Read Silimo 2 Korintus 11 Bible Online

2 Korintus 11 - Silimo bible

2 Korintus 11

¹An en wene weisogo aphwami uo aʼge en ogwi ʼgelaʼge ik aʼge yu re, wene yaknum erlakma en, henesaʼgo hologo welemagoluk moʼgulhentegis o. Henesaʼgo hologo welemis o.

²Hwelani enebabut ap enemin nogogwi erlak aʼge, onogunlak enemin loʼboktak onobogwi ʼgelaʼge, an en e, his Kristus ebam loʼboktak henebegi aʼgeat de, his en ap mu aʼge mesik emin laʼbologup holuk e, Allah olot het om ʼgelaʼge, an nolot het omat o.

³Asogo aʼgeat de, his henede mesigat Kristus ebam heʼberik poluk at ebaget degelak welegep aʼge ai, nadugat at ʼGosu ano ebabut eden-pedentakma no oluk e, hwe Hawa lalegei ʼgelaʼge, is aphwami logon en lalhonobuano oluk e, nogorlok ago yo.

⁴Is muon heneʼbek wagalat e, nis en op wene Yesus tegei aʼge moʼgulhentigema wegep ʼgelaʼge, is en moʼgulhontogwi erlak o. We, mu aʼge moʼgulhontogwiam e, Allah Arogun wegeptigat de, pobuk mu aʼge arogun wogulat, op wene wegeptigat de, pobuk wene mu aʼge wogulat, honogola henagaisogo nak wogukhwe hentasu legi o.

⁵Is mu aʼge ai, Yesus en yoʼgo onoboluk peragonobou waga aʼge ʼgelaʼge takpoluk wagaiam, his en e, “Is ai nak e, logo ʼgelaʼge o,” oluk wogonobogukhweat de, an nede en e, “Is logo, ye, an e, mia o,” oluk epasu legi modok erlak o.

⁶An wene osokhwe enebam lasu erlak aʼgeat de, wene ebe neperlak puk o. Nalugat o. An en nin hwedik nan hwedik di paget yu paget osokhwe re, his en, “At wene aluk o,” oluk enagat pobirak nobogu legep o.

⁷An en Allah iak op wene ai moʼgulhentasulat e, “Oʼgo mesik woknemis o,” oluk u erlagat o. His logo henebaigoluk an nuʼgwarek nebe uo aʼge ʼgelaʼge tak poluk, asogo taga legi ai, his wiagaphenebasu legi oluk u no? Modok erlak o.

⁸An en his lethentasu legi ai paget, neʼgik oʼgo ʼgelaʼge re, is Allah eiyagai o akhenma en woknogwiam wasu legi o. Asogo wasu legi ai paget is aphwami pema en e, “At Paulus en is aphwami o Korintus aʼge lerentaigoluk e, oʼgo is mu aʼge enaʼge eʼgik abusak ʼgelaʼge wasu o,” oluk moʼgulnumat o.

⁹An his henemin welat uang erlak en, his en mesik woknemagoluk henebam ʼgonu tagalat derlelhenebise legi erlak o. We, asogo oruakma, is ap narilak o Makedonia aʼge wegesarik elirat woknosu egesa ai en, di paget yu paget his henebam eʼginap paikno oluk, epegirik e, ʼgonu moʼgulhonto erlakma en welegirik pobuk modok asogoat taga leik o.

¹⁰Asogo taga leik oluk, nogola nagai hasulat erliktaga legi aʼge ai, aphwami o Akhaya eba aʼge logon en niak ʼbalu mia, oluk Kristus iak dem wene nogola welat demat egi o.

¹¹Nopaget an asogo egi epegep. His henebe nede erlak en egi epegep? Erlak o. An his henebe nede welegi ai, Allah aluk o.

¹²Is muon Kristus en yoʼgo onoboluk peragonobou waga aʼge ʼgelaʼge wegesarik togwi aʼge ai en e, “Nis Paulus emin hegit o,” oluk ogulat erlikhorlogwi aʼge ai, is eniak erlak emagoluk an yogodak taga legi aʼge yu re, tago modogat weleik o.

¹³Is ai re, Kristus en yoʼgo onoboluk peragonobou waga aʼge puk. We, at en peragonobou waga aʼge ʼgelaʼge takpoluk wegesarik aphwami lalonobogwi aʼgeat o.

¹⁴Is togwi ai re, elalinat togwi puk. Enaik Iblis uʼgwarek epenenat e, malaikat o dakharak aʼge wene woluk wagai ʼgelaʼge takpoluk wago ʼgelaʼge togwi o.

¹⁵At Iblis eragam welat, at ebaget togwi aʼgeat de, at Allah eragam welat hegitsogo togwi aʼge ʼgelaʼge takpoluk wagai ai enebabut onotogat o. Asogo togwi ai en, o ologun pam, Allah en oʼgo is di paget yu paget togwi hegitsogoat tagonobouwa o.

¹⁶Aphwami his aʼge logon en e, “At Paulus ebe uo ʼgelaʼge o,” oluk opouwano oluk, pobuk niak lagaksogo togolik moʼgulhentegis ai o. Asogo aʼgeat de, his en asogoat opogu legep holuk e, an nebe uo ʼgelaʼge welat wei logon erlikhwerlaik aʼge yu re, henesaʼgo hwelit o.

¹⁷An en erlikhwerlaik yu re, nonue ʼgain Onuk Logo aʼge en, “Hat asogo in o,” oluk moʼgulnesimu erlikhwerlaik puk. We, aphwami uo aʼge en erlikhorlogulat ogwi ʼgelaʼge ik o.

