Read Silimo Galatia 2 Bible Online

Galatia 2 - Silimo bible

Galatia 2

¹Asogo tigisema, mo ligom ʼbugom osokhwe 14 tahun welagarik en pobuk Barnabas eʼbirek en at Titus ebe woluk e, o Yerusalem lege.

²Asogo lege ai re, Allah en, “Hat o Yerusalem at ligom o,” oluk nede ʼgagalegei ai en ligegirik e, op wene ai is aphwami oʼborl oʼgwe aʼge moʼgulentil nese legi ai, “Wene ebe disogo yo,” oluk seʼgeksogo moʼgulentaigoluk e, an page emin, yogodak ya emin, ningsogo taga legi aʼge ai, we ʼburl almasogo emano oluk, is onuelak ʼgain aʼge enebe enematekma onoboluk e, moʼgulentegis o.

³At Titus ai re, ebe Yunani aʼge nenemin lege aʼgeat de, is onuelak ʼgain ebano en, “Hagap heʼgerlimu aʼge ʼbalu o,” oluk ningsogo moʼgulom erlak.

⁴Asogo aʼgeat de, is logon mu aʼge re, nenarilak Allah eiyagai aʼge ʼgelaʼge takpoluk hisakho ʼgwigisarik e, agap eʼgerlimu aʼge ʼbaluagoluk tigisayat. Asogo hisakho ʼgwigisarik e, nis Kristus emin mesigat otluk nenematekma welat nenebabut togu lege aʼge ai, is en e, “Edip noʼgosogo agama en togwi o,” oluk edip heratuogoluk ling-long ʼgu egesa ai o. Asogo hwi-hwiak eneragamma onoboluk e, is togwi aʼge ai togu lemagoluk enil nenta ʼgu egesa ai o.

⁵Aʼge re, wene op wene ai his henebaget opsogo erlele wokho tenhentarok wolomogoluk, is en asogo ogwiam, nis en is eniak hwelakpoluk agauwa mesigat pam nak ogo, “I o,” oluk, u erlak.

⁶Is logon onogola en e, “Ononuk oruak aʼge re, is eriayat o,” ogwi aʼge ai en wene an moʼgulentil nese legi aʼge ano pobuk muat moʼgulentil nese lemagoluk moʼgulnum erlagat o. Allah en aphwami enagap nak il ontoluk e, “Yu wiak. Yu op,” oluk oso erlak ai en, an is enebaget nadugat ononuk oruak welegesa aʼge de a? Erlak aʼge de a, oluk wenemennei eberise legi erlak ai o.

⁷At Allah en, at Petrus en aphwami Yahudi enagap eneʼgerlimu aʼge ʼbelak aʼge eneʼbek elirat louwagoluk yoʼgo poluk perakpasulat, ye, an e, aphwami oʼborl oʼgwe aʼge eneʼbek elit louwagoluk yoʼgo noboluk peraknebasulat, tegei ai en e, is ap ononuk oruak ai enede en e, “Allah en, at Petrus en op wene nis aphwami nenagap neneʼgerlimu aʼge ʼbelak aʼge moʼgulontouwagoluk yoʼgo pesi ʼgelaʼge, at Paulus en op wene is aphwami enagap eneʼgerlimu aʼge asogo ʼbelak erlak aʼge moʼgulontouwagoluk yoʼgo pesimu hege o,” oluk enak aʼge pobirak nenebegesa ai o.

⁹Asogo pobirak nenebegesarik e, is Yakobus emin, Petrus emin, Yohanes emin, Allah eiyagai en e, “Nis nonuelak e, is oruak o,” oluk ogwi aʼge en e, “His en e, wene aphwami oʼborl oʼgwe aʼge moʼgulentil lit o. Ye, nis en e, aphwami enagap eneʼgerlimu aʼge ʼbelak aʼge paget moʼgulentil lul o. Nenemin hwedigat togu lomok o,” oluk e, Barnabas eʼbirek neneʼgik ten-ten hau watnene bigisa.

¹⁰Hau watnenebigisarik e, nenesaʼgo wusogo ʼgelaʼge wene disogo nak moʼgulnentigisa, “Aphwami nis aʼge logon enerlagaik aʼge yema enebam eberak welat, lerontogu lomup o,” oluk, moʼgulnentigisa ai, an en asogo nogola nagai hasulat taga legi aʼgeat de, moʼgulnentigisa ai o.

¹¹Aʼge re, at Petrus o Antiokhia wagarik dagan taga lagama, an en e, “Hat taga legen ai wiak o,” oluk, ʼbaksogoat wene yagegis o.

