Read Silimo Efesus 5 Bible Online

Efesus 5 - Silimo bible

Efesus 5

¹Henebe Allah eiyagai at ede hwedik aʼge welegep ai en e, at ebaburat womup o.

²Aphwami en di aʼge yu aʼge Allah paget poluk, ebe wusogo odouk narlik pogwiam, Allah ogola opsogo oluk eʼben op aʼge lagabak pogu legesa ai ʼgelaʼge, at Kristus nis nenebe edeapnonoboluk e, “Is enebaget an nebe watnobuak o,” oluk epesi ano pam ebe werigisa ai en Allah ogola op aga ai ʼgelaʼge, nis-nis nede-hedesogo togu lomok o.

³Henebe Allah eiyagai aʼge welat henebabut togulom aʼgeat hegitsogoat togulom o. Holuk e, ʼbabi tenontogulat, eneʼgerli erlak wiak togulat, “Di aʼge yu aʼge an nak woknetlip e,” oluk onogola en opogulat, ogwi ai aʼge, aphwami logon en e, “Is pema asogo wiak togwi o,” oluk, honobok wiak saga uano oluk, wiak mesik togup o.

⁴ʼBabi tenontogwi aʼge obok ogulat, wene enede erlak en ogwi aʼge ogulat, eneʼgerlimu aʼge paget herettakma en ogulat, u puk aʼge ai u erlakma enat, Allah at hau worogu lomup o.

⁵Is aphwami ʼbabi tenontogwi aʼge emin, eneʼgerli erlak welat wiak togwi aʼge emin, “Di aʼge yu aʼge an en aʼge nak wellep o,” oluk onogola en opoluk togwi aʼge ai, dogwi asua pam heʼberik welat togwi ʼgelaʼgeat togwi holuk e, Kristus Allah eʼbirek eneragam enebasuam welagaimu eba eiye ema modok erlak o, oluk, opsogo henede opomup.

⁶Is aphwami Allah iak hegitsogo tu puk aʼge en, wene egi aʼge ai asogo togumu, Allah olot het emarik wiagabonobua ai en e, is logon en eniak we ʼburlat ogulat e, “Wiak aʼge asogo tumu obat o,” oluk, lalhonobuano.

⁷Holuk e, his is ai enemin laʼbulogo ai aʼge togu lorogup no yo.

⁸His naduk e, o hiktakma welegep aʼgeat de, yogodak nonue ʼgain Onuk Logo aʼge emin hwedik takpoluk, o dakharakma welegep ai en, henebabut o dakharakma welat togulom aʼgeat hegitsogo togu lomup o.

⁹E edip op aʼge en eʼgen op aʼgeat egesiso ai ʼgelaʼge, aphwami o dakharakma welat di aʼge yu aʼge op hegitsogo nak enede pam en demat togwi ai o.

¹⁰Honogola en e, “Nenebabut noʼgosogo togu lomul pam en nonue ʼgain Onuk Logo aʼge ebam sakho ua,” oluk, henede en pobirak poluk, henebabut ai aʼgeat moʼgulip o.

¹¹Is o hiktakma welat e, obabonobua erlak aʼge paget togwi aʼge ai re, enemin laʼbulogo togu lorogup o. At e, asogo togwiam ʼbaksogo wene yagontogu lomup o.

¹²Is aphwami logon hisakho togwi aʼge ai onobok ogulom e, eneʼgerli om ebelerak ai en e, onobok ogu lorogup o.

¹³Di aʼge yu aʼge ʼbaksogo o dakharakma pogwiam, enagat ago ai o.

¹⁴Asogo o dakharakma pogwiam enak agalat e, o dakha oso ai en e, disogo ogwi ai o, “Hat nogo ese legen ai, hebe helaluk emen o. Ye, werak aʼge ʼgelaʼge welegen ai, helaluk emen o. At Kristus en dakharak hobouwa o,” oluk ogwi ai.

¹⁵Ai enat, henebabut heberlogo togu lomup o! Aphwami enede ebis aʼge en togwi ʼgelaʼge tu erlakma en, enede ʼgagalak aʼge en togwi ʼgelaʼge togu lomup o.

¹⁶Yogodak ya aphwami enebe lok oʼgwe enebabut wiak togwi ai en, his henebabut we ʼburlat almasogo togu lemano oluk, panoasuak henebabut op aʼge aiat togu lomup o.

