Read Silimo Kolose 3 Bible Online

Kolose 3 - Silimo bible

Kolose 3

¹At Allah en e, Kristus elalugaptagalat, his heneminat henelalugaphenebegeimu welegep ai en, di aʼge yu aʼge Kristus ebe ʼbogorl pam Allah eragam eʼgik ʼbekhit akhit ʼgainat welagoma eba aʼge hwerlai louwogoluk, henannisogo togu lomup o.

²Henebe waregeptik e, pobuk Kristus eminat henelaluk wolorogup aʼge Allah en owan selakma po erlak abel akhit hisogo oruak ai en, henede re, di aʼge yu aʼge ʼgwiangma aʼge pam eberak erlak welat e, ʼbogorl pam aʼge pam eberogu lomup o.

⁴Eberogwi oruakma, at Kristus nenebe pobuk nenelaluk modok welemagoluk taknenebasu aʼge ano selakma wagoma re, his at eminat selakma orogupmu erlikhonobua ai o.

⁵Ai en e, henebabut honotogat welat, henede en di nagai yu nagai opogu legep aʼge ai wusogo ukpogu lomup o. Henebabut ai re, ʼbabi tenontogwi ai emin, onogola en, nagai oluk enelemak noʼgwi ai ʼgelaʼge, enede en noluk enebam aganhan ago ai emin, enil yerontoluk onogola en nagai opogwi ai emin, dogwi asua pam heʼberik wolom ʼgelaʼge, onogola en e, “Di aʼge yu aʼge, an naʼge nak wellep e,” oluk opogwi aʼge ai emin, henebabut ai aʼge ʼberlegat wusogo ukpogu lomup o.

⁶Is aphwami Allah iak enesaʼgo hologwi erlak aʼge en enebabut asogoat togumu, Allah olot het agalat, wiagabonobua aʼge oruak o.

⁷His naduk e, ai aʼge pagerat togulat, henebabut asogoat togwi modok welegep o.

⁸Asogo aʼgeat de, yogodak his henebabut logon yu aʼge ʼberlegat ukpemirat o. Onolot het ago ai emin, onogolaʼgwe het-ʼbet oso ai emin, is logon wiagabonobogwi ai emin, enemde pam e, onobok wiak ʼbalogulat, wiak togwi aʼge esegen obok ogulat, ogwi ai emin, ukpogu lomup o.

⁹Sum naduk aʼge noʼgorlogo ukpoluk e, pobuk ʼget ʼbuktogwi ʼgelaʼge, his henebabut naduk togu legep aʼge ukpoluk, pobuk henebabut ʼget aʼge wegeptikmu re, heniak esei ogu lorogup o. Henebabut ʼget aʼge ai, Allah enat walhentesirikmu no oluk e, at uʼgwarek ebabut ʼgelaʼge oroguptik e, ebe modok dokhumsogo henaluk emagoluk, pobuk nadugat takhenebasu ai o.

¹¹Asogo takhenebasuam e, nenebe ʼberlegat nonue ʼgain Onuk Logo aʼge Kristus emategatma re, nenebe ʼberlegat at emin hwedik welege ai en, enaʼgul onuk Yunani aʼge ogulat, Yahudi aʼge ogulat, ogwi ai emin, enagap eneʼgerlimu aʼge ʼbelak aʼge ogulat, ʼbelak erlak aʼge ogulat, ogwi ai emin, eniak oʼgut ʼbelak aʼge ogulat, enebe eneperlak aʼge ogulat, ogwi ai emin, eneragam aʼge ogulat, enematekma aʼge ogulat, ogwi ai emin paget e, asogo il lagalom mia o.

¹²His henebe, Allah en uʼgwarek ebaget pulogo pagathwerlesirik e, “An nuʼgwarek neiyagai o,” oluk, edesogo welago ai o. Holuk e, sum ʼget aʼge ʼbuktogwi ʼgelaʼge, henebabut disogo aʼge wemit o. Enebe enedeabonobogwi aʼge ai emin, enebabut enago welagai ai emin, onuʼgwarek en erlikhorlo erlakma en enede sebelak welagai ai emin, enebabut lioksogo togwi aʼge ai emin, enepe mosogo welagai aʼge ai emin, henebabut ai aʼge womup o.

