Read Silimo Galatia 4 Bible Online

Galatia 4 - Silimo bible

Galatia 4

¹Narilak norokhwi. Wene mesik yu moʼgulhentaik. Enaiklak waragaiam enemening di aʼge yu aʼge ʼberlegat e, eneiyagai eiye aʼgeat de, malik enebe owan enarlue agai erlak holuk e, ap mesik en eselat e, “Malik enebe enarlue agaiam en de, pobuk wogentaik o,” oluk e, eneragam aʼge oluk is enebe eneragam ʼgelaʼgeat welagai ai o.

²Asogo oruakma, enaiklak enebe enelaluk welat e, “Ai hwerli lai lasu holuk e, wogomup,” oluk nonugwene ogwi aʼge ano pam hegit lai lasu erlak oruakhwe re, enemening ebano is muon en tenentarok welat, enebe enemin tenentarok welagai ai o.

³Ai ʼgelaʼge re, nis nenede owan oruakma, muʼgat ebabut wiak aʼge ʼgwiangma yema eʼgik pam welago aʼge en eragam nonoboluk welaga ai o.

⁴Oruakma re, at Allah en omlogo yoʼgo poluk gwiangma perakpou wom aʼge arat horok lau wagama re, perakpou wagama, hwe ʼgwiangma aʼge enat deregei o. Asogo deregeimu, wene Allah en nenesaʼgo weregei wene ano eragam welat esaʼgo hologo nak taga laga.

⁵Asogo perakpou waga ai re, nis Allah eiyagai emagoluk, wene nenesaʼgo weregei wene ano en eragam tennentarok oruakma, herle hebilnonobumagoluk perakpou waga ai o.

⁶Asogo herle hebilogo nenebegeimu, nenebe Allah eiyagai welege ai en e, at omlogo Arogun nenedemu nonobou wagama welat, at Allah paget e, nis e, “Naik o, naik o,” ogu lemagoluk oso ai o.

⁷Ai en e, is logon eneragam aʼge welegep ai ʼgelaʼge, welegep puk. At Allah eiyagaiat egeptik welegep o. Asogo egeptik welegep ai en, at Allah en e, “His an nebe neiyagai egep ai en e, an neiyagai wogentaigoluk henebegi aʼge re, his eiye orogup o,” oluk oso ai o.

⁸His nadugat Allah ebe heneperlak welegep ai en, is mu aʼge ebe Allah ʼgelaʼge erlakhweat de, eneragam welegep ani o.

⁹Aʼge re, an en e, “At Allah henebe aluk welago yo,” oluk u aʼge re, “His yogodak Allah ebe henaluk egep o,” oluk egi ai o. Holuk e, his honuʼgwarek en muʼgat ebabut wiak anni erlak aʼge, ilmu erlak aʼge, ai pam pobuk togolik eragam ʼguogoluk togu legep ai, nopaget.

¹⁰His en ogulat e, “Agauwa ai pam disogo tuok. Dugwi ai pam disogo tuok. Mo ai pam ligago holuk, ai pam ʼbiso holuk, disogo tuok o. Tahun ai pam disogo tuok o,” oluk, ai aʼge logo poluk ogu legep ai o.

¹¹An his henebaget ningsogo mep lagak-pagaksogo til denaga legi ano we ʼburlat ema hwi a, oluk nogorlok ago en egi o.

¹²Narilak norokhwi. An nebe naduk e, his ʼgelaʼgeat egirik welegi yu ʼgelaʼge, his ogo re, an ʼgelaʼgeat oroguptik nebabut womup o. Naduk e, his en mesik wiagapnobo erlagat o.

¹³Naduk naduk an nebe ou wegi ai en op wene moʼgulhentegis ano henalugat o.

¹⁴Moʼgulhentasukhwe an nebe ou hasu legi ano pam henebit nio hegit aʼgeat de, henebit nio erlak, henemelmel nio erlak, malaikat Allah en perakpou wom aʼge en wo ʼgelaʼge de a? At e, Kristus Yesus ebe wo ʼgelaʼge de a, woknebigep ai o.

¹⁵His nadugat henebabut aʼgoluksogo togu legep aʼge ano, yogodak henebabut noʼgosogo takpegeptik welegep. Enil hwelilogo wogontogwi aʼge wellepma re, his henebabut e, henil hwelilogo woknetlibat o, oluk, honobok ʼbaksogoat u aʼge welegi o.

¹⁶Yogodak wene demat moʼgulhentegis ai en, nemin il ʼbelak aʼge ʼgelaʼge niegep hwi a.

