Read Silimo 2 Korintus 8 Bible Online

2 Korintus 8 - Silimo bible

2 Korintus 8

¹Narilak norokhwi. At Allah ebabut op ano en eiyagai o Makedonia aʼge yema enebabut obabenebesimu tigisa aʼge henaluksogo moʼgulhentaik o.

²Is aphwami logon en eʼgin-peʼgin aʼbigat wiagabonobogukhweat de, is onogola enagai loksogo hogwi ai pam enebabut enak aga o. Is enaʼge modok erlak en enerlagaiksogo welat e, is enaʼge aʼbigat, lebeksogo is aphwami logon wogontogwi ai o.

³Wogonto hegitsogo wogontogulat mesik emin ebam louksogo wogontogwi. An enebabut naluk. Nil entegistik en moʼgulhentasu legi o. Is aphwami pema en enede ʼgagalak erlakma, onuʼgwarek enede en ʼgagalogo,

⁴disogo moʼgulnontogu legesa, “Nis en ogo re, Allah eiyagai o Yudea aʼge logon lerentuogoluk moʼgulheige o,” oluk nis moʼgulnontogwi modok welegesa.

⁵Nis nonogola en e, “Is disogo houwa o,” oluk epege aʼge oruakhwe, enebe naduk nonue ʼgain Onuk Logo aʼge wogegisarik en, at Allah ede epesi ʼgelaʼge, enebe nis woknentigisayat o.

⁶Woknentigisema re, at Titus his henemin welat, his en Allah eiyagai logon henede en lerontouwogoluk egep aʼge ai paget moʼgulhentasu laga ʼgelaʼge arat odoktuagoluk ede ʼgagalige.

⁷His e, di paget yu paget op modok togu legep. Ai re, henede Allah pam ningsogo heʼberik pogulat, op wene holuk opsogo moʼgulontogulat, dem wene opsogo henaluk agalat, aphwami logon lerontouwogoluk aʼgoluksogoat togulat, nis henedesogo modok welat, togu legep ai ʼgelaʼge, his enaʼge ogo is Allah eiyagai logon eba opsogo onobouwagoluk moʼgulhentegis o.

⁸An en, “His disogo tip o,” oluk, niak ningsogo moʼgulhentegis erlagat o. We, is Allah eiyagai o Makedonia yema aʼge en enede ʼgagalogo is aʼge odoksogo Allah eiyagai logon eba aʼgoluksogo lerontogwi ai ʼgelaʼge, his en ogo re, is ai henedesogo lerontogwiam, “Demat is enede oruak o,” oluk enagat emagoluk moʼgulhentegis ai o.

⁹Nonue ʼgain Onuk Logo aʼge Yesus Kristus ebabut op en edeapnenebegei ano his henaluk modok epegi o. At e, ebe Allah en aʼge welat e, ilmu oruak aʼge welaga aʼgeat de, at erlagaik aga ai pam, his ebe aʼge henilmu aʼbik emagoluk, at ebe nis aphwami aʼge agarik erlagaik aga ai o.

¹⁰Leronto ai paget, an nede epasu legi aʼge moʼgulhentaik o. Tahun naduk ano pam e, aphwami pema owan oruakhwe, his en naduk, “Is ai lerontouwok o,” oluk wene ʼbaligeptik henebit welat leronto erlakma en, we, aʼgoluksogoat lerontouwogoluk logon enebegep ai ʼgelaʼge, yogodak ologun ʼgoboksogo logon lerentagup en moʼgulhentegis o.

¹¹His en naduk aʼgoluksogo is pema eba henedeabenebigeptik, “Disogo lerontouwok o,” oluk egep ai ʼgelaʼge, yogodak asogoat heneʼgigem ema aʼge loʼbok aʼgoluksogoat ologun ʼgoboksogo odoktogup en moʼgulhentegis o.

¹²His henaʼge erlak e, puk. At e, henaʼge oruak aʼge henede enat is ai enebagup holuk e, at Allah en, “Obat pegesa o,” oluk ede opouwa o.

¹³His en nak e, eʼginsogo lerontogwiam, is enede sesogo ʼgelaʼge weat wouwagoluk moʼgulhentegis erlak o. We, henemin hegitsogoat let-let togu lemagoluk moʼgulhentegis o.

¹⁴His en aʼge yogodak aʼbik oruakma re, is erlak oruak aʼge eba onobo yo. Is en aʼge pobuk aʼbik emarik e, his henaʼge erlak aʼge holuk logon honoboat ani o. Asogo togup holuk, his en lerontogulat, is en lethontogulat, henemin hegitsogo togu lorogup ani o.

¹⁵Asogo togulom ai paget, Allah en e, disogo egei, “At mesik aʼge aʼbik odoksogo pagathorlouwa aʼge ai re, dedilogo pouwa erlak o. Ye, at mesik en aʼge weiyat odoksogo pagathorlouwa aʼge ai erlak ema erlagat o,” [7] oluk egeimu pelal wokho pegesa.

¹⁶Nis en his henebaget ningsogo tuogoluk togu lege ʼgelaʼge, at Titus asogoat taga lemagoluk Allah en ede ʼgagalegeimu tago ai en, Allah hau worogu lomok o.

¹⁷Ai re, nis enat at ede ʼgagalige aʼgeat de, nis en, “Hat lak o,” oluk neniak ningsogo moʼguligema waga puk. We, at uʼgwarek ede en ʼgagalegeitik e, modok ningsogo ede henebam welat e, “Is eneʼbek laik,” oluk heneʼbek waga ai o.

¹⁸Nenare mesik op wene moʼgulentil denagokhwe re, is Allah eiyagai o di owi yu owi en e, “At ebabut op o,” oluk erliktogwi aʼge, at Titus eʼbirek onobou wegi ai o.

¹⁹Ye, ai nak e, puk. Is Allah eiyagai en is ai lerontouwogoluk enebegesa aʼge ai, at ai emin en odoksogo poluk wogentai louwagoluk edikpegesayat o. Asogo wogentai lagaimu, nonue ʼgain Onuk Logo aʼge erliktogulat, “Is Paulus lak enebabut e, is logon leronto aʼge elit oruak o,” oluk enagat ema ai o.

²⁰Aʼbigat onobogwi aʼge ai, nis en odoksogo wil lagaimu, is aphwami logon en nonobok wiak ʼbaluano oluk e, nenede opolugat togu lege o.

²¹Asogo togulat e, nonue ʼgain Onuk Logo aʼge il pam nak e, nenebabut hegitsogo togu lomogoluk togu lege erlak. At e, nonue ʼgain Onuk Logo aʼge emin, aphwami emin, enilem nenebabut hegitsogo togu lomogoluk opogu lege o.

²²Is eria eneminsogo, nenare mesik perakpou wegiat o. At ai re, di paget yu paget nin hwedik nan hwedik aphwami logon aʼgoluksogo lerentasukhwe ebabut enak aʼge ʼbaligerik e, heneʼbek perakpou wegi ai o. At en e, “Is op tua o,” oluk ede henebam pesirikmu no oluk e, yogodak his lethentaiogoluk ede modok aganhansogoat waga ai o.

²³Ye, at Titus ai re, an nare his lethontouwogoluk neʼbirek yabuk togu lege aʼge o. Ye, nenarilak logon at emin wegesa eba re, op nak togukhwe is aphwami logon en enebabut ʼbelakpoluk Kristus erliktogwi aʼge, Allah eiyagai en yoʼgo onoboluk peragonobou wegesema wegesa ai o.

²⁴Allah eiyagai logon en e, “Is o Korintus aʼge en is Titus lak enebe demat enede hwedik oruak o,” oluk ogulat, ye, “Is Paulus lak en is o Korintus aʼge op tua o, oluk onomot wogwi ano re, demat o,” oluk ogulat, uagoluk, is ai henedesogo wogenebip o.