¹²Ai re, disogo taga lagama wene yagegis. Naduk at Yakobus en osi peragonobou waga aʼge owan wom erlak oruakhwe, at Petrus ano is aphwami oʼborl oʼgwe aʼge enemin soʼboru laʼbulogo noʼgu legesa. Aʼge re, is wegesa ʼgal e, at Petrus ogola en e, “Nis nenagap neneʼgerlimu aʼge ʼbelak aʼge logon en noʼgosogo moʼgulnema o,” oluk, ogorlok en, is enemin soʼboru no erlakma en, mo oluk heksogo lebaga ai o.

¹³At iak ʼbiren welat heksogo lebaga ʼgal, is aphwami Yahudi aʼge ado pema enebe ʼberlegat enemin lebagalat e, at Barnabas ano ede ʼgagalogo pobuk is eniak ʼbiren aʼge ai loʼbok egesarik e, libagayat o.

¹⁴Asogo lebegesema re, an nede en e, “Wene demat, op wene yu aʼgeat de, is enebabut e, op wene moʼgulontogulat tu aʼge togwi erlak hegi o,” oluk, aphwami ʼberlegat enilem Petrus wene disogo oluk moʼgulegis o, “Hat hebe Yahudi aʼgeat de, aphwami Yahudi aʼge en togwi ʼgelaʼge taga legen erlak, aphwami oʼborl oʼgwe aʼge en togwi ʼgelaʼge tagalarat de, is oʼborl oʼgwe aʼge moʼgulentasulat e, His henebabut Yahudi aʼge en togwi ʼgelaʼge, enebabut wokho togu lomup, oluk ningsogo moʼgulentasu legen ai nopaget o,” oluk, ʼbaksogo wene yagesi.

¹⁵Nis nenebe Yahudi aʼgeat dagege. Is oʼborl oʼgwe aʼge wiak togwi aʼge ai ʼgelaʼge dagege puk.

¹⁶Aʼge re, aphwami wene Allah en nenesaʼgo weregei wene ano hegitsogo togwiam e, Allah en wene enebam aʼge noʼgorlogo wokholuk enemin pobuk togolik hwedik tagenebasu erlak o. We, enede Yesus Kristus ebam heʼberik pogwiam nak, hwedik tagenebasu ano re, henalugat o. Wene ai paget, Allah iak pam pelal disogo wogo oruak, “Aphwami logon hegitsogo togwiam, wene enebam aʼge noʼgorlogo wokholuk, enemin pobuk togolik hwedik tagenebasu erlak o,” oluk pelal wokho pegesa ai en, nis en wene Allah en nenesaʼgo weregei aʼge ano hegitsogo togwiam puk. We, nenede Kristus ebam heʼberik pogwiam wene nenebam aʼge noʼgorlogo wokholuk, at emin togolik hwedik taknonobouwagoluk, nenede Kristus Yesus ebam heʼberik pege ai o.

¹⁷Nis Kristus emin hwedik takpogwiam, Allah en wene nenebam aʼge nogorlogo wokholuk, emin pobuk togolik hwedik taknonobouwagoluk, nenannisogo walhogulat e, nenebabut aphwami oʼborl oʼgwe aʼge enebabut togwi ʼgelaʼge enemin hegirat welege, oluk enagat ago ai en, nis wiak togu lege aʼge ai, edip at Kristus at o, oluk u no? Modok erlak o.

¹⁸O moluktak poluk pobuk worogwi ʼgelaʼge, an en nis aphwami Yahudi togwi aʼge arat ukpegi aʼge pobuk tagallema re, Allah iak ukpoluk sagalogo taga legi aʼge oluk enagat elep o.

¹⁹Aʼge re, wene Allah en nenesaʼgo weregei aʼge ai en nebe werak aʼge ʼgelaʼge taknebesimu re, an nebe nelaluk welat Allah paget taga leigoluk, wene ai paget nebe werak aʼge ʼgelaʼge welegi o. Ai re, Kristus ebe e pam edikpoluk werigisa ai eminat watnenebigisa o.

²⁰Ye, yogodak nebe nelaluk welegi yu re, nuʼgwarek nanni pam welegi puk. We, at Kristus at nogola welat elaluk welago yo. At ebe Allah omlogoat welat, nebe ede en an nebagerat, “Watnobuak,” oluk epesi ano pam ebe waraga ai o. Ye, an nede at ebam heʼberik oruakma re, at ebe nogola oruak en e, nelaluk welegi ai o.

²¹Allah ebabut op en obapnenebiso wene ai an en sagalogo ukpasu legi erlak o. Wene Allah en nenesaʼgo weregei aʼge ano pam, wene nenebam aʼge noʼgorlogo wokholuk emin togolik hwedik taknenebelepma re, Kristus waraga ai we ʼburlat almasogo warelep o.