Read Silimo Efesus 6 Bible Online

Efesus 6 - Silimo bible

Efesus 6

¹His malik henebabut e, nonue ʼgain Onuk Logo aʼge emin hwedik welat, henialak henaiklak, eniak hologo togulom ai en e, asogoat togu lomup o.

²Wene Allah en nenesaʼgo weregei ano pam, wene naduk nadugat nenesaʼgo weriselat e, “His en e, disogo tu, asogo tu,” oluk eselat, “Asogo togulomma pobuk obaphenebik o,” oluk, obok mesik emin u erlak. We, “Henialak henaiklak hau doʼgoksogo waronobogu lomup o,” [3] oluk, egeitik e,

³obok disogo moʼgulentesi, “Asogo togu lorogupmu, henebe op welat, ʼgwiangma yema henelaluk mesik eminsogo welat, wolorogup o,” [4] oluk, moʼgulentesi aiat o.

⁴Ye, his enaiklak en ogo re, di bele yu bele togulat henemalik onolot het om aʼge togup no yo. At e, nonue ʼgain Onuk Logo aʼge en nenesaʼgo weriselat, nenede sebeliselat, tiso ʼgelaʼge, his en henemalik asogoat takpoluk enebe yoʼgulonobogu lomup o.

⁵His aphwami eneragam aʼge en e, Kristus iak hologo henede mesigat honogorloksogo welat togu legep ʼgelaʼge, honuelak ʼgain eniak hwelakpoluk hau doʼgoksogo waronobogu lomup o.

⁶Is en yethentarok oruakhwe nak aphwami aʼge onogola opsogo togu lorogup o. We, honogola en e, “Kristus eragam aʼge welat, Allah ogola agai epasu aʼge aiat togu lomok o,” oluk, honogola eberak poluk enat togu lomup o.

⁷Henede en e, “An aphwami aʼge nak eneragam welegi puk o. We, nonue ʼgain Onuk Logo aʼge eragam ogo welegiat o,” oluk, honogola henagaisogo togu lomup o.

⁸Henebabut op togu lorogup holuk, nonue ʼgain Onuk Logo aʼge en, his heneragam aʼge, henematekma welegep aʼge heneminat, henebe loʼbok oʼgo wokhontouwa o.

⁹Ye, his onuelak ʼgain aʼge en ogo re, heneragam aʼge enebaget e, asogoat togu lomup o. “Wathebik,” oluk mumlang ogu lorogup. Henede en e, “An neragam aʼge eminat e, nonue ʼgain Onuk Logo aʼge ʼbogorl pam oruak aʼge ano en, nis nenebaget e, At ai ʼgain o. Ye, at ai uo yo, oluk, oso erlak o. Nenemin hegitsogoat taknenebasu o,” oluk, henede eberak wolomup o.

¹⁰Ologun pam e, wene yu moʼgulhentaik. Nonue ʼgain Onuk Logo aʼge emin hwedik welat e, at anni aʼbik ano pam, henanni oroguptik welemis o.

¹¹At Iblis ebabut aphwami lalnenebiso aʼgeatma re, wiagaphenebigoluk wagoam, weim obuogoluk sing ʼbuktogwi ai ʼgelaʼge, his henebe edigat wolomogoluk e, at Allah en di aʼge yu aʼge woknentasu aʼge ai ʼberlegat henagap pam ʼbuksogo wolomup o.

¹²Nis weim ʼgelaʼge obogu lege ai re, aphwami aʼge enemin obogu lege puk. Erlak o. At e, ʼgain aʼge, eniak oruak aʼge, o hiktakma ʼgwiangma yema tenentarok welagai aʼge, muʼgat enebabut wiak aʼge ʼbogorl lik ʼgwiang ʼbelap holuk ʼburl hoʼgorlak oʼgwe oruak aʼge enemin obogu lege o.

¹³Holuk e, wiak aʼge en wiagaphonobu wagoma weim henil haro wiak edik woloroguptik, arat obogulat edik wolomogoluk, sing ʼbuktogwi ʼgelaʼge Allah en di aʼge yu aʼge woknentasu aʼge ano ʼbuktip o.