¹³His-his mesik en mesik wiak takhonobogwiam, wene eʼgen po erlakma en henepe mosogo welat, erlagapsogo ukpogu lomup o. His wiak togu legep aʼge, nonue ʼgain Onuk Logo aʼge en erlagapsogo ukpesi ʼgelaʼge, his-his asogoat erlagapsogo ukpogu lomup o.

¹⁴Asogo togulat, ebe logo ʼgelaʼge re, aphwami enebe henedesogo wolomup o. Enedesogo welagai aʼge ai pam, henebe modok mesigat laʼbulogo wolom ʼgelaʼgeat wolorogup ai o.

¹⁵At Allah en Kristus ebe mesigat aʼge henemin laʼbulogo hwedik wolorogup oluk yoʼgo henebesi ai en, di paget yu paget tuogoluk, honogola en e, “Kristus en emin laʼbulik nenebesimu welege o,” oluk, wene aiat logap pogulat e, hegitsogo togu lomup o. Asogo togulat, Allah ebe hau worogu lomup o.

¹⁶Aphwami enaʼge aʼbik aʼge enilmu ʼbullak welagai ʼgelaʼge, his e, Kristus iak aiat henedemu ningsogo poluk welat e, honogola ʼgagalogoat, his-his wene henesaʼgo wat-wat ogulat e, wene his en moʼgulontogulat, is en moʼgulhontogulat, togu lomup o. Asogo moʼgulontogulat e, Allah paget weni Mazmur weni worogulat, weni Allah erliktogwi aʼge weni worogulat, Allah Arogun en henede ʼgagalisoam, weni pelalogo worogulat, togulat e, henedemu en Allah hau worogu lomup o.

¹⁷“Nenaik Allah en woknentasu aʼge ai, ebe Yesus enat woknentasu o,” oluk, Allah hau worogulat, “Nonue ʼgain Onuk Logo aʼge Yesus eragam welat togu lege o,” oluk, di aʼge yu aʼge ʼberlegat tuogoluk, heniak di paget yu paget uogoluk, at Yesus onuk ʼbalogo togu lomup o.

¹⁸His hwami norokhwi. Nonue ʼgain Onuk Logo aʼge emin hwedik welat henebabut tu hegitsogoat, honogunlak eneragam welat eniak hologo togu lomup o.

¹⁹Ye, his ap narilak. Honugwami wene harosogo yagonto erlakma en, henedesogo wolomup o.

²⁰Ye, his malik, nosi o. Henialak, henaiklak en, di aʼge yu aʼge paget moʼgulhontogwiam, eniak hologo togulomma re, nonue ʼgain Onuk Logo aʼge ebam liok ua ai en e, asogoat togu lomup o.

²¹Ye, his enaiklak yu, narilak o. Heneiyagai enede wiak emano oluk onolot herap pogu lorogup o.

²²His eneragam aʼge narilak norokhwi. Honuelak ʼgwiangma aʼge en, di bele yu bele tuagoluk ogwiam, enebe enil pam nak e, enede opsogo togulat, enil erlakma re, mo ogulat, togu lorogup o. At e, nonue ʼgain Onuk Logo aʼge honogorloksogo henede mesigat welat, honuelak eba eniak hologo tagonobogu lomup o.

²³Di bele yu bele togulat, honogola en e, “Aphwami enebaget nak togu lege erlak o. We, nonue ʼgain Onuk Logo aʼge pagerat o,” oluk, henede pam enat togu lomup o.

²⁴Henebe re, nonue ʼgain Onuk Logo aʼge Kristus at eragam welat, at ebagerat togu legep ai en, henede en e, “Nis togu lege ai paget, oʼgo re, at nonue ʼgain Onuk Logo aʼge Kristus en eiyerak nonobouwa aʼge oruak o,” oluk, henede pobirak poluk wolomup o.

²⁵Aʼge re, at nonue ʼgain Onuk Logo aʼge en e, aphwami onorogole nak pobirak poluk, logon olukhwema enebasulat, logon oʼborloma enebasulat, tago erlak ai en e, sa en wiak tegei aʼge paget, oʼgo wogoum ʼgelaʼge re, wiak tago ai hegitsogoat wene ebam pouwa aʼge oruak o.