Read Silimo 2 Korintus 12 Bible Online

2 Korintus 12 - Silimo bible

2 Korintus 12

¹An nuʼgwarek erlikhwerlil waga legi aʼge ai re, u mia aʼgeat de, pobuk erlikhwerlaigat o. Nonue ʼgain Onuk Logo aʼge en an nil houwagoluk moʼgulnesimu nabi ʼgelaʼge pam hasulat, noborogwi pam hasulat, hegi aʼge ik o.

²An 14 tahun pageat nil hegi aʼge is logon enebam elitsogo ik o. Ap mesik Kristus emin hwedik welaga aʼge Allah en ʼbogorl hwerli ʼbiren hwerlirak aʼge ukpoluk hwerli mesik pam erabu woluk ligaga ai nalugat o. At ai demat woluk ligaga de a? Arogun woluk ligaga de a. An neperlak o. Naik Allah at aluk o.

³Ap ai Allah en ʼbogorl pam opma eba woluk ligagama wene aphwami en ogwi erlagat, ye, u miayat, aʼge esaʼgo hwelegei naluk o. Asogo aʼgeat de, demat woluk ligaga ya? Arogun de a. An neperlak aʼge re, Allah at aluk egi ai o.

⁵Ap ai paget nak e, erliktagalat, an nuʼgwarek nebaget erlikhorlo erlakma en, we, nebe maben ai paget nak e, erlikhwerlaigat o.

⁶An nuʼgwarek en nabi ʼgelaʼge pam hegi aʼgeat de, ap mesik ebam elitsogo egi ai aʼge paget mesik emin erlikhwerlaik holuk e, niak demat ik ai en e, aphwami uo aʼge en ogwi ʼgelaʼge ik erlak o. Asogo aʼgeat de, aphwami logon en an hasu legi ai aʼge paget erliknobuano oluk, nebe enil niogulat, niak enesaʼgo holugulat, togwi ai pam pobirak nobuagoluk e, mesik ai aʼge u erlakma en mo ik ai o.

⁷An en, “Nabi ʼgelaʼge pam elalinat nil hegi ai nogorlok o,” oluk nuʼgwarek en erlikhwerlaikno oluk e, aphwami enebetne orlok ʼgwisoam nonouk togwi ʼgelaʼge, ou nebam agoam nonouk tagalemagoluk, nebam pesimu, Iblis en yoʼgo pesi aʼge ʼgelaʼge nebam oruakma, nonue ʼgain Onuk Logo aʼge en henokho lebikpouwagoluk neʼgik henaganam yoʼgo pegi aʼgeat de,

⁹at en e, “Hat maben holuk e, an nanni aʼbigatma hebe nedeaphebise legi ano pam, elirat op wolorogun o,” oluk moʼgulnesi. Asogo moʼgulnesi ai en, at Kristus anni an nogola pesi aʼge aiat welemagoluk e, an di paget yu paget mabenat welat, nogola nagaisogo erlikhwerlasu leik o.

¹⁰Ai en e, an Kristus paget, nebe maben eik holuk, aphwami en nobok wiak ʼbalogwi holuk, wik-wiak taknobogwi holuk, eʼgin peʼgin taknobogwi holuk, weim obogulat waronobuogoluk waleʼgik onobogwi ano ʼgelaʼge taknobogwi holuk, an maben oruakma, ai pam en nanni ago oluk, nogola nenagai hasu legi o.

¹¹Is ap Kristus en yoʼgo onoboluk peragonobou waga aʼge ʼgelaʼge takpoluk wagalat, “At Paulus onuk erlak o,” oluk ogwi ai, an demat nonuk erlak. Is nak e, logo ʼgelaʼge ononuk oruak hegi! Asogo erlak o. His en pobirak noboluk nomot wokho moʼgulnom aʼgeat de, asogo ogu legep erlak ai en e, demat ap uo aʼge en ogwi ʼgelaʼge, moʼgulhentegis ai o.

¹²His en e, “Paulus e, Kristus en yoʼgo poluk perakpou wagama o,” oluk enak aʼge pobi nobuagoluk, an nemin welat di paget yu paget nepe mosogo tago oruakma, aphwami en pobi tuagoluk, Allah en annisogo di aʼge yu aʼge elalinat taga laga.

