Read Silimo 2 Korintus 13 Bible Online

2 Korintus 13 - Silimo bible

2 Korintus 13

¹An naduk agauwa ʼbirenam heneʼbek wegirik e, pobuk mesik weik ai o. Allah iak pam pelal disogo oluk wogo oruak, “Aphwami en is logon di wene yu wene enebam pouwogoluk holuk e, aphwami logon enebe ʼbiren de a? Henagan de a, wiak togukhwe enil hegesa aʼge en, Demat nenil hege o, ogwi holuk e, demat opo yo,” [10] oluk egei ai en e, an weiktik, ai ebelesogoat tu weik ai o.

²An naduk agauwa mesik wegirik pobuk wegi ai pam, is aphwami his aʼge logon naduk wiak tigisa aʼge emin, ye, is ado pema o eba aʼge enebe ʼberlek emin, enesaʼgo weregis aʼge yogodak an nebe walekma welat enede ebesogo moʼgulentaigat o. An pobuk weiktik e, is ai sebelogo onobou weik erlak o. We, wene enebam pou weik o.

³His en e, “Paulus ai re, Kristus ogola welat oso a? Erlak a,” oluk nebabut ʼbaluogoluk egep ai re, nebe wagoam enagat pobi nobogup o. At Kristus his togu legep ai paget ebe maben en ebakhenne mo oso puk. At his henemin welat anniat oruak o.

⁴At Kristus ebe maben en oruakma e pam edikpoluk werigisa aʼgeat de, at Allah anni pam elalugaptegeimu elalugat welago. Ai ʼgelaʼgeat, nis at emin hwedik welat maben welege aʼgeat de, at Kristus emin hwedik nenelaluk welat e, Allah anni pam his henebaget tumul o.

⁵His en e, “Nis nenede Kristus ebam heʼberik pege ano heʼberigat welege a? Erlak a,” oluk honuʼgwarek en henebabut dokhumsogo ʼbalhorlomup o. Asogo ʼbalhorlogulat, mia ago erlak holuk, “Yesus Kristus nonogola oruak o,” oluk enagat hagup o.

⁶Ye, his en, nis nenebabut ʼbalogulat, “Paulus lak enebabut ʼbalige aʼge mia om erlak. Kristus en demat yoʼgo enebesimu o,” oluk enak aʼgeat nontogu legep epegi.

⁷Nis en e, his wiak mesik togupno oluk, Allah yoʼgo pogu lege o. Ai re, his en henil nontogulat e, “Paulus lak op togwi o,” oluk nenebabut ʼbalogo ogu lorogup en ogu lege erlak o. Nis nenebabut ʼbalogwiam, his en, “Is mia ʼgelaʼge egesa o,” epagup holuk e, yogunat o. Ukpemit o. Hisat op togu lorogup en his henebaget Allah yoʼgo pogu lege o.

⁸Ai re, nis en dem wene sagalu re, mia. We, logo po aʼge nak welege o.

⁹Nis maben oruakhwe re, his henanni oruak ʼgelaʼge wolom holuk e, op o, oluk, nonogola nenagai hogu lege o. Ai pagerat, his henede ʼgaroksogo hurle emagoluk, Allah yoʼgo pogu lege o.

¹⁰Ai en e, nebe walekma welat wene yu pelal wokho pasu legi o. Nebe pobuk weikmu nemin welat e, niak harosogo wene yakhentaikno oluk e, pelal asogo wokho pasu legi ai o. Nonue ʼgain Onuk Logo aʼge en anni woknesimu eiye welegi ai re, his henebe wiagaphonobuagoluk puk. We, henede hurleaphonobuagoluk eiye welegi o.

¹¹Narilak norokhwi. Wene ologun ʼbalogo re, disogo moʼgulhentaik. Honogola henagai hogulat, henede ʼgaroksogo hurleap pogulat, togu lomup o. Wene henesaʼgo wetil wegi ai, henesaʼgo opsogo hwelip o. Henede mesigat welat, henemin laʼbulogo wolomup o. Asogo togu lorogup holuk e, Allah en aphwami edeabenebiselat, opsogo is enemin laʼbulik enebasulat, tiso aʼge ano en, ʼgwelakhentarok welema o.

¹²His-his e, Allah paget hau henemde motok wat-wat til laga lomup o. Allah eiyagai yema aʼge ʼberlek en e, hau wathenebigisayat o.

¹³Nonue ʼgain Yesus Kristus ebabut op ano pam obaphenebiselat, nenaik Allah en edeaphenebiselat, Arogun en laʼbulogo henebasulat, taga lemak o.