Read Silimo Filipi 1 Bible Online

Filipi 1 - Silimo bible

Filipi 1

¹His Allah eiyagai Kristus Yesus emin hwedik welat, o Filipi welegep aʼge, henebe ʼberlegat emin, ʼgwelakhentarok welagai aʼge emin, lethontogwi aʼge emin, narilak norokhwi o. An Paulus Timotius neʼbirek en Kristus eragam welat wene pelal wokho heneʼbek perakpou wege ai o.

²Nenaik Allah, nonue ʼgain Onuk Logo aʼge Yesus Kristus eʼbirek enebabut op ano en op aʼge wokhontogulat, henede haʼbugaphonobogulat, togu lemak o.

³An e, nin hwedik nan hwedigat his henebam modok eberak welat, naik Allah at hau werise legi o.

⁴His naduk nadugat wene wegep ai hwerli en, yogodak hwerli, an en op wene aphwami logon moʼgulentil denaga lemagoluk letniogwi modok welegep ai en, nin hwedik nan hwedigat nogola nagaisogo his ʼberlegat henebaget seʼban eselat, Allah yoʼgo pasulat, hau weriselat, taga legi o.

⁶At Allah en his obaphenebaigoluk, naduk nadugat eʼgik tenakhenebesirik e, obaphenebasu lemarik en, hwerli at Yesus Kristus wema ai erlige o il hodologo worogwi ʼgelaʼge, obaphonobuma ai demat oluk, nede haʼbuksogo welegi o.

⁷At Allah ebabut op en yoʼgo nebesimu re, an neʼgik herle werak welat, neʼgik herle owan werak erlakma op wene erlele wokho ningsogo tagalat, taga legi ʼgelaʼge, his ʼberlek asogoat nemin togu lemagoluk yoʼgo henebesiat ai en e, his henebe nede hwedik welegi o. Ai en e, an en his ʼberlek henebaget, “Yesus demat takhonobouma o,” oluk opo aʼge hegitsogoat epasu legi o.

⁸Yesus Kristus en his henebe ʼberlegat ede welago ʼgelaʼge, an en his nede welat e, “Nemin wollo e,” oluk, nede en demat epasu legi aʼge ai, at Allah aluk o.

⁹An en seʼban his henebaget eselat, disogo ese legi, “Di aʼge yu aʼge owi yorogwiam edip lok agalat libago ai ʼgelaʼge, his dem wene dokhumsogo henaluk agalat, pobirak pogulat, togulat e, aphwami enebe henedesogo welegep ai aʼge loksogoat henedeabonobogup en,” seʼban ese legi o.

¹⁰His asogo pobirak poluk togu lorogup holuk, henede en e, “Yu re, op. Tu aʼge o,” ogulat, “Ai re, wiak. Tu puk aʼge o,” ogulat, pobi togu lorogup ai o. Asogo togup holuk, Kristus wema ai erlige, wene henebam erlaksogoat, op degelak oruakma wema ai o.

¹¹Di aʼge yu aʼge owi yorogwiam edip lok agalat eʼgen egesiso ʼgelaʼge, at Yesus Kristus en takhenebasu lema ano pam, henebabut hegitsogo logon eminat togwi modok wolorogup holuk, at ebe wagoam e, aphwami logon en Allah hau worogulat, erliktogulat, tua o.

¹²Narilak norokhwi. Wene yu henaluksogo moʼgulhentaik. An disogo taknebegesa yu pam e, op wene erlak om erlakma en lok etil lasu o.

¹³An Paulus Kristus ebagerat neʼgik herle werigisema, welegi ya pam e, is ap at Kaisar onuk logo aʼge at owi pam ʼguano oluk, ʼgodukmu ʼgagalak welagai aʼge ʼberlek emin, is aphwami logon yema aʼge ʼberlek emin en e, enak aʼge pobirak nobogwi o.

¹⁴An neʼgik herle wusogo nebegesema welegi yu en, Allah eiyagai logon enebe lok akhit enede nonue ʼgain Onuk Logo aʼge pam heʼberik poluk hurle agarik e, wene Kristus paget eniak pam ʼbaksogo moʼgulontogulom onogorlok erlak ago ai o.

¹⁵Is ai ado pema en enede wiak agarik e, an nebam ʼbou togulat, moʼgulontogwi ai o. Aʼgeat de, is ado pema en enede op welat e,

¹⁶“At Allah en Paulus yoʼgo pasulat e, Aphwami en op wene ai demat opouwagoluk ʼbaksogo moʼgulentasu lemen o, oluk yoʼgo pesimu hogu lege,” oluk, enak aʼge pobirak noboluk nebe enede en wene at Kristus paget moʼgulontogwi ai o.

