Read Silimo Filipi 2 Bible Online

Filipi 2 - Silimo bible

Filipi 2

¹Nis Kristus emin hwedik welat, at en nenede ago watnentasulat, nenebe edesogo nenede sebeliselat, Arogun emin hwedik welat, letnentasulat, tisokhwe nis-nis nede-hedesogo togu lege ai en,

²an loksogo nogola nagai hasu leik en, henede mesigarat wolomup o. Asogo welat his-his nede-hedesogo mesigat aʼge togulat, henebabut henede mesigat welat, togu lomup o.

³Di aʼge yu aʼge tuogoluk, henede en e, “An nak opsogo taga leik o,” oluk, honuʼgwarek en logo ʼgelaʼge poluk togu lorogup no yo. Henede en honuʼgwarek erlikhorlo erlakma enat, “Is logon op o. An e, mia o,” oluk, opogu lomup.

⁴Asogo opogulat e, henebe loʼbok honuʼgwarek henebaget nak eberogu lorogup no yo. Is aphwami mu aʼge enebaget ogo enebam eberogu lomup o.

⁵Henebabut e, at Kristus Yesus en ede eberise laga ʼgelaʼgeat eberogu lomup o.

⁶At ebe re, Allah aʼgeat welat, ogola en e, “An Allah emin hegitsogo welegimu re, yu ʼgelaʼgeat modok weleik o,” oluk opo erlakma en,

⁷uʼgwarek epenen enat ukpoluk, nis aphwami nenemin hegit agarik e, ebe neneragam aʼge ʼgelaʼgeat aga ai o.

⁸Ye, at uʼgwarek en onuk erlagap pesirik e, “An nebabut e, naik en, Waremak, oluk, epesi hegitsogoat iak hwelak weleik o,” oluk, ebe e pam edikpoluk woruagolugat epesi ai o.

⁹Asogo epesi ai en, ebe Allah enat logo pesi. Logo pesirik e, is logon ononuk sebelak ʼgelaʼge oruakhwe, at nak e, ʼgain Onuk Logo aʼge oluk e, logo aʼgeat tuelak pesi ai o.

¹⁰Is ʼbogorl pam aʼge emin, ʼgwiangma aʼge emin, ʼgwiang opma orogobu aʼge emin, ʼberlegat at Yesus erliktogulat, ondogorlu pam hurotluk enebe loʼbok, at eragam ʼgua ai o.

¹¹Asogo ʼguarik, enemde pam loʼbok nenaik Allah erliktogulat e, “Nonue ʼgain Onuk Logo aʼge Yesus Kristus aiat o,” oluk, ʼbaksogoat ua ai o.

¹²Narilak norokhwi. Henebe nede o. An nemin welat, niak nin hwedik nan hwedigat osokhwe hologo togu legep ai ʼgelaʼgeat, an yogodak nebe walekma oruakhwe, niak aiat logo poluk e, hologo modok togu lomup o. At Allah en, his togu lemagoluk, henede ʼgagalogo takhenebasuam, his honogola en e, “I, nis asogo togulom nenagai o,” oluk ogulat, Allah ogola agai aʼge togu legep ai en, at ebe honogorloksogo honuak erlik-erliktogulat, “At en delnonobua o,” oluk ai pagerat togwi modok wolomup o.

¹⁴His en e, at Allah il pam wene henebam erlagat, ye, wiak aʼge honogola erlagat wolomogoluk holuk e, henebe Allah eiyagai wiak togwi erlak degelak modok welat, o hiktak oruakma hwesagal yeriselat atiarak pasu ʼgelaʼge, aphwami yema enebabut wiak welat wiak togwi aʼge eneʼgerlakma en atiarak welat, di aʼge yu aʼge togulat, “Nenebit,” oluk uarek-ʼbuareksogo tu erlakma enat, wene ʼbalu erlakma enat, togu lomup o.

