Read Silimo Kolose 2 Bible Online

Kolose 2 - Silimo bible

Kolose 2

¹An en e, his emin, is aphwami o Laodikia aʼge emin, is logon esanat emin, an nebe heneperlak aʼge paget nannisogo taga legi aʼge ai, his henaluksogo welemak, oluk moʼgulhentegis ai o.

²His henede ago werak welat, his-his henemin hwedik nede-hedesogo welemagoluk asogo taga legi o. His asogo welat e, “Wene ai demat o,” oluk, pobirak poluk, wenemennei modok ʼgaroksogo welat, wene Allah ogola hisogo welaga wene ano dokhumsogo henaluk ema o. Wene ai re, Kristus ebeat o.

³Allah ede ʼgagalak welat, di wene yu wene modok aluk ai en, at ogola hisogo welaga aʼgeat de, Kristus ematek en ʼbaksogo moʼgulnentasu o.

⁴Is logon eniak esei aʼgeat de, eniak demat ʼgelaʼge lalhonobuano oluk moʼgulhentegis ai o.

⁵An nebe walekma welegi aʼgeat de, nede his heneʼbek wagama re, henemin eba welege ʼgelaʼge o. Welat, henede Kristus ebam heʼberik poluk, henede mesigat ningsogo hegit-hegit togukhwe nil hentasu legi ʼgelaʼge re, nogola nagai hasu legi o.

⁶His en e, “Kristus Yesus nonue ʼgain Onuk Logo aʼgeat o,” oluk ebe hwerlegep ai en, emin hwedik modok wolomup o. Asogo welat, henebabut wene moʼgulhentigisa hegitsogoat,

⁷henemeʼgen Yesus ebam ningsogo yogo poluk e, henede at ebam daksogo heʼberik poluk, emin hwedik welat e, henede hurle ago modok welat, Allah hau worogwi modok wolomup o.

⁸Asogo togwi oruakma, aphwami logon enede ʼgagalak aʼge ʼgelaʼge, wene we aʼge eniak eseiyat moʼgulhontogulat, lalhonobuano oluk e, henebabut heberlogo wolomup o. Wene ai re, Kristus en egei aʼge hegitsogo ogwi puk. We, aphwami dagetil wagaihwe, eneʼbalak en e, “O yema di aʼge yu aʼge heʼberik e, muʼgat enebabut wiak aʼge aiat o,” oluk ogu legesa aʼge hegitsogo lalhonobogwi ai.

⁹Aʼge re, Allah ebe modok ebesigat Kristus ogola oruakma, aphwamiat daklau wagarik welaga ai o.

¹⁰Malaikat ʼbogorl pam aʼge emin, muʼgat enebabut wiak aʼge emin, eneragam tenentarok oruakma eniak hologwi aʼge, Kristus iak holu ebelerak ai en, his ogo re, at emin hwedik welat, henede ʼgaroksogo hurle egeptik welegep ai o.

¹¹His e, at emin asogo hwedik welegep ai en, aphwami eneʼgik en enagap eneʼgerlimu aʼge ʼbalonobogwi ʼgelaʼge ʼbalhenebigisema ʼbelak welegep puk. Erlak o. We, at Kristus enat henebabut honotogat welat wiak togu legep aʼge ano daksogo ukpesimu, henagap heneʼgerlimu aʼge ʼbelak wolom ʼgelaʼge welegep ai o.

¹²At Kristus waragama ebe werak aʼge saligisa ʼgelaʼge, his ogo ik olomu ʼbelaphonobogulat, at emin hwedigat salhenebigisa o. Ye, at emin hwedik werak oruakma, Allah anni pam elalugap pesi, oluk, henede at anni pam heʼberik pegep ai en, ik olomu en peiyalogo lagabak honoborlu agaiam e, at emin hwedigat henelalugaphenebegei o.

¹³His naduk e, henagap oʼborl oʼgwe aʼge paget heneʼgerlimu aʼge ano ʼbelak erlakma en, wiak togwi modok welat e, henebe werak aʼge ʼgelaʼge oruakma, at Allah en nis wiak togu lege aʼge erlagapsogo ukpoluk e, Kristus emin hwedigat oruakma henelalugaphenebegei ai o.

