Read Silimo 2 Korintus 4 Bible Online

2 Korintus 4 - Silimo bible

2 Korintus 4

¹At Allah nenebe ede en e, at ebaget disogo togu lemagoluk yoʼgo nenebesi ai en e, nenede ʼbuk agalat ukpo pukmu en togwi modok welege o.

²Nis e, aphwami en di aʼge yu aʼge hisakho wiak togulotluk eneʼgerli agai ano aʼge ukpege. Asogo ukpegerik, aphwami lalonobogulat, Allah iak wene mu aʼge pam loʼboksogo moʼgulontogulat, togu lege erlak o. Aphwami yema enede loʼbok en pobirak nonobuagoluk e, wene dem wene Allah il pamat selakmayat moʼgulentil denaga lege.

³Op wene moʼgulentil denaga lege ai, aphwami logon en pobi togwi aʼgeat de, is aphwami nal agai aʼge nak e, wene ai paget enede hiktak aʼge orlomurak oruak o.

⁴Asogo oruak ai re, is aphwami ʼgwiangma aʼge enaik ʼgain Iblis ano en enede Allah ebam heʼberik po erlak aʼge ai, enede hiktak enebesimu oruak o. At Kristus Allah ʼgelaʼgeatma re, ebe erliktogwi wene, op wene ai en dakharak onobo aʼgeat de, dakharak enebasumuno oluk, enede hiktak enebesimu oruak ai o.

⁵Wene moʼgulentil denaga lege ai re, nonuʼgwarek en togwi ebele puk. Erlak o. We, at Yesus Kristus tegei weneat o. At Yesus ebe nonue ʼgain Onuk Logo aʼge oluk e, nis at ebaget his heneragam aʼge welege o, oluk moʼgulontogu lege ai o.

⁶At Allah en eselat e, “O hiktak aʼge ai ogola dakha uak o,” [1] oluk egei ai ʼgelaʼge, at enat nis nonogola hiktak aʼge ano dakharak nenebesimu welege o. Asogo welat, at Kristus orogole ʼbakʼbage yerisoma nenil yetholuk e, at Allah erliktogwi aʼge ano ebe asogo oluk pobi togu lemagoluk asogo dakharak nenebesi ai o.

⁷Nis wene disogo moʼgulentil noʼgumu, aphwami enil nontogulat, onogola en e, “Is enanni erlak. We, at Allah anni aʼbik hegi o,” oluk enak aʼge pobi togu lemagoluk, ik eʼbe ʼgwiang aʼge heliʼgogo ik naʼgogwi ʼgelaʼge, op aʼge ai nis maben aʼge nonogola pesimu oruak o.

⁸Aphwami en nis di eʼgin yu eʼgin taknonobogwi aʼge, nenebe modok wiagapnonobogwi erlakhwe welege o. Asogo taknonobogukhwe, noʼgosogo tu ʼgelaʼge, nenede nal ago aʼgeat de, nenede hwenik ago erlak o.

⁹Is aphwami pema en, wiagapnonobuogoluk togwi aʼgeat de, at Allah en nenematek nak uknenebasu erlak o. ʼGoʼbu watnonobogwiam erleʼgaksogo laga lege aʼgeat de, nenebe modok waraga lege erlak o.

¹⁰Asogo waraga lege erlak welege ai pam, at Yesus ebe warotluk elaluk agarik e, nis nonogola elaluk welago aʼge ai, enagat emagoluk, at werigisa ʼgelaʼge, nin hwedik nan hwedik nis watnonobuogoluk togukhwe delnenebiso ai o.

¹¹At Yesus warotluk elaluk agarik nis nenebe waraga lege aʼge yu nonogola elaluk welago ai enagat emagoluk, nis yogodak nenelaluk oruakhwe, at Yesus paget nin hwedik nan hwedik watnonobuogoluk togukhwe delnenebiso ai o.

¹²Aphwami en nis nenagap nak waremagoluk taknonobogwi ai pam, Allah en his henebe henelalugaphenebiso ai o.

¹³At Allah iak pam pelal wokho pogulat e, disogo egesa, “Nede at ebam heʼberik welat niak egi o,” [2] oluk egeimu pelal wokho pegesa hegitsogoat, nis ogo re, nenede at ebam heʼberik poluk wene moʼgulontogu lege ai o.

¹⁴Ye, asogo moʼgulontogulat e, nenede disogo opogu lege o. At Allah en e, nonue ʼgain Onuk Logo aʼge Yesus togolik elalugaptegei ai ʼgelaʼge, nis at emin hegitsogoat nenelalugapnonoboluk e, his heneminat Yesus eʼbek nenebei louwa oluk nenalugat o.

¹⁵Nis di eʼgin yu eʼgin ʼberlegat hogu lege ai re, his henebagerat o. Asogo hogu lege ai pam, at Allah ebabut op modok en aphwami logon edeabenebiselat, nin logon edeabenebiselat, enebe esanat edeabonoboluk delenebisoam e, enebe ʼberlek en, Allah hau worogwi ai pam, is nin logon en Allah erliktogwi o.

¹⁶Ai enat, nenede ʼbuk otluk ukpo erlakma enat, ningsogoat togu lege o. Nenagap oʼborl oʼgwe yu re, wiak agokhweat de, nonogolaʼgwe re, nin hwedik nan hwedik ʼgerapnenebasu modok oruak o.

¹⁷Nis yogodak, eʼgin-peʼgin taknonobogwi ai re, we lodu paget weiyat ʼgelaʼge o. Aʼgeat de, asogo taknonobogwi ai pam, pobuk erliktogwi aʼge otok modok welema aʼge modok loksogoat eiye omul o.

¹⁸Nis e, di aʼge yu aʼge nenil hogwi aʼge ai erlak ema aʼgeat de, nenil hogu lege erlak aʼge ai otok modok welema ai en e, nenil hogu lege aʼge ai paget nenede eberak erlakma en, we, nenil hogu lege erlak aʼge ai paget nenede eberak modok til laga lege o.