¹⁷Is aphwami logon eba henebe wokhonobuogoluk honogola ningsogo ʼgagalogwi ai, enede hegitsogo welat togwi puk. An nemin op welege aʼge uknoboluk lisogo wokhonoboluk lebagalat, is oruak oʼgweat ningsogo togu lemagoluk henede ʼgagalogwi ai o.

¹⁸Asogo togwi ai re, an nebe nemin oruakma de a? Erlakma de a, his op togu lemagoluk henede ningsogo ʼgagalogu lomma re, op nak.

¹⁹Aʼge re, neiyagai henebe nede o. Hwami en malik dagonobuogoluk onoʼborl nonouk togwi ʼgelaʼge, an en pobuk dakhonobumu, his henebabut Kristus ebabut ʼgelaʼge takpelep e! oluk, his henebaget an wiaksogo nonouk taga legi o.

²⁰An his henebaget noʼgosogo tik logwe, oluk an neperlak ago ai en, an nede en e, yogodak ya heneʼbek weiktik henemin welat niak mu aʼge ʼgelaʼge mesik moʼgulhentele o, oluk, nede epasu legi ai o.

²¹His en e, “Wene Allah en nenesaʼgo weregei wene ano eragam ʼgogulat hologo togu lomul o,” oluk ogu legep aʼge yu, an wene Allah en nenesaʼgo weregei aʼge ano pam pelal wogo oruak aʼge moʼgulhentaik aʼge yu, henesaʼgo opsogo hwelip o.

²²Wene pelal wokho pegesa ai pam disogo wogo oruak. At Abraham en eiyagai ʼbiren dagenebegei ai o. Mesik e, hwe eragam aʼge wesirik deregei. Ye, mesik e, ugwe ebe edip hwe en deregei.

²³Aʼge re, hwe eragam aʼge en deregei aʼge ai re, aphwami en dagonobogwi ʼgelaʼge deregei ai o. Ye, ugwe edip hwe en deregei ai re, Allah en obok moʼgulesi ano hegitsogoat deregei ai o.

²⁴Allah en nis aphwami nenemin wene naduk mesik werak pesirik e, pobuk mesik weregei ai, hwami enebe ʼbiren, Hagar o, Sara o, eria enebam elitsogo moʼgulhentaik o. Allah en dom Sinai pam eba en wene weregei ai ebe re, hwe Hagar emalik eneragam aʼge dagenebegei oluk, ebam elitsogo egi ai o.

²⁵Hwe Hagar ai, dom Sinai aphwami Arab aʼge onowi pam welago aʼge ai paget egi ai o. At Hagar ebe emin, emalik emin, eneragam welegesa ai ʼgelaʼge, yogodak aphwami o Yerusalem aʼge asogoat welagai ai o.

²⁶Aʼge re, hwe uʼgwarek ugwe edip hwe aʼge ʼgelaʼge, o Yerusalem ʼbogorl pam aʼge ai, nis neniayat o.

²⁷Ai paget e, Allah iak pam wene disogo oluk pelal wogo oruak, “Hwe ogun oruak aʼge en emalik enebe wei nak dagenebisokhweat de, mesik ogun en lologo ukpesi aʼge en, emalik aʼbigat dagenebiso ai en e, hat hebe abeli welat malik doru erlakma en welegen aʼge ai, hogola hagai hemen o. Malik dakhwerlaigoluk hoʼborl serlem tu erlak aʼge welegen ai, hogola hagai hasulat, hiak loksogoat oso lomup o,” [8] oluk egeimu pelal wokho pegesa ai o.

²⁸Narilak norokhwi. His e, Allah en Abraham obok moʼgulesi aʼge ano, ebe at Isak deregei ʼgelaʼge, his dakhenebegeimu welegep o.

²⁹Aʼge re, at Abraham omlogo mesik aphwami en dagonobogwi ʼgelaʼge deregei aʼge ai en e, omlogo mesik Allah Arogun pam deregei aʼge ai di eʼgin yu eʼgin pasu laga ʼgelaʼge, nis yogodak asogoat taknonobogwi ai o.

³⁰Aʼge re, Allah iak pelal wogo ai pam wene no egei no. Disogo egei epegi, “Hat hugwe edip hwe malik ai en hat hemening aʼge eiye om ʼgelaʼge, at hwe heragam aʼge emalik ai en, hemening aʼge eiye ema erlak o. Holuk e, hwe heragam aʼge ai emalik eminat mukho lebigonobomup o!” [9] oluk moʼgulesimu pelal wokho pegesa.

³¹Aʼge re, narilak norokhwi. Nis e, hwe eragam aʼge ai eiyagai welege puk. Erlak o. We, hwe edip hwe ai eiyagaiat welege o.