Read Silimo 1 Tesalonika 1 Bible Online

1 Tesalonika 1 - Silimo bible

1 Tesalonika 1

¹His Allah eiyagai o Tesalonika odoktogulat, nenaik Allah emin, nonue ʼgain Onuk Logo aʼge Yesus Kristus emin, emin hwedik welegep aʼge, narilak norokhwi. An Paulus, Silas Timotius eʼbirek enemin en, wene yu pelal wokho heneʼbek perakpou wege ai o. Nenaik Allah ebabut op ano en op aʼge wokhentasulat, henede haʼbugaphenebiselat, togu lemak o.

²Nis en seʼban his ʼberlek henebaget hononuk ʼbalogo ogulat e, Allah hau worogwi modogat welege o.

³Nenaik Allah ilem seʼban asogo ogulat e, his henede Allah pam heʼberik welat henebabut togu legep aʼge emin, aphwami logon henedesogo welat, henannisogo lerontogu legep aʼge emin, henede en e, “Nonue ