Read Silimo Galatia 1 Bible Online

Galatia 1 - Silimo bible

Galatia 1

¹His Allah eiyagai o Galatia odoktugu legep aʼge narilak norokhwi. An Paulus en narilak norokhwi Allah eiyagai ado pema o yema nenemin welege aʼge enebe ʼberlegat nenemin en wene yu pelal wokho heneʼbek perakpou wege ai o. An yoʼgo noboluk peraknobou wagama wegi ai re, edip aphwami en puk. Ap mesik wene ebam wusogo poluk peraknobou waga pugat o. We, at Yesus Kristus ebe waragama aik Allah en elalugap pesi aʼge ano emin enat yoʼgo noboluk peraknobou wegesema wegi ai o.

³Nenaik Allah emin, nonue ʼgain Onuk Logo aʼge Yesus Kristus emin, eʼbirek enebabut op ano en op aʼge wokhontogulat, henede haʼbuksogo tenhentarok welat, togu lemak o.

⁴Nis wiak togu lege ai en nenaik Allah ede en e, “Disogo tuak o,” oluk ede epesi ano pam, at Yesus Kristus en nis aphwami ʼgwiangma aʼge delnenebiogoluk, ede enat nis nenebabut wiak modok togu lege aʼge ai wene at uʼgwarek en ebam poluk waraga ai o.

⁵Ai en e, at Allah at erliktogwi modok wolomok o. Asogo egi ai, “Demat emak o,” oluk u ʼgelaʼge re, “Amin,” egi ai o.

⁶At Allah en e, his Kristus ebabut op aʼge ano emin hwedik welemagoluk yoʼgo henebesi aʼgeat de, ukpoluk perleneat ʼgwi-ʼgwani op wene oluk mu aʼge ebam ebesi laga legep ai, an nogorlok ago yo.

⁷Ebe re, wene op wene mu aʼge mesik welago erlagat o. Aʼgeat de, is aphwami logon en op wene Kristus en tegei wene ai aʼge mu aʼge ebelesogo takpoluk lalhonobuogoluk moʼgulhontogwi ai enat egi o.

⁸Aʼge re, ap sa en, is ap ai en de a? Nis en de a, malaikat ʼbogorl pam aʼge en de a, op wene nis en moʼgulhentige aʼge ai, ukpoluk mu aʼge moʼgulhontogwi holuk e, Allah en heman onobouwagat o.

⁹Ai re, wene pageat moʼgulhentegis aʼge, pobuk mesik togolik moʼgulhentaik o. Aphwami salak en wene his wegep aʼge ano ukpoluk mu aʼge moʼgulhentau wagai holuk e, Allah en heman onobouwagat o.

¹⁰An niak egi ai re, aphwami en, “Hat op egen,” oluk moʼgulnemagoluk ese legi a? At e, Allah en, “Hat op egen,” oluk, moʼgulnemagoluk ese legi a. Aphwami onogola opsogo ese legi holuk e, an nebe Kristus eragam aʼge u re, miayat o. Aʼge re, an Allah ogola opsogo ese legi o.

¹¹Narilak norokhwi. An en op wene moʼgulentil nese legi ai re, aphwami eniak aʼge moʼgulentil denaga legi erlak ai, his henaluk omat o.

¹²Wene ai, aphwami en woknogulat, moʼgulnogulat, tigisema wegi puk. We, wene ai, at Yesus Kristus ogola hisogo welaga aʼge, at enat ʼbaksogo moʼgulnesimu wegi o.

¹³An naduk nis Yahudi aʼge nonowene ningsogo tenak welat, aphwami Allah eiyagai aʼge di obotut yu obotut tagenebasulat, enebe modok erlagabenebaigoluk ningsogo tagalat, taga legi aʼge ano, nobok his henesaʼgo hologu legebat ani o.

¹⁴Wene nis Yahudi aʼge neneʼbalak en moʼgulnentigisa aʼge ano tenak welat e, is an narilak nemin hegit aʼge en wene onogola seramsogo togukhweat de, an nak e, nede ningsogoat taga legi ani o.

¹⁵Asogo aʼgeat de, Allah ebabut op ano en pageat nia ogola en owan daknobu erlak oruakhwe re, nebe poliknebesi o.

¹⁶Poliknebesirik e, op wene omlogo Yesus tegei wene ano aphwami oʼborl oʼgwe aʼge moʼgulentil denaga lemagoluk omlogo ebe norogolema inlau wagama re, wene aphwami logon enebam hin wokho erlagat o.

¹⁷Ye, is logon Yesus en yoʼgo onoboluk peragenebesi aʼge ebano, o Yerusalem oruakma eneʼbek ligom erlagat o. Aʼgeat de, o aphwami Arab aʼge onowi pam etleba ligegirik e, pobuk togolik o Damsyik wegi o.

¹⁸Wegirik e, mo ligom ʼbugom osokhwe 3 tahun welegirik e, pobuk Petrus ano ebe naluksogo oluk, eʼbek o Yerusalem ligegi. Ligegirik e, at owi pam agauwa 15 eʼbirek eba welege.

¹⁹Welat, is Yesus en yoʼgo onoboluk peragenebesi aʼge ebano enebe pema enemin sarlok tu erlak. We, nonue ʼgain Onuk Logo aʼge ot Yakobus ano nak eʼbirek sarlok tige o.

²⁰Wene an en pelal wokho heneʼbek perakpou wegi ai re, Allah il pam demat egi o. Niak esei egi erlak o.

²¹Eba welegirik e, pobuk o Siria emin, Kilikia emin, wegi ai o.

²²Ai erlige re, is Allah eiyagai Kristus emin hwedik welat, o Yudea odoktugu legesa aʼge en e, an nebe eneperlak welegesa.

²³Asogo nebe eneperlak welat e, we is aphwami logon en nobok nak disogo ogwiam enesaʼgo hologu legesa, “Ap naduk nis di obotut yu obotut taknenebasulat, op wene erlagap paigoluk tagalat, taga laga aʼge ano, yogodak aphwami op wene ano demat oluk wouwagoluk moʼgulentil denago yo,” oluk ogukhwe nobok enesaʼgo hologu legesa.

²⁴Asogo hologulat, an nebaget e, Allah erliktogu legesa.