Read Silimo Efesus 3 Bible Online

Efesus 3 - Silimo bible

Efesus 3

¹Ai en e, an Paulus his aphwami oʼborl oʼgwe aʼge Kristus Yesus en delhonobuagoluk, at ebaget neʼgik herle wusogo nebegesema welegi o.

²Aphwami en e, “Allah ebabut op ano en, is aphwami o Efesus aʼge op emagoluk, at Paulus yoʼgo pesimu op wene moʼgulentil denago yo,” oluk ogwiam henesaʼgo arat hweligep epegi o.

³Wene at Allah ogola hisogo welaga aʼge ai, an ʼbaksogo moʼgulnesi, oluk, pelal horoksogoat wokho moʼgulhentegis ai o.

⁴His en wene ai onuk moʼgulogulat e, “Wene Kristus ebaget hisogo welaga aʼge ai, at Paulus aluk agarik oruak o,” oluk, enagat pobi togup ai.

⁵Pageat e, wene ai aphwami logon ʼbaksogo moʼgulonto erlakma, eneperlagat welegesema re, yogodak Allah Arogun en, is ap Allah eiyagai Yesus en yoʼgo onoboluk peragenebesi aʼge ebano emin, Allah iak moʼgulontogwi aʼge ebano emin, ʼbaksogo moʼgulentesimu enaluk aga ai, wene ebe re, disogo.

⁶Op wene ai pam, is aphwami oʼborl oʼgwe aʼge emin, Yahudi aʼge emin, enemin hegitsogoat eiye agalat, Kristus ebe mesigat aʼge nenemin hegitsogo hwedik taknenebasulat, tegeimu welege o. Wene pageat Allah en, “Disogo takhenebaik o,” oluk, obok moʼgulnentesi aʼge ano pam, “Aphwami oʼborl oʼgwe aʼge Kristus Yesus emin hwedik oruakma, op wene ai pam nenemin hegitsogo taknonobouwa o,” oluk, nenaluk aga ai o.

⁷An aphwami eneragam aʼge ʼgelaʼge welat, wene ai soʼburentasu lemagoluk, Allah ebabut op en annisogo taknenebasu hegitsogoat yoʼgo nebesi ai o.

⁸Allah eiyagai aʼge ʼberlegat ononuk oruakhweat de, an nonuk erlak, mia aʼge, at Allah ebabut op en, op wene ʼbeliʼgogo u mia aʼge, Kristus en wogentasu aʼge ano aphwami oʼborl oʼgwe aʼge moʼgulentil nese lemagoluk yoʼgo noboluk niabuk aiat, woknesimu welegi o.

⁹At Allah di aʼge yu aʼge ʼberlegat walhesi aʼge ano en epasulat e, Ebe disogo ema, oluk, wene ogola hisogo welaga aʼge, aphwami ʼberlegat selakma ʼbaksogo moʼgulentil nese lemagoluk yoʼgo nebesi ai o. Ye, is malaikat ʼbogorl petne yoʼgo noʼgwi aʼge ebano onuelak ʼgain aʼge emin, eniak hologo welagai aʼge emin, nis Allah eiyagai en e, “At Allah di paget yu paget ede modok ʼgagalak o,” oluk e, moʼgulentasukhwe yogodak ya enaluk emagoluk, page enat wene ai Allah ogola hisogo modok welaga o.

¹¹Edip pam en, at Allah en asogo taknenebaigoluk ede epesi aʼge ano, at nonue ʼgain Onuk Logo aʼge Kristus Yesus en tuagoluk perakpou wagama, ebe tegei ai o.

¹²Nis nenede at ebam heʼberik poluk, at emin hwedik welat, nonogorlok erlaksogo nenede haʼbuksogo Allah eʼbek ʼgwilo ai o.

¹³Ai en e, an yogodak ya his henebaget wiagapnobogwi ai en henede ʼbuk om erlakma en wolorogup holuk, obaphonobua ai en e, henesaʼgo wusogo moʼgulhentegis ai o.

¹⁴Ai enat, an Nenaik ilem nodogorlu pam hweriogo welat yoʼgo pasu legi o.

¹⁵Is ʼbogorl pam welagai aʼge emin, nis ʼgwiangma yema welege aʼge emin, nenaiklak loʼbok moʼgulontogulat, “Naik,” oluk ogu lege ai, nenaik edip Allah aʼge ebam elitsogo ogu lege ai o.

¹⁶At Allah di aʼge yu aʼge ilmu ʼbullak oluk u ʼgelaʼge, erliktogwi modok welagai ano en, Arogun pam henannisogo henede hurleaphonobuagoluk yoʼgo pasu legi o.

¹⁷Henede at Kristus ebam heʼberik poma, at ebe honogola owi wusogo oruakma re, di aʼge yu aʼge owi yorogwiam emeʼgen ʼbelabiselat, o waʼgi ningsogo dalogulat, togwi ʼgelaʼge, henebabut e, aphwami logon enebe enedesogo welagai ai aʼge pam henemeʼgen yogo poluk ningsogo wolorogup oluk, Allah yoʼgo pasu legiat o.

¹⁸Aphwami en o woruogoluk, hwerli yat oʼgwe ai pam, horok oʼgwe ai pam, dum uak lagabul ai pam, dit uak ʼbelabul ai pam, oluk walhogwi aʼgeat de, nenebe Kristus en edesogo welago ai aʼge, “Hwerli ai pam o,” oluk walho re, mia. Logat o. Walho mia aʼgeat de, Allah eiyagai logon ʼberlegat enemin hegitsogo pobi togup en, Allah en henede hurleap pasuam, at ebe ebesik honogola modok ʼgaroksogo ʼbeterak welemagoluk yoʼgo pasu legiat o.

²⁰At Allah at erliktogu lomok o. At ebe nonogola welat annisogo taknenebasu ai re, modok logatma re, nis en nenede eberogulat, ʼgonu moʼgulogulat, togu lege aʼge hegitsogo tu erlakma en, at e, di-dagan aʼge loksogo tiso ai o.

²¹Nis Allah eiyagai odoktak aʼge ʼberlegat Kristus Yesus emin hwedik welat enebe logon pobuk aʼge ʼget dagetil lagaihwe, Allah demat erliktogwi modok wolomok, oluk, “Amin,” egi ai o.