Read Silimo Kolose 4 Bible Online

Kolose 4 - Silimo bible

Kolose 4

¹Ye, his is ai onuelak ʼgain aʼge, henede en e, “Nonue ʼgain Onuk Logo aʼge ʼbogorl pam oruak o,” oluk pobirak poluk e, honosi heneragam aʼge eba di aʼge yu aʼge wogonto hegitsogoat wogontogu lomup o.

²Seʼban e, Allah hau worogularat, henebit om erlakma en hwedik-hwadigat ogulat e, henebabut heberlogo wolomup o.

³Seʼban ogulat, nis nenebaget e, disogo ogu lomup o, “Naik Allah o. Wene Kristus en tegei aʼge wene, naduk hogola hisogo welaga aʼge ano, is Paulus lak en moʼgulentil denaga lemagoluk, ʼgoduk hurentemen o,” oluk, seʼban nis nenebaget ogu lomup o. Wene ai pagerat neʼgik herle wusogo nebegesema yema welegi o.

⁴Wene ai, an en moʼgulonto hegitsogoat, dokhumsogo moʼgulentasu leik en e, seʼban ogu lomup o.

⁵Is aphwami Allah iak eneperlak aʼge enebaget e, his honogola modok ʼgagalak welat, “Nis Allah eiyagai tu aʼge panoasuak ya pamat togu lomok o,” oluk ai aʼgeat togu lomup o.

⁶Heniak di paget yu paget is logon moʼgulontogulat e, di aʼge yu aʼge mayu pelogwiam oduk op ogwi ʼgelaʼge, “Wene ai op o,” oluk, wouwagoluk, heniak sakhosogo moʼgulontogu lomup o. Asogo moʼgulontogwiam, is henebam hin wogwiam, wene oʼgo enebe loʼbok moʼgulentagup en e, henaluksogo wolomup o.

⁷At Tikhikus nonot nenede hwedik aʼge, nis neneminat nonue ʼgain Onuk Logo aʼge eragam welat, at ebabut ebaget heʼbisogo tago aʼge en wene an nobok pobuk moʼgulhentauma ani o.

⁸His en e, “Is enebe asogo oruak hegi o,” oluk, wene henaluk emarik e, henede haʼbuk uagoluk, ai pagerat heneʼbek perakpou weik ani o.

⁹At eʼbirek wemagoluk, nonot Onesimus, ebe ap his aʼge ebabut heʼberik nenede hwedik aʼge ano, eʼbiregat peragonobou weik ani o. Is wemarik e, wene nis yema togu lege aʼge ʼberlegat moʼgulhentauma o.

¹⁰Aristarkhus an neʼbirek neneʼgik herle werak welege aʼge en hau wathonobogulat, Barnabas are Markus ano en hau wathenebiselat, tigisa o. At Markus paget wene naduk moʼgulhentegis ano ʼgelaʼgeat, at ebe heneʼbek wago holuk e, opsogo womup o.

¹¹At Yustus, onuk mesik Yesus ano en ogo, hau wathenebegeiyat o. Is ap Yahudi aʼge enebe re, henagan eria nak Allah eragam wolomul wene ano enemin en moʼgulontogulat letniogukhwe nede op ago yo.

¹²At Epafras, Kristus Yesus eragam aʼge, ebe his aʼge ano en, hau wathenebegeiyat o. At en e, his honogola en, “Allah iak ai demat o,” oluk pobirak poluk e, henede hurle oroguptik henebe edigat welat e, di aʼge yu aʼge Allah ede epasu ʼgelaʼge togu lorogup en seʼban his henebaget ningsogo oso modogat welago yo.

¹³Asogo eselat, his henebaget emin, aphwami o Laodikia aʼge enebaget emin, Hierapolis aʼge enebaget emin, annisogo tago oluk, an en ebabut ʼbalegistik en moʼgulhentegis ai o.

¹⁴At Lukas, ebe dokter welat ou obabenebiso aʼge, ebe nenede hwedik aʼge ano en hau wathenebiselat, at Demas en hau wathenebiselat, tigisayat o.

¹⁵Is narilak norokhwi Allah eiyagai o Laodikia welagai aʼge eba emin, hwe Nimfa ano emin, Allah eiyagai logon at owi pam odoktogwi aʼge emin, “Paulus lak en hau wathenebigisa,” oluk moʼgulontomup o.

¹⁶Wene pelal wokho heneʼbek perakpou wege aʼge ai, arat onuk moʼguloguptik holuk e, is Allah eiyagai o Laodikia odoktogwi aʼge enesaʼgo holuak en onuk moʼguluagoluk perakpomup o. Ye, is Laodikia aʼge eneʼbek perakpegi aʼge ano, his heneʼbek perakpou wagaiam, onuk moʼgulibat o.

¹⁷At Arkhipus ano wene disogo oluk moʼgulomup, “Nonue ʼgain Onuk Logo aʼge en yoʼgo hebasulat e, Yabuk an nebaget disogo tip o, oluk moʼgulhesi aʼge ai, ologun ʼbalogo tip o,” oluk moʼgulomup o.

¹⁸Yu nak e, an Paulus nuʼgwarek neʼgik en pelal wokho hau wathenebegis. His en e, “Paulus eʼgik herle werak oruak o,” oluk nebam eberak wolomup o. Allah ebabut op ano en tenhentarok welemak o.