Read Silimo Filipi 3 Bible Online

Filipi 3 - Silimo bible

Filipi 3

¹Narilak norokhwi. Wene ado moʼgulhentaik en e, nonue ʼgain Onuk Logo aʼge henemin hwedik welat, honogola henagai hogu lomup o, oluk egi ai o. Is logon en wiagaphonobo erlakma en henebe op welemagoluk, wene naduk pelal wokho perakpou wegi aʼgeat de, nagaukhwak erle om erlakma en pobuk niak lagaksogo moʼgulhentaigat o.

²Is aphwami logon enebabut mene orlomene ebabut ʼgelaʼge ai en, di paget yu paget wiak togulat, “Henagap heneʼgerlimu aʼge ʼbalogo ukpomup o,” oluk henede ʼgagalu agaimuno oluk e, henebabut heberlogo wolomup o.

³Nis e, nenagap neneʼgerlimu aʼge arat ʼbelak wolom ʼgelaʼge, ebe demat aʼge togu lege o. Allah Arogun en nonogola ʼgagalisokhwe, Allah ebe erliktogulat, Kristus Yesus emin hwedik welege, oluk erlikhorlogulat, togulat e, di wene yu wene nenagap oʼborl oʼgwe aʼge yu paget togu lege ai pam obapnonobua oluk opogu lege erlak o.

⁴Nenagap oʼborl oʼgwe aʼge yu paget togu lege ai pam obapnonobua oluk opo aʼge hegit wellepma re, is aphwami logon en mia ʼgelaʼge opogukhwe, an nak e, logo ʼgelaʼge epasulle o.

⁵An nebe dagegimu agauwa sabiren welegesarik e, agauwa mesik pam, nagap neʼgerlimu aʼge ʼbalnebigisa ai o. Nebe Israel aʼge, naʼgul onuk Benyamin aʼgeat, nia naik Israel aʼge no oluk e, nebe Ibrani aʼge ai demat Ibrani aʼgeat dagegi o. Wene Allah en nenesaʼgo weregei wene ano paget, ap Farisi aʼge en tenak welagai ʼgelaʼge, ningsogoat tenak welegi aʼge ani o.

⁶Allah paget aʼgoluksogo togwi aʼge ai, an asogoat op taga legi ʼgelaʼge, Allah eiyagai enede Yesus ebam heʼberik pegesa aʼge di obotut yu obotut tagenebil denaga legi ai o. Asogo tagalat, wene Allah en nenesaʼgo weregei wene ano hegitsogo togwi ai, an modok hegitsogo tagoam, aphwami logon en wene nebam po erlakma enat degelak modok welegi ani o.

⁷An naduk, asogo tagalat, “Saburise legi ani o,” oluk epegi aʼgeat de, yogodak e, Kristus ebe wegi pam en, “Naduk taga legi aʼge ano, nal aga legimu hegi o,” oluk pobi taga legi o.

⁸Asogo pobi taga legi ai nak puk o. Nue ʼgain Onuk Logo aʼge Yesus Kristus naluk egi ai op modogat o. Di aʼge yu aʼge mu ebelesogo taga legi ano, nal om aʼge paget taga legimu oluk, pobi taga legiat o. At ebe hwerlegirik e, emin hwedik modok wolomogoluk, yabuk al aʼge ʼbalogo lebikpogwi ʼgelaʼge, di aʼge yu aʼge naduk taga legi aʼge ebano, “We aʼgeat o,” oluk ukpegi ai o. Wene Allah en nenesaʼgo weregei wene ai pam, nuʼgwarek en hegitsogo taga legi puk. Is aphwami logon enede Kristus ebam heʼberik pogwiam, wene enebam aʼge noʼgorlogo wokholuk pobuk Allah emin hwedik tagenebasu ʼgelaʼge, an asogoat nede at ebam heʼberik pegimu, wene nebam welaga aʼge noʼgorlogo wokhesi ai o.

¹⁰At Kristus di obotut yu obotut hil hil waraga ʼgelaʼge, nemin hegitsogoat, an asogoat obotut hil hil warom epasu legi o. Ai en, at waragama, Allah anni pam elalugaptegei ʼgelaʼge, an asogoat wareikmu, nelalugapnobua, oluk, ebam eberagat welegi o.

¹²Aʼge re, an yogodak ya, nede modok hurle agalat, ebe op aʼge ai arat hwerlasulat, tegis puk. Owan o. Op aʼge ai an horlouwagoluk, Yesus Kristus en nebe woknebegei ai en, ebe hwerlai laigoluk, nenannisogo taga legi o.

¹³Narilak norokhwi. An ai ebe arat hwerlegi oluk nede epasu legi erlak o. Ai hwerlai laigoluk wene mesigat aʼge yuat taga legi o. Ai ebe re, naduk taga legi aʼge, nebabut heberlegirik, noʼborl akhit ukpoluk e, pobuk ʼget aʼge norogolema oruak aʼge ai hwerla laigoluk nannisogo motluk lasu legi o.

¹⁴Kristus Yesus emin hwedik oruakma, at Allah en yoʼgo nebasulat e, “Op aʼge ʼbogorl pam aʼge wokheik,” oluk obok moʼgulnesimu, ebe hwerlai laigoluk, sa omut oruak sa omut erlak pungtak lagai ʼgelaʼge, nannisogo motluk lasu legi o.

¹⁵Holuk e, nis nenede hurle aʼge yu re, wene ai paget pobi togu lomok. Asogo aʼgeat de, his henede wene mu aʼge pam oborogu legep holuk e, pobi tuagoluk at Allah en pobisogo moʼgulhontouwayat o.

¹⁶Aʼgeat de, yogodak nenebabut wene ai hegitsogo til waga lege ʼgelaʼgeat, asogo modogat til laga lomok o.

¹⁷Narilak norokhwi. His henebabut an taga legi ʼgelaʼgeat, an nebabut wokho, asogoat togulat, is aphwami logon en nis nenebabut wokho togwi aʼge ai, henil en wogonobogu lomup o.

¹⁸An naduk e, agauwa pobuk naduk moʼgulhentegis ʼgelaʼgeat, yogodak niak togolik lagaksogo moʼgulhentaigat o. Aphwami enebe esan en, “Kristus nis nenebaget e pam edikpoluk werigisa ano, nenebit o,” oluk emin il ʼbelak ʼgelaʼge welat enebabut wiak togwi aʼge ai enebaget nge tagalat moʼgulhentasu legi o.

¹⁹Is ai enede Allah pam heʼberik wolom aʼgeat de, enebam aganhan agoam togwi aʼge ai pam heʼberik welat, eneʼgerli ho aʼgeat de, op oluk ai paget eneʼgerli erlaksogo erlikhorlogwi ai o. Asogo togulat e, enede di nagai yu nagai, wene ʼgwiangma aʼge pam eberogwi ai, ologun pam arat wiagabonobua o.

²⁰Asogo aʼgeat de, nis nonowi edip ʼbogorl pam oruak o. Nonowi edipmu eba en, nonue ʼgain Onuk Logo aʼge Yesus Kristus pobuk delnonobuma ai yetharok welege o.

²¹At ebe wemarik e, nenebe neneʼgerli ʼgelaʼge welege aʼge yu re, at anni pam di aʼge yu aʼge ʼberlegat, at eragam onobouwa ai en, at ebe erliktogwi ʼgelaʼgeat, nis nenebe erliknonobu aʼgeat taknonobouwa o.