Read Silimo Kolose 1 Bible Online

Kolose 1 - Silimo bible

Kolose 1

¹His Allah eiyagai o Kolose odoktugu legep aʼge Kristus emin hwedik welat, at ebaget henebabut heʼbisogo togu legep aʼge, narilak norokhwi. An Paulus Allah ede epesi pam, Kristus Yesus en yoʼgo noboluk peraknobou wagama wegi aʼge ano, nonot Timotius neʼbirek en wene yu pelal wokho heneʼbek perakpou wege ai o. Nenaik Allah ebabut op ano en, op aʼge wokhentasulat, henede haʼbugaphenebasulat, taga lemak o.

³Is logon en his moʼgulhontogulat e, “His henaʼge op aʼge Allah en wokhontouwa aʼge ʼbogorl pam henebesimu oruak o,” oluk moʼgulhentigisema, henede Kristus Yesus ebam heʼberik poluk, togwiam, is logon en e, “Is enede Kristus ebam heʼberik poluk Allah eiyagai logon ʼberlegat enedesogo togwi o,” oluk, honobok ogukhwe nenesaʼgo hweligerik e, nin hwedik nan hwedigat seʼban his henebaget ogulat, nonue ʼgain Onuk Logo aʼge Yesus Kristus aik Allah at hau worogu lege o. His wene op wene, Allah ebabut op en tagenebasu wene ano naduk nadugat moʼgulhentau wegesema, henesaʼgo hweligeptik e, demat oluk pobi tigep ai hwerli, Allah en obaphenebiso ʼgelaʼge, op wene ai o di owi yu owi wiyaletil lasulat, Allah en aphwami asogo obabenebisoat o.

⁷Op wene ai, at Epafras nenare nenede hwedik aʼge en moʼgulhentasukhwe moʼgulhwerlegep ai o. At ebe re, Allah eragam aʼge nis nenemin hegirat welat, Kristus en yoʼgo poluk, perakpou wagama, nis en moʼgulhonto ʼgelaʼge nenebalema ebabut heʼbisogo welat moʼgulhentasu ai o.

⁸At ebe neneʼbek wagarik en e, disogo egei, “Is enebabut e, aphwami logon enedeabonobogwi ai aʼge, Allah Arogun en wogentasuam, aphwami logon enedesogo togwi o,” oluk, honobok dokhumsogo moʼgulnentau waga ai o.

⁹Honobok asogo osokhwe nenesaʼgo hweligerik e, nis en his henebaget seʼban ogulat, Allah yoʼgo pogulat, mo u erlakma en ogwi modogat welege o. Asogo ogulat Allah Arogun en henede ʼgagalisoam, henede modok ʼgagalogo wene pobirak poluk e, at Allah ogola agai epasu aʼge ai his en, dokhumsogo henaluk welemagoluk yoʼgo pogu legeat o.

¹⁰Asogo henaluk oroguptik e, nonue ʼgain Onuk Logo aʼge ogola opsogo re, at agai epasu aʼge hegitsogo togulomat o. Di aʼge yu aʼge owi yorogwiam edip lok agalat eʼgen egesiso ʼgelaʼge, his Allah ebabut henaluk agalat, di aʼge yu aʼge op aʼge nak togulom ai o.

¹¹Nenaik Allah anni aʼbik erliktogwi aʼge ano henanniaphenebisoam, his henannisogo modok wolorogup en yoʼgo pogu legeat o. Asogo henanniaphenebasuam, di aʼge yu aʼge eʼgin henebam agokhwe, henede ʼbugom erlakma en, henepe mosogo welat, honogola henagai hogulat,

¹²nenaik Allah hau worogulat, togulom ai o. At nenaik en, at eiyagai logon eneminat o dakharakma honowirak aʼgeat welemagoluk takhenebesimu welegep ai en, arat hau worogu lom ai o.

¹³Nis naduk o hiktakma wiak aʼge en eragam herle wusogo tennentarok oruakma, Allah en herle hebilogo woknonoboluk e, omlogo ede hwedik aʼge ano tennentarok welemagoluk eragam nenebesimu welege o.

¹⁴Allah en asogo herle hebilogo delnenebegei ai, ebe re, at omlogo enat herle hebilogo delnenebegeitik, di wiak yu wiak togu lege aʼge ano, arat hosogo erlagaptegei ai o.

