Read Silimo Galatia 6 Bible Online

Galatia 6 - Silimo bible

Galatia 6

¹Narilak norokhwi. At mesik wiak tagoma henil haguptik holuk e, at ai togolik ebabut heberlemagoluk, his Allah Arogun demat honogola oruak aʼge en heniak sakhosogoat esaʼgo werip o. Esaʼgo asogo worogwiam, his asogoat henebam emano oluk, honuʼgwarek henebabut heberlogo wolomup o.

²His-his henebam eʼgin mesik oruak holuk, henebe loʼbok agaikhen en agaikhen let-let togu lomup o. Asogo togu lorogup ai pam en, wene Kristus en nenesaʼgo wusogo moʼgulnentesi aʼge anoat hegitsogo togu lorogup ai o.

³Aʼge re, hat mesik honuk erlak welarat de, “An ʼgain o,” oluk, hede en epasu legen holuk e, huʼgwarek en lalise legen ai o.

⁴Henebe loʼbok honuʼgwarek enat, “An op taga legi a? Wiak taga legi a,” oluk, henebabut ʼbalhorlogulat e, “Op taga legi o,” oluk, epagup holuk e, elit erlikhorlomubat o. Asogo aʼgeat de, nis togu lege aʼge ai, hun domok nonuʼgwarek en u ai en e, “Is logon togwi eba re, wiak. Ye, an taga legi nak e, logo yo,” oluk ogup no yo.

⁶Ye, at mesik en op wene moʼgulhentasuam, his henesaʼgo hologu legep aʼge en henaʼge op aʼge logon lerontogu lomubat o.

⁷At Allah lal-ʼbalsogo moʼgulom no? Modok erlak o. Aʼge re, “Asogo moʼgulom elirat o,” oluk epagup holuk, honuʼgwarek en lalhwerlagup o. Aphwami en di owi yu owi yorogwi aʼge, eʼgen ai aʼge arat hurle agoam e, ebe daganogwi ai ʼgelaʼge,

⁸at sa en ebabut otogat welat tago holuk, ebabut ai pamat alemathorlouwa aiat o. Aʼge re, at mesik sa en, Allah Arogun eʼbirek hwedik welat, at en aʼge tago aʼge holuk, Allah Arogun ai enat, elaluk modok welemagoluk obap pouwa ai o.

⁹Holuk e, nenanni erlak om erlakma enat op aʼge togu lomul holuk e, di aʼge yu aʼge yakhorloluk elit agoam, ebe daganogwi ai ʼgelaʼge, pobuk ologun pam ebe op aʼge horlul ai en e, nenebit om erlakma enat togu lomok o.

¹⁰Holuk e, nis o yogodak op wene tu elirat welege ya pam e, aphwami logon enebe ʼberlegat lerontogularat de, logo ʼgelaʼge re, nenarilak nonorokhwi enede Kristus ebam heʼberik oruak aʼge opsogo lerontogu lomok o.

¹¹Yogodak an nuʼgwarek neʼgik enat pelal lok aʼge wokho heneʼbek perakpou wegi ai, henil enak aʼge homup o!

¹²Is aphwami logon en e, “Henagap heneʼgerlimu aʼge ʼbalit o,” oluk, ningsogo moʼgulhontogwi aʼge ai, is aphwami logon en enil ontoluk e, “Op togwi o,” oluk opouwagoluk togwi ai o. Yesus ebe e pam edikpoluk werigisa wene ano moʼgulontogwiam e, aphwami Yahudi aʼge en wiagabonobuano oluk, wene mu aʼge ningsogo moʼgulhontogwi ai o.

¹³Is ai wene Allah en nenesaʼgo weregei aʼge ano opsogo hologo wolom erlakma en e, onuʼgwarek enagap eneʼgerlimu aʼge ʼbalhorlogulat, “His logon asogoat ʼbalhorlomup o,” oluk, onuʼgwarek en erlikhorlogu lomogoluk ogwi ai.

¹⁴Aʼge re, an di paget yu paget erlikhorlo modok nebit o. We, nonue ʼgain Onuk Logo aʼge Yesus Kristus e pam edikpoluk werigisa aʼge ano paget nak erlikhorloma re, elit o. At ebe werigisa ai en, aphwami ʼgwiangma aʼge enebabut onotogat welat togwi aʼge ai arat mabenap pesi ani o. Holuk e, aphwami warotluk, di aʼge yu aʼge tu aʼge meme oso ʼgelaʼge, aphwami enebabut onotogat welat togwi aʼge ano memerak pegi ai o.

¹⁵Nenagap neneʼgerlimu aʼge ʼbelak holuk emin, ʼbelak erlak holuk emin, ebe ai aʼge logo puk. At e, Allah en nenebe ʼget muat taknenebasu ai aʼge logo yo.

¹⁶An wene henesaʼgo wusogo moʼgulhentegis aʼge yu, hegitsogo togu lorogup aʼge, Allah en e, “An neiyagai Israel aʼgeat o,” oluk, at enat henede haʼbuktak henebasulat, henebe edeaphenebiselat, taga lemak o.

¹⁷Pobuk e, an Yesus eragam aʼge oluk, nebetne sogomerli enak aʼge oruak ai en e, is logon en an nede wik-wiaksogo taknobo mia o. Modok nebit o.

¹⁸Narilak norokhwi. Nonue ʼgain Onuk Logo aʼge Yesus Kristus ebabut op ano en henedemu welat demat ʼgwelakhentarok welemak u ʼgelaʼge, “Amin,” egi ai.