¹³His henebaget taga legi ai, is Allah eiyagai di owi yu owi odoktogwi aʼge paget taga legi aʼge ai eʼbirek walhoma re, no aʼge on ukhenebegimu en ogu legep. We, an yabuk taga legi aʼge paget, “An neʼgik oʼgo mesik woknemis o,” oluk derlelhonobu erlak welegi ano paget ukhenebegimu en de, ogu legep a? Holuk e, wiagaphenebegis ai paget erlagapsogo ukpoluk henede op emit o!

¹⁴An naduk agauwa ʼbirenam heneʼbek wegirik, pobuk mesik weigoluk degelogo pegirik welegi o. An heneʼbek weik ai re, di aʼge yu aʼge enemalik en enialak enaiklak en herasogo wogontogwi puk. Erlak o. We, enialak enaiklak en e, enemalik enebaget herasogo wogontogwi ai en e, his enaʼge di aʼge yu aʼge ʼgonu tagalat henebam derlelhonobou weik puk. Erlak o. We, henebeat herahenebil weik o.

¹⁵Ai ʼgelaʼge re, his henebe henebaget e, naʼge di aʼge yu aʼge henebasulat, nebe ogo henebasulat, nedemu en nogola nagai hasulat tu welegi o. An his henebe nede hwedik oruakhweat de, his nak e, an nebe henede hwedik erlak ʼgelaʼge wolom no?

¹⁶An en e, his henebam eʼginap paigoluk his en aʼge ʼgonu moʼgulhonto erlak ai re, enagat oruak ai o. Aʼge re, his logon en ogulat e, “At Paulus ede ʼgagalak ano en e, di aʼge yu aʼge sabuthwerlaiogoluk, iak lalogo moʼgulnentasu o,” oluk ogu legep ai,

¹⁷an nosi his heneʼbek peragonobou wegi aʼge ebano en, his en aʼge mesik sabusogo an woknosu egesa no? Modok erlak o.

¹⁸At Titus heneʼbek wemagoluk ede ʼgagalegistik e, nenare Allah eiyagai aʼge mesik at emin peragonobou wegimu wegesa aʼge ano, wegesarik e, at Titus en his pagathwerlegep aʼge mesik meʼgisogo logon hwerlesi no? Modok erlak o. An Titus emin e, nenebabut mesigat togu lege erlak no? Is logon naduk onoyuk pil lagaimu re, is logon pobuk ebam louksogo onoyuk pil lagai ai ʼgelaʼge, at Titus an nemin yabuk hegitsogo togu lege erlak no?

¹⁹His honogola en e, “At Paulus wene uʼgwarek ebam aʼge noʼgorlogo oso yo,” oluk page enat ogu legep aʼgeat de, an asogo epasu legi erlak o. Narilak norokhwi. Henebe nede o. At Allah il pam, an Kristus emin hwedik welarat ese legi ai. Di aʼge yu aʼge taga legi ai re, his henede hurle emagolugat taga legi o.

²⁰An pobuk heneʼbek weik ai weiktik e, an en, “Is enebabut op oruakma laik o,” oluk epasu legi ʼgelaʼge, erlak. We, wiak oruakma hentau wagalat, ye, his en e, “At Paulus ebabut op o,” oluk ogu legep ʼgelaʼge, erlak o. We, wiak welat hentau wagalat, tikno oluk, nede periso yo. His-his henemin wiak welat, ʼbou togulat, honolot het agalat, honuʼgwarek paget nak togulat, onobok wiak selakma ʼbalogulat, hisakho ʼbalogulat, honuʼgwarek en erlikhorlogulat, yogunat togulat, togumu an wom ai re, nogorlok o.

²¹Asogo togumu, an wagoam e, naik Allah en his henebabut togu legep ai paget his henil pam neʼgerli wusogo nebe sebelak nobo ai nogorlok o. Is aphwami his aʼge logon esan en hwami onogunlak oruak aʼge, ap onugwami oruak aʼge en ʼbabi tenontogulat, hwelani salisik ap dedik aʼge en ʼbabi tenontogulat, eneʼgerli erlaksogo wiak modok togulat, naduk togu legesa aʼge ukpoluk enebabut heberlom erlakma en modok welagai ai paget, nge tumano oluk nede perik welegi o.