¹⁷Aʼgeat de, is ado pema ʼbou togwi aʼge ai en, wene Kristus paget moʼgulontogwi ai, enede mesigat welat moʼgulontogwi puk. We, enede en e, “Paulus eʼgik herle werak oruak ai, ebe wiak emak,” oluk, onuʼgwarek ononuk lok emagolugat moʼgulontogwi ai o.

¹⁸Aʼge re, is pema en enede ʼbiren welat moʼgulontogulat, is pema en enede mesigat welat moʼgulontogulat, togwi aʼgeat de, wene Kristus pagerat moʼgulontogwi holuk e, yogunat o. Nogola nagai hasu legi o. Disogo taknobogukhwe, his en seʼban an nebaget ogu lomma re, Yesus Kristus Arogun en an letniogukhwe, Allah en delnobua ani, oluk an naluk welat, nogola nagai hasu leigat o.

²⁰An nede en e, wene Kristus paget u neʼgerli om erlakma en moʼgulentasu lom nagai o. Holuk e, neʼgerli om erlakma en moʼgulentasu leik o, oluk, pobirak poluk nogola op welegi o. Nin hwedik nan hwedigat ʼbaksogoat moʼgulentasu legi ʼgelaʼge, yogodak asogoat moʼgulentaigoluk welegi o. Nebe nelaluk wolomma obat o. Ye, waromma ogo obat o. An asogo taknobogukhwe, nebe ebesigat Kristus paget taga legi ano pam, aphwami en Kristus erliktuagolugat welegi o.

²¹Asogo welegi ai en, nogola en e, nebe nelaluk welago ai, Kristus pagerat. Ye, waragoam e, op aʼge sabuthwerlaik ai o.

²²Nebe ʼgwiangma yema nelaluk welat pobuk Allah iabuk loksogo tu aʼge welegi ai en, nelaluk wolom hwi a? Warom hwi a. ʼGe aʼge aiktik e, oluk, neperlak ago yo.

²³An tu aʼge wene ʼbiren oruak ai en, nede ʼbiren ago yo. An wareiktik e, Kristus eminat wolomma re, op o. Ebe op modok e, aiat o.

²⁴Aʼge re, an his henebaget ʼgwiangma yema nelaluk wolom obat o.

²⁵An wene ai paget pobirak poluk, weleik, oluk nalugat o. His henede Allah ebam heʼberik welat, hurle agalat, honogola henagai hogulat, togu lorogup en e, his henebe ʼberlegat nemin wolomulat o.

²⁶Wolomogoluk, an pobuk heneʼbek weikmu re, his Kristus Yesus emin hwedik welat honogola an e, “At Paulus emin welege o,” oluk, an nebaget nomot waguptik honogola henagai aʼbik hagup ani o.

²⁷Wene op wene Kristus en tegei wene ano pam, “Aphwami disogo togu lomup, asogo togu lomup,” oluk moʼgulhontogwi aʼgeat togu lomup o. Asogo togulat, henebe laʼbulogo togulomma re, is aphwami logon en honobok ogulat e, “Is enebabut e, op wene moʼgulontogwiam hologwi hegitsogoat enede Allah pam heʼberik poluk ningsogoat edik oruak o,” oluk, an nebe walegat oruakma moʼgulnema hwi a? Heneʼbek weiktik nil hentaik hwi a. Wene op wene moʼgulhontogu lege ʼgelaʼge, henemin laʼbulogo welat, weim obogulat ningsogo obogwi ʼgelaʼge, wene ai paget ogo ningsogo togu lomup o.

²⁸Is pema en e, “Wene ai nenebit o,” oluk, ogukhweat de, his nak e, honogorlok om erlakma en ningsogo modok tenak welemis o. Asogo tenak wolorogup ai pam, is ai nal ema oluk enagat agalat, his delhonobua oluk enagat agalat, Allah enat tua aʼge oruak o.

²⁹At Allah ebabut op en, his henede Kristus pam heʼberik pouwagoluk nak yoʼgo henebesi puk. Erlak o. At ebaget di obotut yu obotut hogu lemagoluk yoʼgo henebesi o.

³⁰An naduk e, weim obogulat ningsogo obogwi ʼgelaʼge, op wene paget ningsogo tagoma henil niegebat ani o. Ye, yogodak nobok hologu legebat o. Ai aʼge, his henemin ogo laʼbulik togu legeat ai o.