¹⁵Allah ebe nenil hogwi modok erlak aʼgeat de, at ebe nenil ho ʼgelaʼge re, Yesus aiat o. At Allah en, di aʼge yu aʼge, ʼbogorl pam aʼge emin, ʼgwiangma aʼge emin, nenil hogu lege aʼge emin, hogu lege erlak aʼge emin, walhesi ai o. Nenil hogu lege erlak aʼge logon e, malaikat enanni aʼbik welat eneragam tenentarok oruakma eniak hologo welagai aʼge aiat o. Allah en asogo ʼberlegat walhesi ai, ebe re, at Kristus enat, uʼgwarek ebagerat walhesi ai en, di aʼge yu aʼge ʼberlek eba, abel akhit ʼgelaʼge oruakhwe, logo re, Allah omlogo naduk dogo aʼge Kristus aiat o.

¹⁷At Allah en di aʼge yu aʼge owan walho erlak oruakhwe welagarik e, yogodak di aʼge yu aʼge ebaleʼgwe loʼbok oruak ai, at enat tenak oruakma re, op oruak o.

¹⁸Nis Allah eiyagai nonue ʼgain at Kristus welat, nenebe nenelalugapnenebiso ai en, at ebe eʼgik oyuk ʼgelaʼge welege o. Di aʼge yu aʼge abel pam ʼgelaʼge oruakhwe, at Allah en, “Logo re, an nomlogo naduk dogo aʼgeat welemak o,” oluk, at ebe waragama re, elalugaptegei ai o.

¹⁹At Allah en, “An nogola nagai e, an nebabut notok modok welegi ai ʼgelaʼge, an nomlogo asogoat neʼbirek hegit modogat welemak o,” oluk, ogola epesi hegitsogoat welago ai o.

²⁰Di aʼge yu aʼge ʼgwiangma aʼge emin, ʼbogorl pam aʼge emin, ʼberlegat Allah emin wiak egesarik, il ʼbelak ʼgelaʼge oruakma, at Allah uʼgwarek emin laʼbulogo enebesi ai ebe re, Yesus e pam edikpoluk werigisema emep namogo waraga ai pam laʼbulik enebesi ai o.

²¹Naduk e, his henede wiak wene eberogulat, henebabut wiak togu legep ano pam, Allah emin hektak welat il ʼbelak ʼgelaʼge welegep ani o.

²²Asogo aʼgeat de, his henebe at Allah uʼgwarek paget pagathorloluk, at il pam wene henebam erlaksogo op degelak welemagoluk, omlogo ebe waraga ai pam, uʼgwarek emin laʼbulogo henebesimu welegep ai o.

²³Holuk e, op wene henesaʼgo hweligeptik e, honogola en, “Pobuk op ema o,” oluk, epegep aʼge ai, henede oborlogouk oluk ʼgoboksogo ukpo erlakma en ningsogoat tenak wolomup o. Op wene ai, at en o di owi yu owi aphwami enebe ʼberlegat moʼgulentesi wene ai moʼgulentil nese lemagoluk, an Paulus yoʼgo nebesi ai o.

²⁴An yogodak ya re, at Kristus en e, “Allah eiyagai ʼberlegat an nebeat o,” oluk nis nenebaget di obotut yu obotut hil hil waraga ai, logon ho erlak aʼge ebalema, an nebe his henebaget di obotut yu obotut taknobogwi ai en nogola nagai aʼbik hasu legi o.

²⁵An e, Allah en, his henebaget, at eiyagai aʼge ʼberlegat eneragam aʼge welemagoluk yoʼgo nebesimu, wene Allah en egei wene ai ʼberlegat moʼgulentil denagalom hegitsogoat, moʼgulentil denaga legi ai o.

²⁶Wene ai, o edamat edipmu en di tahun yu tahun agalat, aphwami dagetil wagaihwe, Allah en aphwami moʼgulonto erlakma en at ogola hisogo welaga. Aʼgeat de, yogodak nis at eiyagai aʼge holuk, selakma ʼbaksogo moʼgulnentesi ai o.

²⁷At Allah ogola en e, is aphwami oʼborl oʼgwe aʼge ʼberlegat modok op tagonobouwa wene ai logo aʼge erliktu aʼgeat epesirik e, ogola hisogo welaga aʼge, at eiyagai holuk selakma ʼbaksogo moʼgulentaigoluk egei. Wene ai ebe re, Kristus his honogola oruak holuk, pobuk obaphenebasukhwe erlikhonobua aiat o.

²⁸Ai en, nis en e, wene Kristus obok ai ʼbaksogo aphwami ʼberlegat enebe loʼbok moʼgulentil laga lege. Asogo moʼgulentil laga lege ai pam, enebe loʼbok Kristus emin hwedik welat, enede hurle agaiam, Allah eʼbek wogonoboluk womogoluk, nenede ʼgagalak modok welat, enesaʼgo worogulat, wene moʼgulontogulat, til laga lege ai o.

²⁹An wene ai paget ologun ʼbalogo tigoluk, at Kristus anni aʼbik aʼge ano an nogola welat nanniapnebisokhwe, nannisogoat ningsogo taga legi ai o.