Read Silimo 2 Korintus 7 Bible Online

2 Korintus 7 - Silimo bible

2 Korintus 7

¹Holuk e, narilak norokhwi. Henebe nede o. At Allah en asogo wolomul ani, oluk obok moʼgulnentesi ai en, nenebe en, nenede en, wiak togu lege aʼge ai, opsogo hosogo ukpouwok o. Asogo ukpoluk, Allah ebe nonogorloksogo welat e, nenebe at ebaget poluk wolomogoluk, nenede ʼgaroksogo hurleap pogu lomok o.

²Nis nenebaget e, his en nenebe woknonobu ʼgelaʼge henede hwedik wolomup o. Nis en e, his mesik wiagaphonobogulat, almerakhonobogulat, lalhonobogulat, tige erlak o.

³An en naduk moʼgulhentasulat e, “His e, henebe nenede hwedik welegep o. Holuk e, nenemin waromma re, waromat o. Ye, nenemin nenelaluk wolomma re, wolomat o,” oluk asogo egi ai en e, yogodak, wene moʼgulhentegis ai, wene henebam paigoluk egi erlak o.

⁴An nede en e, his op togup ani, oluk e, nede haʼbuksogo welat honomot wasu modok welegi o. Asogo welat, is aphwami logon en wiagapnonobuogoluk eʼgin-peʼgin taknonobogukhweat de, an nede modok op agalat, loksogoat nagai hasulat, taga legi o.

⁵Nis o Makedonia yema wegerik oruakma re, nenebam haʼbuk u erlakmayat, wiagapnonobuogoluk di eʼgin yu eʼgin taknenebegesayat o. Aphwami logon en watnonobuogoluk togumu, nis nonogorlok agokhwe welege o.

⁶Oruakma re, at Allah ebabut e, aphwami en, “Noʼgosogo tul o,” oluk enede wiak otlukmu enede obabenebiso ano pam, at Titus perakpou wagama waga ano pam nede obapnebegei.

⁷At Titus ebe waga ai pam nak nede op aga puk. We, his en togwiam at ede op aga aʼge ai, moʼgulnosu waga ai pam, nede obaptegeiyat o. His en e, “At Paulus emin sarlok tolu e,” oluk nebam henede eberogulat, “Neneʼbigene en wiak tige o,” oluk honogola opogulat, is logon en an nobok ogwiam, henede pam enat an oruak oʼgwe agalat, tigep aʼge ai ʼbeliʼgogo moʼgulnosu agama re, nogola nagai aʼbik hegiat o.

⁸Asogo nogola nagai hegi aʼgeat de, an en suesiʼga naduk pelal wokho heneʼbek perakpou wegi ano en, “Onogola wiagabenebegis ai, mo u aʼge neʼbigenen perakpegi o,” oluk nede eberise legi erlak o. We, “Neʼbigenen mesik erligeat onogola wiagabenebegis o,” oluk nede epasu legirigat de,

⁹yogodak nogola nagai hasu legi o. His honogola wiak aga ai en nogola nagai hasu legi puk. We, his honogola wiak aga ai pam en, his wiak tigep aʼge ukpoluk henebabut heberligep ai en, nogola nagai hegi o. His honogola wiak egep ai re, at Allah ede agai epesi pamat wiak aga o. Holuk e, nis en wiagaphenebige oluk u mia o.

¹⁰Aphwami ʼgwiangma aʼge en enede ʼgagalogwiam, enede wiak otluk e, enebe waragai aʼgeat de, at Allah ede agai epasu ano pam onogola wiak agalotluk, wiak togwi aʼge ukpoluk enebabut heberlagaiam e, Allah en obabenebiso ai o. Obabenebisoam e, “An nogola wiak aga pam, neʼbigenen nebabut heberlegi o,” oluk pobuk wenemennei oborogwi erlak.

¹¹At Allah ede agai epasu ano pam honogola wiak agalat e, “Neʼbigenen wiak tegismu,” oluk henebabut heberlagarik e, op aʼge ningsogo togulat, wene henebam erlak hegitsogo togulat, honolot het agalat, honogorlok agalat, “Paulus emin sarlok tolu e,” oluk nebam henede eberogulat, honogola aganhansogo togulat, at wiak tegeitik oruak ai eʼgik ologun pam lebikpogulat, tigep ai hemit! Asogo togulat his wiak mesik tu erlakma en, wene henebam aʼge noʼgorlogo modok hwik hegep o.

¹²An en suesiʼga pelal wokho heneʼbek perakpou wegi aʼgeat de, at mesik wiak tegei ai en perakpou wegi puk. Ye, at wiak tegei ai pam is logon nal egesa aʼge ai paget perakpou wegi pugat o. Ai re, we, his honuʼgwarek honogola en e, “Nis Paulus lak nenedesogo is enebaget ningsogo tu ebele paget welege hegi o,” oluk Allah ilemat, honuʼgwarek henebabut ʼbalogup oluk perakpou wegi o.

¹³Asogo perakpou wegimu tigep ai en nis nonogola op aga. Ai paget nonogola op agayat. Ye, at Titus his ʼberlek en ebe wegeptik op togukhwe, ogola op aga aʼge ʼbeliʼgogo moʼgulnentasuam, nonogola nenagai modok hegeat o.

¹⁴An en nadugat Titus moʼguleselat e, “Is pobuk op tua o,” oluk honomot wasu legi ʼgelaʼge tigepma re, an neʼgerli egi erlak o. Nis en di wene yu wene demat nak moʼgulhentige ʼgelaʼge, at Titus moʼguleselat his honomot wege ai re, demat o.

¹⁵At en his henebe ede welaga aʼgeat de, ebe heneʼbek wagama re, honogorlok agalat, honuak lup ʼbo pogulat, togularat de, at ebe wegepma, at en wene moʼgulhentasuam, iak hologo tigep aʼge ano, henebam ede ebethasulat e, his ʼberlegat henebe modok edeaphenebasu o.

¹⁶Ye, an en e, “Is di aʼge yu aʼge op togu lema o,” oluk, nede haʼbuksogo welat nogola nagai hasu legi o.