¹⁴Wene at Allah en nenesaʼgo weregei wene ano, nis en ukpoluk wiak togwi modok welege aʼge ai, pelal ʼgelaʼge ʼbelak wene lok aʼge nenebam oruakma, Yesus ebe e pam edikpoluk worogulat, nis wene nenebam welaga aʼge ano emin paku wusogo pegesa ai pam, Allah en wene ai ologun wusogo arat erlagaptegei ai o.

¹⁵At Kristus ebe e pam waragalat e, Iblis osi ʼgain aʼge enanni oruak aʼge emin mabenabonoboluk e, aphwami en enselei aʼge emin weim obogulat enanni emarik e, enebe enelaluk herle wusogo aphwami enil pam wogonoboluk wagai ʼgelaʼge, at Kristus en selakma eneʼgerli weregei ai.

¹⁶Ai enat, is aphwami logon en e, “Soʼboru emin, ik emin, no aʼge o. Ye, yu no puk aʼge,” ogulat, “Mo eria pam ʼbiso holuk, eria pam ligago holuk, disogo tu aʼge o,” ogulat, “Dugwi namiso holuk, disogo tu aʼge o,” ogulat, “Agauwa sabit aʼge pam Allah paget weat welat, disogo tu aʼge o,” ogulat, ogukhwe, his yogunat togumu, wene ai aʼge paget, wene henebam pouwa erlak o.

¹⁷Aphwami enebe owan wagaihwe enarogun naduk onorogolema wago ʼgelaʼge, Kristus ebe owan wom erlak oruakhwe, wema oluk wene ʼberlek ai aʼge naduk togu legesa. Aʼgeat de, ebe re, Kristus at o.

¹⁸Ye, is logon en e, enebabut onotogat welat ʼburlat erlikhorlogulat e, disogo ogwi ai o, “Nis aphwami nenebe re, uo. We, ʼgain aʼge re, malaikat Allah en yoʼgo peragonobou wago aʼge aiat. Holuk e, eneragam welat erligonobogulom, oluk an nabi ʼgelaʼge pam hasu legi aʼge en moʼgulhentasu legi ai o,” oluk enepenen enat Kristus emin hwedik aʼge lebikhonobouwogoluk moʼgulhontogwi ai, “Demat,” oluk henede epagup o.

¹⁹Nenebe yu nenaʼgul emin hwedik oruakma, neneʼgik nonoyuk eʼgerlim nenemeʼgen pam hwedik taknenebesimu, nonsoʼboru noʼgwiam aʼbosu nonuak eleʼgwe lasuam, nenebe lok aga lege ʼgelaʼge, nis Allah eiyagai Kristus emin hwedik oruakma, at Allah enat logapnenebasu ai o. Aʼgeat de, is ai asogo nonue ʼgain Kristus emin hwedik welegesarik en e, pobuk ʼgoboksogo ukpegesa ai en, eniak hologup o.

²⁰His Kristus emin hwedik welat waregep ai en, muʼgat ebabut wiak aʼge ʼgwiangma yema eʼgik tenak welago aʼge ano en henebe herle wusogo tenhentarok oruakma, Allah en herle hebilhenebegei ai o. Aʼgeat de, his henebabut is logon ʼgwiangma aʼge enebabut onotogat welat togwi ʼgelaʼgeat togu legep ai nopaget. Is ai en e, “Di aʼge yu aʼge logon heneʼgik ningsogo tenak pogulat, waltak nak pogulat, logon oduk nekhogulat, togup o,” oluk enesaʼgo werisoam nopaget hologo togu legep.

²²Wene ai, aphwami enat, di aʼge yu aʼge noʼgwiam erlak ago aʼge pagerat, “Disogo togu lomok o,” oluk wene ʼbelak hegitsogoat enesaʼgo worogulat, moʼgulontogulat, togwi ai o.

²³Is ai enepenen enat aphwami moʼgulontogulat e, “Malaikat eneragam welat erligonobugulat, honogola en e, Nebe uo, oluk ogulat, enede op emagoluk, eneʼgik, enesaʼgo, eneʼberli, yaga morogwi ʼgelaʼge, enagap pam wik-wiaksogo togulat, togulom o,” oluk wene enede ʼgagalak pam op aʼge ʼgelaʼge moʼgulontogwi ai o. Aʼge re, enebam aganhan agoam, wene ai pam en enede sebelu mia o.