Read Silimo Efesus 4 Bible Online

Efesus 4 - Silimo bible

Efesus 4

¹An nonue ʼgain Onuk Logo aʼge paget neʼgik herle wusogo nebegesema welat e, his wene mesik henesaʼgo werik o. Narilak norokhwi. His henebabut e, at Allah en yoʼgo henebesi hegitsogoat togu lomup o.

²His-his nede-hedesogoat lerontogulat, nin hwedik nan hwedik henede sebelak poluk togulat, henebabut enago welat, henepe mosogo welat, togu lomup o.

³Allah Arogun en nenebe mesigat hwedik taknenebesimu welat, enebe op laʼbulogo welagai ai aʼge logo pogu lomup o.

⁴Allah en yoʼgo henebasulat e, “An en obaphenebik o,” oluk, obok mesigat aʼge moʼgulhentesi ʼgelaʼge, at ebe mesigat aʼge henemin hwedigap togulat, Arogun mesigat aʼge wogulat, tigep ai o.

⁵Nonue ʼgain Onuk Logo aʼge ebe mesigat o. Nenede at ebam heʼberik pogwi aʼge ai mesigarat o. Nenebe ik olomu ʼbelapnonobogwi aʼge mesigarat o.

⁶Nenebe ʼberlegat nenaik Allah mesigarat. At emategat ebe logo ʼgain Onuk Logo ereiya welago yo. Nis ʼberlegat di aʼge yu aʼge togu lege ai, ebe at enat tiso yo. Tagalat, ebe nis ʼberlegat nonogola welago ai o.

⁷Aʼge re, at Kristus en soʼbutnentasu hegitsogoat, Allah ebabut op en, yabuk hun domok togu lemagoluk nenebabut loʼbok woknentesi.

⁸Ai enat, Allah en disogo oluk egei, “At ebe ʼbogorl heiladu ogola erabu legeigoluk, at eselei aʼge eneʼgik herle wusogo enebesirik wogonoboluk ligagarik e, op aʼge logon aphwami oʼgo erlak aʼge soʼbusogo wogenta ʼbu aga,” [1] oluk egeimu pelal wokho pegesa ai o.

⁹“At ebe ligaga,” oluk egei ai ebe re, at ebe ʼgwiang ogola ʼbegeitik en ligaga, oluk u ʼgelaʼge egei ai o.

¹⁰At ebe ʼgwiangma emin, ʼbogorl pam emin, o di owi yu owi ʼberlegat emin, weleigoluk, ʼgwiangma ʼbu agarik e, pobuk togolik ʼbogorl heiladu ogola erabu ligaga ai o.

¹¹Ye, soʼbusogo wogenta ʼbu aga ai ebe re, nis Allah eiyagai nenebe ʼberlegat Kristus ebe ʼgelaʼge oruakma, o worogwi ʼgelaʼge wusogo nenebasuam, nenebe ʼberlek Allah ebaget togu lemagoluk e, nenebe loʼbok yoʼgo nenebesirik ediknenebil laga ai o. Is logon Allah iak woluk louwagoluk yoʼgo enebasulat, is logon Allah iak moʼgulentil louwagoluk yoʼgo enebasulat, is logon op wene aphwami oʼborl oʼgwe aʼge enebaget moʼgulentil louwagoluk yoʼgo enebasulat, is logon Allah eiyagai tenentarok welat wene moʼgulontogu lemagoluk yoʼgo enebasulat, nenebe loʼbok asogo yoʼgo nenebesi ai o.

¹³Asogo taga lemarik, nenede at ebam heʼberik welat e, nenebe mesigat aʼge ʼgelaʼge agalat, Allah omlogo ai ebe dokhumsogo nenaluk agalat, at Kristus di paget yu paget ede ʼgaroksogo hurle modok welago ʼgelaʼge, nis nenede asogo hurle agalat, tul ai o.

¹⁴Asogo togulat, nenebabut malik wei aʼge enebabut yasobu en ik hererim hasulat lak-wak oso ai ʼgelaʼge, nis asogo togu lemagoluk, is aphwami logon enebabut lalonobogwi aʼge en eniak esei aʼgeat de, demat ʼgelaʼge lalnonobuogoluk, wene mu aʼgeat pobuk naduk moʼgulnentau wagai ai eniak hologup no yo.

¹⁵Aʼgeat de, nenebe enarlue aʼge enebabut ʼgelaʼgeat wogulom o. Aphwami enebe nenedesogo welat, wene demat nak ogulat, di bele yu bele togulat, nonue ʼgain Onuk Logo aʼge Kristus ede ʼgaroksogo hurleat welat taga laga ʼgelaʼge togulat, welat e, at ebabut wogulom o.

