Read Silimo Efesus 2 Bible Online

Efesus 2 - Silimo bible

Efesus 2

¹His naduk e, Allah iak sagalogo wiak togu legep ai en, henede paget henebe werak ʼgelaʼge welegep ani o.

²Ai erlige re, aphwami yema enebabut onotogat welat togwi ʼgelaʼge togu legep ani o. Asogo togulat, muʼgat enebabut wiak aʼge onue ʼgain ʼbogorl abel olukhwe akhit yema eiye welat, aphwami Allah iak enebit en enesaʼgo holu puk aʼge onogola ʼgwegeitik yogodak ogo enede ʼgagalisoat welago aʼge ano iak hologo welegep ani o.

³Naduk nis ʼberlegat is togwi ʼgelaʼgeat togu lege o. Nenebabut aphwami enebabut onotogat welat togwi ai ʼgelaʼge togulat, nenebam aganhan nak agoam wiak togulat, nenede en opoluk wiak togulat, togu legerigat o. Eria erlige re, aphwami enebabut onotogat welat togwi aʼge enemin hegirat oruakma, Allah olot het en, wiagapnenebigoluk welaga.

⁴Asogo welaga aʼgeat de, pobuk at ebabut op modok en, loksogoat edeapnenebegei o.

⁵Nis wiak togu lege ai pam, nenede paget nenebe werak ʼgelaʼge oruakma, Allah en edeapnenebegeitik, Kristus emin hwedik taknonoboluk neneminat nenelalugapnenebegei ai o. Ai en, his at ebabut op enat delhenebegei ai o.

⁶Nenelalugapnenebegeimu re, nis Kristus Yesus emin hwedik oruakma, pobuk at emin ʼbogorl pam ʼgain welat is logon neneragam tenentarok welemagoluk emin ediknenebesi ai o.

⁷At Allah en asogo tegei ai re, o pobuk wolomul eria pam welat aphwami en e, “Allah ebabut op modok en edeapnenebesi o,” oluk enagat pobi togu lemagoluk delnenebegei ai, ebe re, Kristus Yesus enat delnenebegei o.

⁸His henede at ebam heʼberik pogwiam e, at ebabut op ano en delhenebegeimu welegep ai, edip honuʼgwarek en delhwerlegep puk. We, di aʼge yu aʼge oʼgo erlagat wogontogwi ʼgelaʼge, at Allah enat delhenebegeimu welegep ai o.

⁹His en, “Nis op togu lege pam en de, delnenebegei o,” oluk, his pema honuʼgwarek en erlikhorlo modok mia o.

¹⁰At enat opsogo heliʼgogo nenebesimu welege o. Ai re, nis Kristus emin hwedik welat, di aʼge yu aʼge opsogo nak togu lemagoluk, nenebabut muat ʼget walnentesi ai re, ebe Kristus Yesus enat walnentesimu welege o.

¹¹His naduk e, henebe oʼborl oʼgwe aʼge welegep ano, henede eberit o. Is ap Yahudi aʼge aphwami enepenen en enagap eneʼgerlimu aʼge ʼbalenebigisa aʼge ai en, his henebaget e, “Enagap eneʼgerlimu aʼge ʼbelak erlak aʼge o,” oluk ogu legesa.

¹²Ai erlige re, Kristus ebe emin hektak welat, henebe Israel aʼge erlak o. We, is mu aʼge ʼgelaʼgeat welegep ani o. Asogo oruakma, at Allah en e, wene is Israel aʼge enemin ʼbalogulat e, “Disogo takhenebaik o,” oluk obok moʼgulentesi aʼge ano, his heneperlagat welat, “Op ema o,” oluk henede opo erlakma enat, Allah eragam ʼgu erlakma en, ʼgwiangma yema welat, Allah ebe heneperlagat welegep ani o.

¹³Naduk e, henebe walekmayat welegep aʼgeat de, yogodak, Kristus Yesus emin hwedik tigepma re, at emep namogo waraga ai pam, horok ya henebesimu welegebat o.

¹⁴Aphwami Yahudi aʼge emin, oʼborl oʼgwe aʼge emin, enemin hektak oruakma re, ʼburl ʼgwe ʼbelak leget ʼgelaʼge lok werik welaga aʼge, at Yesus en laʼbulogo nenebasu aʼge ano ebe waragalat hwerli ʼbelak ano moluksogo erlagap poluk e, nenebe mesigat laʼbulogo nenebesimu welege ai o.

¹⁵At Kristus en, nenaʼgul onuk Yahudi aʼge emin, is oʼborl oʼgwe aʼge emin, ʼbiren eria welaga aʼgeat de, at emin mesigat hwedik taknonoboluk nenaʼgul onuk mesigat ʼget aʼge laʼbulik nenebaigoluk e, wene Allah en nenesaʼgo wusogo, “Disogo tu, asogo tu o,” oluk moʼgulnentesimu wene ʼbelak oruak aʼge ai erlagap pasulat, emin hwedik taknenebesi ai o.

¹⁶At Kristus ebe e pam edikpoluk werigisema waragalat, Allah emin wik-wiaksogo il ʼbelak ʼgelaʼge welege aʼge ano, erlagap poluk e, nenebe nin pema aʼge, nin pema aʼge enemin, mesigat laʼbulogo nonoboluk, Allah eʼbek woknonoboluk waga ai o.

¹⁷At Yesus en asogo woknonoboluk wagama re, nin pema aʼge, nin pema aʼge enemin, at Allah Arogun mesigat ai pam nenaik Allah eʼbek ʼgwilo aʼge elirat aga, oluk, Yesus ebe nadugat wagarik e, “Henemin laʼbulik henebegi o,” oluk, wene op wene his oʼborl oʼgwe aʼge walekma oruakma moʼgulhentasulat, nis aphwami Yahudi aʼge horoksogo oruakma moʼgulnentasulat, tu aga ai o.

¹⁹Asogo waga ai pam, his henebe ap mu aʼge, ap ʼbok aʼge ʼgelaʼge welegep aʼge ano, yogodak asogo erlak agama, henebe Allah eiyagai egeptik e, is enemin, at Allah owi pam eba honowiragat egeptik welegep o.

²⁰At Kristus Yesus ebe waʼgi logo aʼge delak oruakma, is ap at en yoʼgo onoboluk peragenebesi aʼge ebano emin, is ap Allah iak moʼgulontogwi aʼge ebano emin en, ebam louksogo worogu legesema re, his henebe nis en ebam louksogo werik henebegema welegep o.

²¹Nis ʼberlegat nenebe loʼbok, at Yesus emin hwedik taknonoboluk e, o dip-dip worogwi ʼgelaʼge, o ai ebesigat nenaik Allah uʼgwarek ebaget owi wusogo nenebasu ai o.

²²Ai ʼgelaʼge re, his Kristus emin hwedik oruakma, is logon enemin o mesigat Allah owi werikmu Arogun welemagoluk, wusogo henebasu ai o.