Read Silimo 2 Korintus 3 Bible Online

2 Korintus 3 - Silimo bible

2 Korintus 3

¹Asogo egi ai, nis nonuʼgwarek en pobuk erlikhorlogulat ogu lege no? Modok erlak o. Ye, at e, is aphwami logon en togwi ai ʼgelaʼge, nis woknonobuagoluk surat his wokhentasulat, is logon en woknonobuagoluk surat his en wogontogulat, togu lege a? Erlak o.

²Nis woknonobuagoluk e, his henebeat pelal ʼgelaʼge wogo aʼge nis nonogola oruakma re, aphwami ʼberlek en onuk moʼgulogulat, pobirak nonoboluk, tu aʼge oruagat o.

³His henebe re, wene Kristus en pelal wokho pesimu nis en perakpege aʼge ʼgelaʼge welegep o. Pelal ai re, odo aʼbosu pam wo erlak aʼgeat de, Allah elaluk modok welago aʼge ano Arogun pam wesi o. Ye, helep ebak aʼge pam ogo wogo erlagat. We, aphwami enede pamat wesi o.

⁴At Kristus en nis nenede wenemennei yat horok eberu erlakma en, Allah pam heʼberik poluk welemagoluk taknenebesi ai en, wene asogo egi o.

⁵Nis nonuʼgwarek nenanni pam di aʼge yu aʼge tu elit o, oluk, nenede opogu lege erlak o. We, at Allah enat nenanniapnenebegeimu tu elirat welege o.

⁶Allah en wene ʼget aʼge obok weraknenebesi ai, nis en woluk louwagoluk, at enat nenanniapnenebegeimu elirat woluk lo aʼge welege o. Wene naduk enesaʼgo weregeimu pelal wokho pegesa aʼge hegitsogo tu erlak holuk, ai pam enebe warenebiso yo. Aʼgeat de, Allah Arogun en enelalugabenebiso ai en, nis wene naduk pelal wogo aʼge woluk lo erlakma en, we, at Arogun en moʼgulnentasu aʼge woluk laga lege ai o.

⁷Allah en wene helep pam ʼbalegei aʼge ai ukpogu lege ai pam nonuʼgwarek en wene nenebam poluk nenebe waraga lege o. Aʼge re, naduk wene ai wogosoam e, erliktigisa. Helep ai at Musa en woluk ʼbu agokhwe re, at orogole amulit aʼbik aʼge erlak agokhweat de, is aphwami Israel aʼge enil yethul oluk tigisa ʼgal e, enil mum-mam egei. Wene pelal wogo ai wogosoam erliktigisa ai ʼgelaʼge, at Allah Arogun woknentasuam e, aʼbigat erliktu o.

⁹Wene pelal wogo ai hegitsogo tu erlak pam wene nonuʼgwarek en nenebam pege ai o. Aʼgeat de, wene ai wogentasuam erliktigisa aʼgeat de, ai weiyat o. At Yesus en wene nenebam aʼge noʼgorlogo wokholuk Allah pam togolik hwedik taknenebesi ai wene woknentesi ai paget nak e, loksogoat erliktu o.

¹⁰Wene pobuk aʼge aʼbigat erliktu ebelerak ai en e, wene naduk aʼge erliktogu legesa ai ʼgelaʼge, pobuk erliktu aʼge erlak aga o.

¹¹Wene naduk aʼge ai erlak om aʼge oruakhweat de, erliktigisa holuk e, modok wolom aʼge ai aʼbigat erliktu o.

¹²Pobuk asogo op ema oluk, nonogola nenagai hogulat e, wene nonogorlok modok erlaksogoat moʼgulontogu lege o.

¹³Nis e, at Musa orogole amulit aʼbik ano modok erlak eigoluk erlak agokhweat de, is aphwami Israel aʼge enil niouwano oluk, orogole sum pam orlomu tegei ai ʼgelaʼge, nis asogo orlomu tul puk.

¹⁴Aʼge re, is ai enede ebistak pesimu welegesa. Yogodak ogo re, Allah en, “Disogo takhenebaik ani o,” oluk wene emin werigisa aʼge pelal wogo aʼge ano, is en onuk moʼgulogukhwe, enede ʼgagalom erlakma en ebis agarik sum ʼgelaʼge hiktak aʼge orlomurak oruak o. Asogo orlomurak aʼge ai, at Kristus emin hwedik togwiam en nak e, enede hiktak aʼge orlomurak ano elirat hurago ai o.

¹⁵Yogodak ogo re, wene at Musa en pelal wesi wene ai, is en onuk moʼgulogwiam e, enede ʼgagalom erlakma en hiktak aʼge ano orlomurak oruak o.

¹⁶Asogo aʼgeat de, aphwami is aʼge logon enebabut heberlogo onolukhwe nonue ʼgain Onuk Logo aʼge wogogwiam e, enede hiktak aʼge ano orlomurak aʼge ai wokhasu o.

¹⁷“Nonue ʼgain Onuk Logo aʼge,” oluk egi ai re, Allah Arogun pagerat o. Aphwami nonue Onuk Logo aʼge Arogun onogola oruakma re, herle hebeligat enematekma welagai ai o.

¹⁸Enil enapunak pam is aphwami logon enebe ʼbekhirat yerontogwi ai ʼgelaʼge, nis ʼberlegat nonorogole pam hiktak aʼge orlomurak erlakma re, aphwami en nonue ʼgain Onuk Logo aʼge erliktogwi aʼge ai arogun ʼgelaʼge enil yetnontogwi. Nis nenebe at nonue ʼgelaʼge emagoluk e, pobuk naduk taknenebasu modok oruakma re, erliknonobu ʼgelaʼgeat aga lege. At Allah Arogun ai ebe nonue ʼgain Onuk Logo aʼgeatma, at enat taknenebasu o.