Read Silimo 2 Korintus 5 Bible Online

2 Korintus 5 - Silimo bible

2 Korintus 5

¹Aphwami onowi werik aʼge moluk osoam pobuk ʼget worogwi ʼgelaʼge, nis ʼgwiangma nenagap lodu paget welege aʼge yu, waromul holuk e, ʼbogorl pam nenebe nonotok modok wolomul aʼge aphwami eneʼgik en heloʼgogwi erlak aʼge Allah en nak heliʼgogo nonobouwa aʼge oruak o, oluk pobi togu lege o.

²Sum noʼgorlhogwiam enageʼgolom agai ʼgelaʼge, nenebe pobuk wolomul aʼge ano owan oruakhwe, nenagap yu erlak agoam e, weat welemano oluk, sum ogolaʼgwe ʼbuktak oruakhwe, oʼborl oʼgwe ʼbuktogwi ʼgelaʼge, nenagap yu oruakhwe re, nenebe ʼbogorl pam wolomul aʼge ai ʼbuktak nonobo aʼge oluk, ebam eberak modok welege ai en e, wiak welat, “Eige,” oluk opogu lege o.

⁴Nenebe lodu paget yu welat e, “Eige,” oluk nenebam eʼgin-peʼgin wiagat welege. Ai re, nenagap yu aʼge noʼgorlogo ukpoluk, weat wolom nenagai en ogu lege puk. We, yu oruakhwe re, pobuk nenebe nenelaluk modok wolomul aʼge ai ʼbuktak nonobouema re, nenagap waraga lege aʼge yu noburlal-hoburlal taknonobouwagoluk ogu lege o.

⁵At Allah enat pobuk asogo taknenebaigoluk degelogo nenebesirik, “Demat taknonobouwa,” oluk, di aʼge yu aʼge naduk naduk ʼgomuk noʼgwi ʼgelaʼge, Arogun woknentesimu nonogola oruak o.

⁶Asogo welat, pobuk op ema, oluk nenede se nak welege o. Aphwami o pobuk werikmu wolomogoluk o naduk werikmu welagai ʼgelaʼge, nenagap yu aʼge pam welat e, nonue ʼgain Onuk Logo aʼge owi pam nenemin wolomulmu ai walegat welege o, oluk nenaluk o.

⁷Nis e, nenil hogu lege aʼge yema pam nenede eberak poluk welege puk. We, nenede at Yesus ebam heʼberik poluk welege o.

⁸Ai enat nenede se welege. Nenagap yu ʼgoboksogo ukpoluk, nonue ʼgain Onuk Logo aʼge oruakma ʼgoluk emin wolom nenagai o, oluk opogu lege.

⁹At Kristus en nis ʼberlegat nenagap yu pam welat togu lomul aʼge loʼbok nenemdema wokho wene nenebam pasulat, noʼgorliselat, tagalat, op togwi aʼge holuk, “Op o,” eselat, ye, wiak togwi aʼge holuk, “Wiak o,” eselat, hegitsogoat moʼgulnontouwa. Asogo moʼgulnontouwa ai en e, nis o yema ap ʼbok ʼgelaʼge welat emin, pobuk at owi pam ʼgoluk emin, nenede hwedik, at ogola opsogo nak togulom nenagai en togu lege ai o.

¹¹Ai en e, nonue ʼgain Onuk Logo aʼgeat nonogorloksogo wolom oluk pobirak pogulat e, aphwami en wene ai pobi tuagoluk enede ʼgagalogo moʼgulentil noʼgu lege. Nis nenebabut togu lege ai re, at Allah ilem selak ai ʼgelaʼge, his henede en nis pobi nonobogulom oluk epasu legi o.

¹²Ai re, his en nis erliknonobuagoluk nonuʼgwarek en nonomot wogu lege erlak o. We, is aphwami muon enede paget e, erlikhorlo erlakma en, enagap oʼborl oʼgwe aʼge paget erlikhorlogukhweat de, his en oʼgo nis nonobok op o, ogulat nonomot wagup en oluk moʼgulhentegis ai o.

¹³Is aphwami enil en yetnontogwiam, nis nenede ʼbelak aʼge ʼgelaʼge welege holuk e, ai Allah pagerat o. Aʼge re, nenebabut heberlak aʼge ʼgelaʼge welege holuk e, his henebagerat o.

¹⁴At Kristus nis nenebe edeapnenebiso ai en tennentarok welago yo. At emategat nis ʼberlek nenebaget waraga ai o. Holuk e, nis ʼberlegat waregeat o, oluk pobi togu lege.

¹⁵Nis ʼberlek nenebaget waraga ai re, nis nenebe nonuʼgwarek paget nenelaluk welemagoluk waraga puk. We, nis nenebe at ebaget welemagoluk, at ebe nis nenebaget waragarik en togolik elaluk aga ai o.

¹⁶Ai en e, nis en hwerli yogodak ya hwerli en e, aphwami en enebabut ʼbalogwi ʼgelaʼge, is aphwami logon enebabut asogo ʼbalogu lege erlak o. Ye, naduk e, Kristus ebabut asogo ʼbalige ʼgelaʼge, pobuk asogo ʼbalogu lege erlak o.

¹⁷Aphwami enebe Kristus emin hwedik oruak holuk e, enebabut ʼget aʼge tagenebesimu oruak o. Naduk aʼge erlak aga. Pobuk ʼget aʼge aga o.

¹⁸Aʼge re, di aʼge yu aʼge ai ʼberlegat at Allah enat tago yo. At enat Kristus tegei ai pam, Allah uʼgwarek emin laʼbulik nenebesi o. Asogo nenebesirik e, aphwami logon at emin togolik laʼbulik enebaigoluk wene ai nis en moʼgulontouwagoluk nis nenebam pesi.

¹⁹Wene nenebam pesi ai ebe re, disogo. At Kristus ebe ʼburl heisogo welat tegei ai pam, Allah en di aphwami yu aphwami ʼberlegat at uʼgwarek emin laʼbulogo nenebesi. At en asogo nenebasulat, nis aphwami en wiak togwi aʼge wene nenebam po erlakma en erlagapsogo ukpesi ai o. At en asogo tegei aʼge wene ai nis en moʼgulentil noʼgu lemagoluk nenebam pesi.

²⁰Nis e, Kristus enat, yoʼgo nonoboluk peraknonobou wagama wegerik e, Allah en wene moʼgulhonto ʼgelaʼge, henesaʼgo worogu lege ai o. Asogo worogulat, “At Allah en pobuk togolik laʼbulik honobouwak en e, at emin laʼbulit o,” oluk Kristus onuk ʼbalogo neniak sakhosogo moʼgulhontogu lege o.

²¹Nis Kristus emin hwedik tige holuk e, at Allah en uʼgwarek emin togolik laʼbulogo nenebaigoluk, nis nenebagerat nis nenebabut wiak togu lege aʼge ai, at Kristus wiak tu erlak aʼge, ebam pesi ai o.