¹⁶Nenebe neneʼgik nonoyuk nenebam hwedik welago aʼge logon ʼberlegat nenemeʼgen pam en hwedik op welat, hun domok tu aʼge togwiam, nenebe op welege ai ʼgelaʼge, nis nonue ʼgain Onuk Logo aʼge Kristus ebe pam emin hwedik welat, nenebabut loʼbok togulom aʼge hegitsogo togu lomul holuk, aphwami enarlue agalat enede hurle ago ʼgelaʼge, aphwami logon enebe nenedesogo togulat, nenebe Kristus ebe ʼgelaʼge nenanni omultik wolomul ai o.

¹⁷An nonue ʼgain Onuk Logo aʼge emin hwedik welat, at en moʼgulhonto ʼgelaʼge, wene yu henesaʼgo wusogo moʼgulhentaik. Is aphwami oʼborl oʼgwe aʼge enebabut togwi ai ʼgelaʼge, his henebabut asogo togu lorogup o. Is ai, we ʼburlat aʼge ebam eberogulat e,

¹⁸onogola o hiktak oruak o. Enede helep ʼgelaʼge ebesik en e, op wene eneperlagat welat, Allah en aphwami enelalugabenebiso aʼge ano emin hwedik erlak welat onomu aʼge welagai ai o.

¹⁹Is enebabut e, “Wiak togu lege o,” oluk, onogorloksogo welagai erlak. Is en ogulat e, “Nis e, wiak togu lomul o,” oluk, di wiak yu wiak eneʼgerli erlagat loksogo togwi ai o.

²⁰Aʼgeat de, at Kristus en, “His wiak asogo togu lomup,” oluk, moʼgulhonto erlak.

²¹His at obok hweligeptik henemin hwedik welat, dem wene Yesus tegei wene ai, moʼgulhentigisema wegep epegi.

²²Naduk e, honogola di nagai yu nagai opogu legep ai en lalhenebisoam e, henebe alemathorlogu legep ai en e, henebabut naduk aʼge ai ukpemit o.

²³Ai ukpoluk, henede emin, honogola eberogu legep aʼge ai emin, Allah en henebabut ʼget aʼge takhenebasu lemak o.

²⁴Henebe demat, at Allah en uʼgwarek ebaget pagathwerlesirik, at en e, henebabut hegitsogo togu lemagoluk, at ebabut ʼgelaʼge ʼget aʼge takhenebesi aʼge ai, sum ʼbuktogwi ʼgelaʼgeat ʼbuktogu lomup o.

²⁵Nis ʼberlegat nenebe at Kristus eʼgik oyuk ʼgelaʼge emin hwedik welege ai en e, eniak esei ogwi aʼge ai ukpoluk e, henarilak honorokhwi enemin heniak demat aʼge nak ogu lomup o.

²⁶Honolot het oso holuk, wiak togup. Honolot het oruakma, Iblis en henede ʼgagaluano oluk, o mo il ʼgoboksogo ʼgwilo erlak oruakhwe, erlagap pomup o.

²⁸His logon en yogorlia wogu legep aʼge holuk, pobuk asogo wogwi erlak welat, is enerlagaik aʼge lerontogu lomogoluk, honuʼgwarek en yabuk heneʼgik annisogo wogu lomup o.

²⁹Weneane uogoluk holuk e, wiak aʼge ogu lorogup o. Wene op aʼge ogwiam is logon enede owan aʼge enesaʼgo holua aʼge ai Allah en obabenebisokhwe, enede hurle emagoluk, wene op aʼge nak ogu lomup o.

³⁰Allah en pobuk henebe obaphenebiogoluk naduk nadugat Allah Arogun wokhentesimu honogola oruak aʼge ai, ede wiagap pagup o.

³¹Eniak haro wiak ogulat, onolot het-ʼbet ogulat, onolot het agalat, eniak uareksogo wene ʼbalogulat, eniak eseiyat onobok ʼbalogulat, togwi aʼge ai ukpogulat e, wiagabonobogwi aʼge emin ʼberlegat ukpogu lomup o.

³²Ukpoluk e, his-his henebabut enago sakhorak welat e, his wiak togu legep aʼge at Kristus en erlagapsogo ukpesi aʼge, Allah en erlagap pesi ai ʼgelaʼge, henarilak honorokhwi logon en wiagaphonobogwi holuk e, his-his en, wene ai erlagap pogu lomup o.