Read Silimo Galatia 5 Bible Online

Galatia 5 - Silimo bible

Galatia 5

¹Nis Kristus en herle hebilogo nenematekma nenebesimu yogodak nenematekma welege. Ai en e, di aʼge yu aʼge eʼgin wiak aʼge is aphwami eneragam aʼge en e ʼbelak ʼgoʼgosogo woluk louwagoluk enemarlo pam pogwi ʼgelaʼge, pobuk eʼgin aʼge ano henebam pouwano oluk e, ningsogo edik welemis o.

²An Paulus nuʼgwarek en wene demat moʼgulhentaik. His honuʼgwarek en henagap heneʼgerlimu aʼge is logon en ʼbalhonobuagoluk yoʼgo onobogu lorogup holuk e, at Kristus en obaphonobua erlak o. Almathorlouwogoluk togu lorogup ai.

³His logon henagap heneʼgerlimu aʼge ʼbalhonobuagoluk, is logon yoʼgo enebagup holuk e, henebe loʼbok pobuk henesaʼgo werik o. Asogo ʼbalhonobogwi holuk, wene Allah en nenesaʼgo weregei wene ano ukpo erlakma en ʼberlegat hegitsogo tugulom o.

⁴His logon en e, “Wene Allah en nenesaʼgo weregei wene ai pam nenede heʼberik poluk, at en e, wene nenebam aʼge noʼgorlogo wokholuk, emin pobuk togolik hwedik taknonobouwak o,” oluk togu legep holuk e, Kristus emin daktigeptik e, at Allah ebabut op en woknentasu aʼge ano ukpoluk libegep ai o.

⁵Aʼge re, nis en, nenede Kristus ebam heʼberik pegerik, “Allah Arogun en disogo letnentasukhwe, Allah en wene nenebam aʼge noʼgorlogo wokholuk, at emin pobuk togolik hwedik taknonobouwa aʼge oruak o,” oluk ebam eberak welege ai o.

⁶Ai en e, nis Kristus Yesus emin hwedik welat, nenagap neneʼgerlimu aʼge ʼbelak aʼge et, is logon ʼbelak erlak aʼge et, nenemin hegit welege o. Holuk, ai paget heʼberlonobu mia o. We, logo re, nenede Kristus ebam heʼberik welat, aphwami logon nenedeabonobogu lege ai pam enagat ago yo.

⁷Aphwami en sa omut oruak, sa omut erlak oluk pungtak lagai ʼgelaʼge, his naduk e, dem wene ai paget henebabut aʼgoluksogo togu legep aʼgeat de, pobuk sa en henede ʼgagalegeimu en, dem wene ai hwelakpoluk hegitsogo togwi erlak welat henede ʼbuk welegep no.

⁸Ai re, nonue ʼgain Onuk Logo aʼge en yoʼgo henebesi aʼge ano en, “Enede disogo ʼgagalin o,” oluk egeimu en henede ʼgagalogwi puk. Erlak o.

⁹Roti poruagoluk eʼgen periso aʼge weiyat ogola ʼgwelabogwiam ʼberlegat petil libago ʼgelaʼge, wene wiak aʼge ai en henebe ʼberlegat wiagaphenebil louwano oluk egi ai o.

¹⁰Asogo aʼgeat de, nonue ʼgain Onuk Logo aʼge emin mesigat egerik hwedik welege ai en, an nede en e, “Is enebabut e, wene mu aʼge mesik ebam eberua erlagat o,” oluk, pobi henebise legiat o. Sa en his wiagaphenebigoluk henede ʼgagaliso aʼge ai, Allah en wene ebam pouwa aʼge oruak o.

¹¹Narilak norokhwi. An en enagap eneʼgerlimu aʼge ʼbalogwi wene ai op o, oluk moʼgulentasullema re, nebam di obotut yu obotut taknobogwi ai taknobogullep epegep a? Modok erlak o. An wene ai wene moʼgulentasullema re, wene Kristus ebe e pam edikpoluk werigisa wene ai moʼgulentasuam aphwami enesaʼgo holholuk e, onoyuk aʼgul dungsogo wathorlogwi ʼgelaʼge, enede ʼbuk agalat wene ukpelep erlagat o.

¹²His wiagaphonobuogoluk henagap heneʼgerlimu aʼge ʼbalhonobuogoluk henede ningsogo ʼgagalogwi aʼge ai, his Allah eiyagai honogola en ʼgaroksogo modok ʼbok lebemak o!