¹⁸Is aphwami enebe esan en di aʼge yu aʼge ʼgwiangma aʼge paget erlikhorlogwi ai, an weiyat logon erlikhwerlaigat o.

¹⁹His henede ʼgagalak aʼge ʼgelaʼge yema re! Is logon uo aʼge eniak ogumu, his honogola henagaisogo hologu legep ai o.

²⁰Asogo togu legep ai pam, his henebe is en eneragam honoboluk, honsoʼboru modok perlengsogo noʼgulat, henaʼge yogorlia horlogulat, “His mia aʼge re, nis nak e, elit o,” oluk onuʼgwarek en logo pogulat, honorogole laʼbuksogo wathonobogulat, togukhwe henepe mosogo welegep yema re!

²¹Nis ogo asogo tu re, nenebabut nonogorloktak en mo ege o, oluk u re, neʼgerli aʼbik ho no? Erlak o. Is aphwami uo aʼge en ogwi ʼgelaʼge mesik moʼgulhentaik. At mesik eʼgerli erlak erlikhwerlasu holuk e, an ogo re, neʼgerli erlaksogoat erlikhorlo yo.

²²Is ai enebe Yahudi aʼge ʼgelaʼge an ogo re, nebe Yahudi aʼgeat o. Is enebe Israel aʼge ʼgelaʼge re, an ogo re, nebe Israel aʼgeat o. Is enebe enaik Abraham en dogoʼgwe ʼgelaʼge re, an ogo re, nebe naik Abraham en dogoʼgwe aʼgeat o.

²³Is ai Kristus eragam aʼge welat, at ebaget weiyat togwi aʼgeat de, an nak e, loksogoat tago yo, oluk, aphwami enede ʼbelak aʼge en ogwi ʼgelaʼge mesik moʼgulhentegis ai o. Is e, seget weisogo ʼgelaʼge togwi aʼgeat de, an nak e, seget aʼbik hasu legi o. Is e, mesik erlige ʼgelaʼge eneʼgik herle worogulat, ʼgoʼbu waronobogulat, enebe modok warom ʼgelaʼge waronobogulat togwi aʼgeat de, an nak e, nin hwedik nan hwedik neʼgik herle worogulat, ʼgoʼbu watnobogulat, nebe warom ʼgelaʼge modok watnobogulat, togwi o.

²⁴Is aphwami Yahudi aʼge en ʼgoʼbu lagalʼbisok ʼgoʼbu mesik erlige eneʼgik 39 pam watnobogu legesa aʼge neʼgik wenakho re, agauwa huabenamat watnebigisa o.

²⁵Ye, aphwami o Roma aʼge en ʼgoʼbu pam agauwa henaganam watnebigisayat o. Ye, helep pam puk-paksogo watnebigisayat. Ye, ik laut yeʼgelakma eba en so wusogo lebagaimu, agauwa henaganam so wiak agarik lebaksogo ʼbegeiyat. Ye, agauwa mesik erlige re, ik laut yeʼgelakma eba ik ogum pam sasogo nogogistigat o.

²⁶Nin hwedik nan hwedigat yuk oʼgwe lasu legi ai re, ik ebe wagalat sebelnobu ʼgelaʼge agalat, aphwami enebabut wiak welat yogorlia wogwi aʼge en watnobuogoluk togukhwe yuk weriselat, is aphwami an naʼgul aʼge en watnobuogoluk togukhwe yuk weriselat, is oʼborl oʼgwe aʼge en ogo watnobuogoluk togukhwe yuk weriselat, o kota seli lok werikmu en watnobuogoluk togukhwe yuk weriselat, o kota oʼborl akhit aʼge en ogo watnobuogoluk togukhwe yuk weriselat, ik laut yeʼgelakma en watnobuogoluk togukhwe yuk weriselat, aphwami mu aʼgeat de, Allah eiyagai narilak aʼge ʼgelaʼge welat watnobuogoluk togukhwe yuk weriselat, taga legirigat o.

²⁷Di paget yu page set wik-wiaksogo tagalat, nin hwedik nan hwedik nogo nelaluk nogo eselat, soʼboru emin, ik emin, erlak en nele welat, nin hwedik nan hwedik soʼboru ʼbonuk aʼge mo eselat, nosum erlak en sogwei watnebiselat, o ʼgeba nogou ʼgelaʼge agalat, taga legirigat o.

²⁸Asogo taknobogukhweat de, Allah eiyagai di owi yu owi odoktogwi aʼge ʼberlek enebaget e, nin hwedik nan hwedik modogat nebam eʼgin welat mennei eberiso yo.

²⁹At mesik maben ago holuk e, an maben om ʼgelaʼge, nede wiak agoat o. Ye, at mesik wiak aʼge en ede ʼgagalisoam wiak ago holuk e, an ogo nolot het agoat o.

³⁰Aʼge re, erlikhorlo holuk e, an nebe maben oluk erlikhorlo yo.

³¹An wene egi ai re, niak eseiyat egi erlak o. At nonue ʼgain Onuk Logo aʼge Yesus aik Allah orogole wokho erliktogwi modok wolomul aʼge ano aluk o.

³²An o Damsyik oruakma re, onue ʼgain onuk logo aʼge Aretas eragam aʼge gubernur ai en osi leget ʼgodukmu ʼgagalak oruakma an tenak nobouwagoluk yoʼgo enebesi.

³³Asogo aʼgeat de, ling-long is logon en an nebe mul egeik aʼge ogola yagarak noboluk e, leget pakleget ele delak oʼgwe lebiknoboluk herle erlilogo ʼbelebak nebegesema re, ʼbok lebegi ani o.