yo. Ye, aphwami enede we aʼge pam eberogwi aʼge ai, nis en segen waʼgun ai pam Kristus iak hologo tuagoluk eragam elirat onobou wom o.

⁶Nis en e, his Allah iak ʼgaroksogo hologo modok togu legep aʼge holuk e, degelogo honobogulat is pema at iak enesaʼgo hologwi erlak aʼge holuk e, wene enebam pouwogolugat welege ai o.

⁷An en wene selakma aʼge ik yu re, pobi tip o. At ap mesik ogola en e, “An nebe re, Kristus en aʼge welegi o,” oluk pobi tiso holuk e, uʼgwarek en ebabut ʼbaliselat, “An nebe Kristus aʼge ʼgelaʼge re, is Paulus lak ogo asogoat o,” oluk pobi tuak o.

⁸Nonue ʼgain Onuk Logo aʼge en e, an en wiagaphonobuagoluk eiye taknebesimu puk. We, henede hurleaphonobuagoluk, eiye taknebesimu welegi ai paget aʼbigat nuʼgwarek en erlikhwerlasu leik holuk e, neʼgerli eik erlak o.

⁹Aphwami his aʼge logon en e, “Paulus ai ebe walekma welat pelal wokho perakpou wagoam e, iak ʼbalu mia o. Ningsogo moʼgulnentasu. Aʼgeat de, ebe wemarik nenemin welat e, ebe uo aʼge ʼgelaʼge o. Ye, iak osoam en e, enesaʼgo holu enebit ʼgelaʼge o,” oluk ogwi ai en e, wene pelal wokho heneʼbek perakpou waga legi ai re, his honogola en, “Nonogorlok modok emagoluk perakpou wago yo,” oluk epagupno oluk moʼgulhentegis ai o.

¹¹Nis pobuk womultik e, is asogo ogwi aʼge ai, nenebe walekma welat wene pelal wokho perakpou wege aʼge ai hegitsogoat tumul ai en e, pobirak poluk welemak o.

¹²Nis en e, is logon onuʼgwarek en, “An op o,” oluk enede en logo pagathorlogwi aʼge ai, nenemin wenaknonobu re, nogorlok o. An nuʼgwarek nebabut ʼbalogo en de, nebe is enemin hegit oluk, u re, nogorlogat o. Ai re, is en e, “Enebabut op aʼge ʼgelaʼge wo re, nis nagat o,” oluk ogulat, aphwami enasu is aʼge modok is-is enebabut ʼbalogulat, togwi ai re, enebe uo enat togwi o.

¹³Nis nenebabut ai ʼgelaʼge re, erlak o. Nis nenebabut neniabuk Allah en hwerli ʼbalogo woknentesi ai pam togulat, oʼborl oʼgwe aʼge paget erliktu erlakma en, hwerli ʼbalogo woknentesi aʼge pagerat erliktogu lege o. His henebe ogo re, neniabuk hwerli ʼbalogo woknentesi ai aʼgeat welegep o.

¹⁴His henebe Allah en yabuk hwerli ʼbalogo woknentesimu welegep ai en e, op wene Kristus en tegei aʼge ano woluk e, moʼgulentil-entil hwerli his heneʼbek wege ai, hwerli ʼbelak aʼge sebelholuk wege erlak o.

¹⁵Allah en asogo neniabuk hwerli ʼbalogo woknentesi aʼge ano sebelogo emingholuk loluk, is pema tigisa aʼge, an en tegis oluk erlikhorlogu lege erlak o. His henede Allah pam heʼberik pogu legep aʼge ai logon eminsogo hurle agoam e, o his oruak oʼgwe Allah en hwerli ʼbalogo nis woknentesi ai pam enat, yabuk loksogo togu lomul opogu lege o.

¹⁶Asogo togu lomultik e, Allah en is logon eniabuk hwerli ʼbalogo wogentesimu tigisa aʼgeat de, nis en tige oluk erlikhorlogumuno oluk e, his honowi abel etli akhit oʼgwe, eba wene op wene moʼgulentil noʼgu lomul opogu lege o.

¹⁷Allah iak pelal disogo oluk wogo oruak, “Aphwami en di paget yu paget erlikhorlouwogoluk holuk e, nonue ʼgain Onuk Logo aʼge tegei ano paget nak erliktu o,” [9] oluk egei.

¹⁸Aphwami onuʼgwarek en erlikhorlogwi aʼge ai Allah en op oluk wogenebiso puk. We, at nonue ʼgain Onuk Logo aʼge en erligenebiso aʼge nak e, op oluk wogenebiso yo.