¹⁷Henede ebis wolorogup no yo. We, at nonue ʼgain Onuk Logo aʼge ogola agai epasu aʼge aiat edip hwiogo poluk hegitsogo togu lomup o.

¹⁸Anggur eʼgen aʼbosu loksogo noʼgwi ai en henede ʼbalagalat wiagaphenebisomano oluk e, nagup o. At e, Allah Arogun aiat honogola ʼbetesogo womup o.

¹⁹His-his weneane ogulat e, Allah paget weni Mazmur pam aʼge worogulat, Allah paget weni worogulat, Allah iak paget weni worogulat, worogwi aʼge ai wogulat togu lomup o. Henedemu en, weni worogulat nonue ʼgain Onuk Logo aʼge ebe erliktogu lomup o.

²⁰Nin hwedik nan hwedigat di aʼge yu aʼge ʼberlegat paget e, nonue ʼgain Onuk Logo aʼge Yesus Kristus onuk ʼbalogo re, nenaik Allah hau worogu lomup o.

²¹Allah asogo hau worogulat e, Kristus hau doʼgoksogo worogulat, his-his mesik en mesik eragam welat eniak hwelakpoluk togu lomup o.

²²Nis Allah eiyagai nenebe Kristus ebe ʼgelaʼge oruakma, at en delnenebegeitik e, ebe nonue ʼgain welago ʼgelaʼge, hwami onuelak ʼgain e, onogunlagat ai en e, his hwami re, nonue ʼgain Onuk Logo aʼge eragam welat iak hologo togu legep ai ʼgelaʼgeat, honogunlak loʼbok eneragam welat, eniak hologo togu lomup o.

²⁴Ye, nis Allah eiyagai Kristus eragam welat iak hologo togu lege ʼgelaʼge, his hwami re, di paget yu paget ʼberlegat tuogoluk e, honogunlagat eneragam welat eniak hologo togu lomup o.

²⁵At Kristus en nis Allah eiyagai nenebe edeapnenebegeitik e, “Is enebaget watnobuak o,” oluk epesi ano pam ebe werigisema waraga ʼgelaʼge, his ap e, honugwami asogoat henedesogo togu lomup o.

²⁶At Kristus en asogo tegei ai re, nis Allah eiyagai ʼberlegat nenebe nenebam nonosogomerli erlak, nenagap ʼbulongtak erlak, op wolom ʼgelaʼge, at ilem wene nenebam erlak, op modok degelak welemagoluk, nenebe ik olomu ʼbelapnonobogwiam, at iak ano pam, emesogo nonoboluk, at uʼgwarek ebaget pagathwerlaiogoluk ebe waraga ai o.

²⁸Ai ʼgelaʼge, his ap en e, honuʼgwarek henebe henede welegep ai ʼgelaʼge, honugwami loʼbok enebe, “An nuʼgwarek nebe ʼgelaʼgeat o,” oluk, henedesogo wolomup o. Ap e, onugwami enedesogo welagai aʼge ai, onuʼgwarek enebeat enedesogo welagai o.

²⁹Aphwami logon en onuʼgwarek enebe enebit logon welagai no? Erlak o. Nonuʼgwarek nonsoʼboru op aʼge noʼgulat, nenebe alnano horlogulat, togu lege ʼgelaʼge, at Kristus en e, “Allah eiyagai an nuʼgwarek nebe aʼge neʼgik noyuk ʼgelaʼge o,” oluk asogo alnanosogo tennentarok welago yo.

³¹Ai paget, Allah iak disogo egei, “Ai en e, ap en aik ia ugonoboluk, ugwe emin laʼbulik welat e, enebe ʼbiren aʼgeat de, mesigat aʼge otluk welemak o,” [2] oluk, egeimu pelal wokho pegesa ai.

³²Wene egei ai ogola hisogo wene logo aʼge mesik oruak o. Wene ai an nogola en e, at Kristus nis Allah eiyagai enemin hwedik op wolom aʼge paget egei epegi o.

³³Aʼge re, his henebe paget ogo eminat egei. His ap en, honuʼgwarek henebe henedesogo welegep ai ʼgelaʼge, honugwami loʼbok henedesogo welat, his hwami honogunlak loʼbok hau doʼgoksogo waronobogulat, togu lomup o.