¹⁶Asogo togulat, di aʼge yu aʼge soʼbusogo wogontouwogoluk onugontogwi ʼgelaʼge, wene aphwami enebe enelalugabenebiso wene ai moʼgulentil noʼgu lomup o. Asogo moʼgulontogu lorogup holuk e, at Kristus wema ai erlige, an en, “Mep si-sagalsogo nannisogoat taga legi aʼge ai we ʼburlat almasogo tu erlak o. We, Kristus paget elirat tagenebegimu o,” oluk nalong eik o.

¹⁷Aʼge re, aphwami en wam domba wam Allah paget, wusogo narlik pouwogoluk, oʼborl pam anggur eʼgen aʼbosu ʼbelabogwi ʼgelaʼge, his henede Allah pam heʼberik poluk wogogwiam, oʼborl pam aphwami en an nebe wusogo nemep ʼbelabua holuk, an nogola nagai hasuam his ʼberlegat honogola henagaiat ho yo.

¹⁸Asogoat, his honogola henagai hogwiam, an nogola nagai hoat o.

¹⁹His eba togu legep aʼge paget, honobok an naluk emarik nede op emagoluk, nede nonue ʼgain Onuk Logo aʼge Yesus ebam heʼberik oruakma, at en letniasu ai pam, at Timotius ano perleneat heneʼbek perakpou weigoluk epasu legi o.

²⁰Is aphwami logon yema enebabut mu ʼgelaʼge oruakhwe, at Timotius omuat ebabut an nebabut ʼgelaʼge welat, his henebe edesogo henebam demat eberak welago yo.

²¹At asogo oruakhwe, is aphwami ai enebe ʼberlek en e, Yesus Kristus paget tu erlak welat, onuʼgwarek paget nak logo poluk togwi o.

²²Aʼge re, at Timotius ebabut enagat tiso ano henaluk o. Eneiyagai en enaiklak lerontogwi ʼgelaʼge, at ebe re, Allah eragam welat an letniaiyogoluk op wene ano neʼbirek en moʼgulentil noʼgu legerigat o.

²³An taknobouwa aʼge wene ebe seʼgeksogo naluk ago holuk e, at ebe perleneat his heneʼbek perakpou weik, oluk epasu legi o.

²⁴At ebe perakpou weiktik e, an nede nonue ʼgain Onuk Logo aʼge ebam heʼberik welegi ai pam, at en letniasuam e, nebe perleneat weigoluk epasu legi o.

²⁵At nenari Epafroditus an Allah paget nematek en tu modok mia oruakma, letniouwagoluk neʼbek perakpou wegepma re, weim obogulat ningsogo obogwi ʼgelaʼge, neʼbirek Allah paget ningsogo togu legerik e, pobuk togolik heneʼbek perakpou weik epasu legiat o.

²⁶At ede en epasulat, “An nebe ou wegi ano, nobok is enesaʼgo hweligisarik, noʼgosogo togwi,” oluk, wenemennei yat horok eberiselat, “Is ʼberlegat eneʼbek laik o,” oluk epasu.

²⁷Ebe re, ou wik-wok warelep aʼgeat de, an nede wiak oruakhwe warelepma re, pobuk nede modok wiak emano oluk, Allah en at ebe edeat, ye, an nebe ogo edeat, welat, obap pesimu ebe selang egeitik oruak ai o.

²⁸At ebe pobuk heneʼbek wagoam henil holuk e, his honogola henagai hogulat, an nogola wiak welegi aʼge op agalat, tuogoluk e, perleneat heneʼbek perakpou wegi ai o.

²⁹At ebe wagoam e, nonue ʼgain Onuk Logo aʼge emin hwedik welat e, honogola henagai hogulat at ebe womup o. His en noʼgosogo letnio ʼgelaʼge ai en, henebalema at en letniaiyogoluk e, “Nebe wareik holuk obat o,” oluk, Kristus paget tagalat warelep aʼge ai o. Is aphwami logon enebabut at tago ʼgelaʼge togwi aʼge holuk heniak hau doʼgoksogo waronobogu lomup o.