¹⁴Enemin obogup en ʼbuktak poluk edik wolom aʼge, ebe re, yu. Mul ʼbagaluk ʼbuktu ʼgelaʼge, wene dem wene aiat ʼbuktogulat, henemik pam sing ʼbuktu ʼgelaʼge, Allah ogola agai epasu aʼge nak togwi ai aʼge ʼbuktogulat,

¹⁵honoyuk sepatu ʼbuktu ʼgelaʼge, Allah en nenebe laʼbulogo nenebasu oluk, op wene ai woluk louwogoluk, enebabut, “I o. An laik o,” oluk ogwi ai aʼge ʼbuktogulat, tip o.

¹⁶Dok ʼbesingontogwiam ʼboloksogo louwagoluk, e saintak aʼge eneʼgigem woluk lagai ʼgelaʼge, enede Allah pam heʼberik welagai ai aʼge nin hwedik nan hwedigat woluk noʼgu lomup o. Woluk noʼgumu, Iblis ebabut wiak aʼge ano en odouk dok ologun pam hwederik poluk ʼbesinghontogwiam, henede Allah pam heʼberik wolorogup ano pam elirat nekhi togulomat o.

¹⁷Enaʼgul pam waronobuano oluk, enaʼgul sum erik aʼge ʼbuktogwi ʼgelaʼge, Allah en delnenebiso aʼge aiat waguptik ʼbuktip o. Asogo ʼbuktoguptik e, weim obuogoluk ʼgarok eneʼgikmu woluk lagai ai ʼgelaʼge, Allah iak, Arogun en woknentasu aʼge ai woluk laga lomup o.

¹⁸Asogo ʼberlegat togulat e, Allah en lethentasu lemagoluk seʼban ogu lomup o. At Arogun honogola welat henede ʼgagalu ʼgelaʼgeat, nin hwedik nan hwedik seʼban Allah yoʼgo pogulat, ʼgonu moʼgulogulat, ogwi modogat wolomup o. Asogo ogulat, henede ʼbugom erlakma en, henebabut heberlak modok wolomup o. Asogo welat e, Allah eiyagai ʼberlegat enebaget seʼban pam Allah yoʼgo pogu lomubat o.

¹⁹Asogo yoʼgo pogulat, an en op wene Allah ogola hisogo welaga aʼge ai, at en moʼgulnosokhwe, niak ʼbaksogo moʼgulentasu leik en e, his en yoʼgo pogu lomubat o.

²⁰Wene ai moʼgulentasu lemagoluk at Kristus en yoʼgo noboluk peraknobou wagama an wegirik moʼgulentasu legi ai paget neʼgik herle wusogo nebegesema welegi o. Asogo welat, an nogorlok erlaksogo op wene ai moʼgulentasulom hegitsogoat moʼgulentasu leik en, seʼban ogu lomubat o.

²¹Wene an nebe yema welegi aʼge emin, taga legi aʼge emin, his henaluksogo, nenare Tikhikus nede aʼge, nonue ʼgain Onuk Logo aʼge paget ebabut heʼbisogo welat tago aʼge ano en ʼberlegat moʼgulhentauma ai o.

²²Nis ya welat togu lege aʼge henaluk oroguptik e, henede sebelogo wolorogup en heneʼbek perakpou wegi ai o.

²³Naik Allah emin, nonue ʼgain Onuk Logo aʼge Yesus Kristus emin, eʼbirek enat, his narilak norokhwi Allah eiyagai ʼberlegat opsogo laʼbulik honobogulat, aphwami enedesogo welagai aʼge ai wokhontogulat, enede at ebam heʼberik welagai aʼge ai eminat wokhontogulat, tuak o.

²⁴His nonue ʼgain Onuk Logo aʼge Yesus Kristus ʼgoboksogo ukpo erlakma en, henede hwedik modok wolorogup aʼge ʼberlegat, Allah ebabut op ano en tenhentarok welemak o.