¹³Narilak norokhwi. His henematekma welemagoluk Allah en yoʼgo henebesimu welegep o. Asogo aʼgeat de, henede en e, “An nematekma ʼgektak welegi o,” oluk, aphwami enebabut onotogat welat togwi aʼge enebabut wokho yogunat togu lorogup o. At e, wene Allah en nenesaʼgo weregei aʼge ano ʼberlegat laʼbuksogo wene mesigat yu nak e, logo ʼgelaʼge oluk egei ai o, “His honuʼgwarek henebe henede hwedik welegep ai ʼgelaʼge, is aphwami muon henemin welegep aʼge eba ogo henede hwedigat wolomup o,” [10] oluk egeimu pelal wokho pegesa ai en e, aphwami logon enebe henede hwedik welat his-hisat let-let togu lomup o.

¹⁵Asogo aʼgeat de, wam mesik en e, wam mesik werak poluk lebeliselat, werak poluk haumsogo nasulat, tiso ʼgelaʼge, his honuʼgwarek-honuʼgwarek en asogo togu lorogup holuk e, henebe alemaretil lagupno oluk henepe heʼberlogo wolomup o.

¹⁶An nede disogo epegirik en ik o. Nenebabut nonotogat welat togwi aʼge ai en, Allah Arogun ogola agai epasu aʼge ai wusogo lebikpaigoluk tagalat, ye, at Allah Arogun en, nis nenebabut ai aʼge wusogo lebikpaigoluk tagalat, togulat e, emin hwerlirak modok togwi o. Emin asogo togulotluk, his en, “Disogo tolu e,” oluk, nin hwedik nan hwedik, opogu legep aʼgeat de, ebe demat togu legep erlak ai o. Ai en e, Allah Arogun emin hwedik welat op nak togu lomup o. Asogo togu lorogup holuk, henebabut honotogat welat, di nagai yu nagai oluk togu legep aʼge ai, pobuk asogo togu lorogup erlak o.

¹⁸Allah Arogun en, “Disogo tip o,” oluk, moʼgulhentasuam togu lorogup holuk, wene Allah en nenesaʼgo weregei aʼge ano pam pobuk wene henebam pouwa erlak o.

¹⁹Aphwami ʼgwiangma yema enebabut onotogat welat togwi aʼge ebe enagat yu i o. ʼBabi tenontogulat, enemelmel aʼge togulat, enaganhan wiak togulat,

²⁰dogwi asua pam heʼberik poluk togulat, aphwami logon enebe wiak emagoluk emene onobogulat, aphwami logon enemin il ʼbalagalat, wene sorok ogulat, ʼbou togulat, onolot het modok welat, onuʼgwarek enebaget nak logo pagathorlogulat, aphwami enebe mesigat aʼge enemin hwerli ʼbal-ʼbal ʼbogulat, ʼgek-ʼgek lagalat,

²¹onogola en e, is agaikhen enaʼge aʼge, “Nagai o,” opogulat, ik enede ʼbalago aʼge noluk enede ʼbalagalat, seni sakho noluk wiak togulat, togwi ai emin, logon asogo togwi aʼge ʼberlegat enemin, paget egi ai o. Is aphwami logon asogo togwi aʼge, Allah eragam enebasumu eba eiye ema modok erlak o, oluk, wene ai paget nadugat moʼgulhentegis ʼgelaʼge, pobuk henesaʼgo wusogo moʼgulhentegisat ai o.

²²Ye, e eʼgen egesiso ʼgelaʼge, Allah Arogun aphwami onogola welat enebabut togwi re, ebe yu. Aphwami logon enebe enede hwedik welat, onogola enagai hogulat, aphwami logon enemin op lioksogo welat, enebabut mosogo welat, enebabut enago welat, enebabut op welat, enebabut heʼbisogo welat,

²³enede sebelak welat, onuʼgwarek en enesaʼgo werak welat, togwi aiat o. Enebabut asogo togukhwe re, wene mesik enebam pogwi no? Modok erlak o.

²⁴Nenebe Kristus Yesus osi aʼge, nenebabut nonotogat welat e, di nagai yu nagai opogu lege aʼge ai, Kristus Yesus ebe e pam edikpoluk werigisa aʼge ai pam wusogo pege o.

²⁵Ai en, yogodak Allah Arogun enat nenebabut ʼget aʼge ʼheliʼgogo nenebesimu nenelaluk welat e, at en moʼgulnentasu aʼge nak hegitsogo togulom o.

²⁶Asogo togulat, nonuʼgwarek en erlikhorlo erlakma enat, nis-nis mesik en mesik onogola wiak emagoluk tu erlakma en, nis-nis ʼbousogo mesik en mesik nenebit onto erlakma en, togu lomok o.