Read Silimo 2 Korintus 6 Bible Online

2 Korintus 6 - Silimo bible

2 Korintus 6

¹At Allah en e, disogo egeimu pelal wokho pegesema oruak, “An en e, his heniak nesaʼgo holu epegirikmuat holegis o. Henebe delhonobu hegitsogoat lethentau wegi o,” [3] oluk egei ai re, Allah en neniak esaʼgo holu re, o yogodak yayat o. Ye, nenebe delnonobu re, o yogodak yayat o, oluk henede eberit o. Holuk e, nis Allah emin at ebaget togulat e, at ebabut op en edeaphenebesimu, at ebe wegep ano, we ʼburl almerak pagup o, oluk henesaʼgo worogu lege ai o.

³Aphwami logon en e, “His Allah paget yabuk togu legep ai dagan togu legep o,” oluk nonobok wiak ʼbaluano oluk e, aphwami logon wiak tuagoluk enede ʼgagalogo di bele yu bele togu lege erlak o.

⁴Aphwami en e, “Is Allah en yoʼgo enebesimu, at ebaget togulom aʼgeat togwi o,” oluk pobirak nonobuagoluk e, eʼgin-peʼgin taknonobogulat, wik-wiak taknonobogulat, noʼgosogo tul, oluk nenede hwenigap nonobogulat, togukhwe, nenepe mosogo welat di aʼge yu aʼge enagat togu lege.

⁵ʼGoʼbu watnonobogulat, neneʼgik herle wusogo o herle wusogo onobogumu ebano nonobogulat, aphwami esan en nenebam orlumamit til til watnonobu aʼge horok agalat, togukhwe welege o. Yabuk set aʼbik togulat, nogou aʼge erlak agalat, soʼboru nele agalat, togulat togu lege o.

⁶Asogo hogularat de, nenebabut wiaksogo tu pukmu en degelak welat, op wene nenaluk welat, nenepe mosogo welat, nenebabut enago welat, togu lege o. At Allah Arogun nonogola welat aphwami enebe demat nenedesogo welege.

⁷Asogo welat, Allah anni pam dem wene moʼgulentil noʼgu lege o. Asogo moʼgulentil noʼgulat, aphwami en e, “Waʼgun segen neneʼgik ʼbiren urat welege o,” oluk ogwi ʼgelaʼge, nis Allah ogola agai aʼge togu lege ai, neneʼgik ʼbiren urat welege o.

⁸Is logon en erliknonobogulat, nonobok op ogulat, ogukhwe, is logon en wene yaknontogulat, nonobok wik-wiaksogo ʼbalogulat, togwi o. Wene demat moʼgulontogukhweat de, “Eniak eseiyat lalnonobogwi o,” oluk wene yaknontogwi o.

⁹Aphwami en nenebe eneperlak aʼge ʼgelaʼge, ʼberlek en enalugat welat, nenebe waremagoluk taknonobogwi aʼgeat de, nenelaluk welat, di obotut yu obotut taknonobogukhweat de, nenebe modok warom erlakma en nenelaluk welat, togu lege ai hemit o!

¹⁰Nonogola wiak welarat de, nonogola nenagai modok welege o. Di aʼge yu aʼge neneʼgikmu erlak aʼgeat de, aphwami esanat ebe aʼge enilmu oruak aʼge ʼgelaʼge emagoluk tagonobogu lege. Nenaʼge modok erlak aʼgeat de, ebe aʼge ʼberlegat eiye egerik welege.

¹¹Asogo welat e, his aphwami Korintus aʼge, narilak norokhwi o. An nogola wene mesik sebelu erlakma en modok ʼbaksogo nak moʼgulhentegis ani o. Ai holuk e, an his henebaget wene nogola hielak oruak o.

¹²Ye, nis en his henebaget e, nonogola asogo hielak welege aʼgeat de, his nak e, nis nenebaget his honogola eʼgin welegep o.

¹³Holuk e, his en togolik lagaksogo nis nenebaget honogola hielit o, oluk an nuʼgwarek neiyagai moʼgulonto ʼgelaʼge moʼgulhentegis ai o.

¹⁴His aphwami enede Allah pam heʼberik pogwi erlak aʼge ai, enemin hwedik togup no yo. Aphwami hegitsogo togwi aʼge emin, enesaʼgo werak erlak togwi aʼge emin, enemin hwedik wolom no? O dakharak aʼge ai emin, o hiktak aʼge ai emin, enemin mesikmu wolom no? Modok erlak o.

¹⁵At Kristus Iblis emin, enede mesigat wolom no? Ye, aphwami enede Allah pam heʼberik pogwi aʼge, is logon enede Allah pam heʼberik pogwi erlak aʼge hwedik wolom no? Modok erlak o.

¹⁶At Allah owi werik ai emin, dogwi asua ai emin, emin mesikmu laʼbulu no? At Allah elaluk modok welago aʼge ai owi werik e, nis nenebe yuat o. At en e, disogo egei, “Is onogola eba an nowi wusogo weleik o. Eneʼgerlak oʼgwe denaga leik o. Is enaik Allah anat weleik o. Ye, an neiyagai isat welema o,” [4] oluk egei ai en e,

¹⁷Nenaik ʼgain Onuk Logo aʼge ano enat, mesik disogo egei, “His henebe is aphwami logon eneʼgerlak oʼgwe welegep ai ugonoboluk e, his nak enakho liplau manis o. Liplau wagaiam e, an en wokhenebikmu re, wiak aʼge ai pobuk heneʼgik tenhagup no yo. [5]

¹⁸An his henaigat weleik o. Ye, his an neiyagaiat wolorogup ani o, oluk nenaik ʼgain Onuk Logo aʼge di aʼge yu aʼge tu nak aʼge ano en egeimu o,” [6] oluk pelal wokho pegesa.