Read Silimo Galatia 3 Bible Online

Galatia 3 - Silimo bible

Galatia 3

¹His aphwami o Galatia aʼge henede erlak togu legep ai re! At Yesus Kristus ebe e pam edikpoluk werigisa wene ano henil pamat seʼgeksogo moʼgulhentige aʼgeat de, wene pobuk sa en henede ʼgagalegeimu asogo togu legep.

²Wene Allah en nenesaʼgo weregei wene ano hegitsogo togu legep ano pam Allah Arogun wokhentesi a? At e, nis en op wene moʼgulhentigema hweligeptik e, “Demat o,” oluk henede Kristus ebam heʼberigep ano pam wokhentesi a. Wene mesigat ai nak moʼgulnemis da.

³Yabuk naduk tenak pogwi ʼgelaʼge, Allah Arogun pam tenak pegep aʼgeat de, yogodak ya henede modok erlak agarik honuʼgwarek henanni pam ʼgaroksogo togu lorogup no? Mia o.

⁴Allah en ʼberlegat asogo takhenebasukhwe hegep aʼge ai, we ʼburlat almarom no? Mia o.

⁵Holuk e, noʼgosogo ul. His en wene Allah en nenesaʼgo weregei wene ano hegitsogo togu legep pam, at Arogun loksogo wokhentasulat, elalin tu puk aʼge takhenebasulat, tago no a? At e, nis en op wene moʼgulhentigema hweligeptik, demat oluk, henede Kristus ebam heʼberik pegep ai pam wokhentasu no a.

⁶Wene ai ʼgelaʼge, at Abraham ede Allah pam heʼberik pesimu re, at Allah en e, “Hat hebabut hegitsogo tagalom ʼgelaʼge, hede nebam heʼberik pegenma, wene hebam aʼge noʼgorlogo wokhegirik nemin togolik hwedik takhebegi aiat o,” [1] oluk moʼgulesi.

⁷Ai enat, his honogola en e, Abraham eiyagai demat aʼge re, is aphwami enede Allah pam heʼberik poluk welagai aʼge aiat o, oluk, pobi tu o.

⁸Nadugat wene ebe asogo owan om erlak oruakhwe, is aphwami oʼborl oʼgwe aʼge enede Allah ebam heʼberik pogwiam, at en e, “Wene henebam aʼge noʼgorlogo wokholuk pobuk nemin togolik hwedik takhenebaik o,” oluk, wene op wene owan moʼgulonto erlak welat, Abraham naduk wene obok disogo oluk moʼgulesi, “Di aphwami yu aphwami ʼberlegat an en obabenebik ai, edip harat o,” [2] oluk egeimu, pelal wokho pegesa.

⁹Abraham ede Allah ebam heʼberik pesimu, at en obap pesi ʼgelaʼge, is aphwami logon enede Allah ebam heʼberik pogwi aʼge emin hegitsogoat obabenebisoat o.

¹⁰Ye, Allah en disogo egeimu pelal wokho pegesa, “Wene an en enesaʼgo weregismu pelal wogo oruak aʼge ai ʼberlegat aphwami enesaʼgo holuarik e, hegitsogo togwi erlak holuk, enebe loʼbok heman enebaik aʼge oruak o,” [3] oluk egeimu, pelal wokho pegesa ʼgelaʼge, is aphwami logon en wene Allah en nenesaʼgo weregei aʼge ano hegitsogo tuogoluk, enede ai pam heʼberik poluk welagai aʼge, Allah en heman onobouwa aʼge oruagat o.

¹¹Allah en e, “Henede an nebam heʼberik wolorogup ai pam, an en wene henebam aʼge noʼgorlogo wokholuk pobuk emin togolik hwedik takhenebaikmu henelaluk modok wolorogup ani o,” [4] oluk, egeimu pelal wokho pegesa ai en, wene Allah en nenesaʼgo weregei aʼge ai pam nis ʼberlegat wene nenebam aʼge noʼgorlogo wokholuk pobuk emin hwedik taknonobo erlagat o, oluk, enagat aga.

¹²Aphwami en, wene Allah en nenesaʼgo weregei wene ano tenak welagai ai, edip paget e, pelal disogo wogo oruak, “Wene ai hwelak welat, hegitsogo togu lorogup aʼge henebe loʼbok, wene ai pam henelaluk modok wolorogup o,” [5] oluk egeimu, pelal wokho pegesa ai o. Ai en e, enede Allah pam heʼberik pogwi ai, muat o.

¹³Allah iak pam pelal wokho pogulat e, disogo egesa, “Enebe e pam edigonoboluk waronobumu, is enebe warema aʼge ai, Allah en heman onobouwa aʼge oruak o,” [6] oluk, pelal wokho pegesa ʼgelaʼgeat, wene Allah en nenesaʼgo weregei wene ai pam e, heman nonobo hegitsogoat oruakma, at Kristus en nonoʼgo ʼbalogo delnenebigoluk wene nis nenebam aʼge noʼgorlogo at ebam pagathwerlesi ai o.

¹⁴At Allah en e, Abraham obap pesi ai ʼgelaʼge di aphwami yu aphwami ʼberlegat Kristus Yesus emin hwedik takpogwiam obabonobuagoluk, Yesus waraga ai o. At asogo waraga ano pam en, Allah Arogun wokhentaigoluk obok naduk moʼgulnentesi ano, nenede at ebam heʼberik pogwiam woknentasu ai o.

¹⁵Narilak norokhwi. Nis aphwami togu lege aʼge mesik ebam elitsogo moʼgulhentaik. Aphwami enebe ʼbiren en, “Disogo tuok o,” oluk hoʼbuk ʼbalogo ogwi holuk, is logon en eniak mennogulat, wene mu aʼge de, logon ebam loʼbok tugulat, togwi modok erlak o.

¹⁶Wene ai ʼgelaʼge re, at Allah en Abraham moʼguleselat e, “Hat disogo wokheselat, ye, an en hat en dogoʼgwe aʼge mesik disogo wogeselat, tik o,” [7] oluk, obok moʼgulesi ai o. Enebe aʼbigat enebaget u ʼgelaʼge re, “Hat en dogoʼgwe aʼge logon disogo wogentaik o,” oluk, u erlak. We, ap ebe mesigat aʼge paget, “Hat en dogoʼgwe aʼge mesik disogo wogeik o,” oluk, obok moʼgulesi ai ebe re. Kristus paget egei yo.

¹⁷Wene ai disogo paget egi. Allah en e, “Disogo wokheik o,” oluk, obok ʼgaroksogo egeitik, 430 tahun welagarik en, wene pobuk nenesaʼgo weregei ano pam, wene naduk aʼge ai sagalogo ukpo erlak o.

¹⁸“Disogo wokheik o,” oluk, Abraham obok naduk moʼgulesi aʼge ai, at en wene Allah en nenesaʼgo weregei aʼge ano hegitsogo taga lagama wogetlipmu re, obok moʼgulesi aʼge ano, we oʼgo erlagat wogesi oluk elip erlak. Aʼge re, Allah ebabut op en Abraham obok moʼgulesi ai enat, ebe we oʼgo erlagat wogesi ai o.

¹⁹Holuk e, wene Allah en nenesaʼgo weregei ai nopaget. Ai re, nis aphwami wiagat togulat welege aʼge ai ʼbaguagoluk, pobuk nenesaʼgo weregei ai o. Aʼge re, wene ai Abraham en dogoʼgwe aʼge mesik wogeigoluk, obok moʼgulesi ano, ebe owan dagom erlak oruakhwe lodu paget wene nenesaʼgo weregei wene ano, malaikat en Musa moʼgulosoam at ebe ʼburl heirakma welat, aphwami moʼgulontouwagoluk e, malaikat yoʼgo onoboluk peragonobou waga ai o.

²⁰Aphwami ʼbiren meʼgisogo hwerli werak oruakma re, ap mesik ʼburl heisogo wolomat o. Asogo aʼgeat de, at Allah uʼgwarek en wene obok moʼgulnentasu ai en e, at en wene oʼgo erlak aʼge opnoʼgo nagat moʼgulnentasu ai o.

²¹Holuk e, wene Allah en Abraham ebam, “Wokheik o,” oluk, obok moʼgulesirik en, pobuk nenesaʼgo weregei ai re, aphwami logon enemin orlumamit togwi ʼgelaʼge ema u no? Modok erlak o. Wene nenesaʼgo weregei wene ano pam nenelalugapnenebiogoluk woknentelepma re, wene ai pamat wene nenebam aʼge noʼgorlogo wokholuk, Allah emin pobuk togolik hwedik taknenebelep ai o.

²²Allah iak pam pelal wokho pogulat e, “Aphwami henebe ʼberlegat wiak togu legep aʼge ai pam, heneʼgik herle werak ʼgelaʼge welegep o,” oluk, moʼgulnentesi ai, nis nenede Yesus Kristus pam heʼberik poma, Allah en obok egei aʼge ano re, nis nenede at ebam heʼberik pul aʼge woknentaigoluk egei ai o.

²³Nenede Kristus ebam heʼberik po hegit lailo erlak oruakhwe, pobuk wene ano selakma pouwa ai hegitsogo nenede at ebam heʼberik pouwagoluk, aphwami herle wusogo tenentarok welagai ʼgelaʼge, wene nenesaʼgo weregei aʼge ano en herle wusogo tennentarok welaga.

²⁴Nis nenede Yesus ebam heʼberik pogwiam, wene nenebam aʼge noʼgorlogo wokholuk, Allah emin pobuk togolik hwedik taknenebaiogoluk e, Kristus owan dagom erlak oruakhwe, wene nenesaʼgo weregei aʼge ano en tennentarok welemagoluk egei ai o.

²⁵Ai en, yogodak nenede Yesus ebam heʼberik po aʼge arat hegit lau wagarikmu no oluk e, wene nenesaʼgo weregei aʼge ai en pobuk tennentarok oruak erlak o.

²⁶His henede Kristus Yesus ebam heʼberik welegep ai en henebe ʼberlegat e, Allah eiyagai welegep ai o.

²⁷Ye, Kristus emin hwedik takpouwogoluk ik olomu ʼbigep aʼge henebe ʼberlegat, sum ʼbuktogwi ʼgelaʼge Kristus ebabut wegep ai o.

²⁸Wik-wok, pobuk en e, his ʼberlek e, Kristus Yesus emin hwedik welat henebe mesigat aʼge ʼgelaʼge welegep ai en e, his nin pema Yahudi aʼge, nin pema Yunani aʼge ogulat, nin pema eneragam aʼge, nin pema enematekma aʼge ogulat, ye, nin pema re, hwami, nin pema ap ogulat, ogulom puk o.

²⁹His henebe Kristus aʼge holuk e, henebe Abraham en dogoʼgwe aʼge welegep o. Holuk, Allah en Abraham obok moʼgulesi aʼge ano, his wokhonto re, hegirat o.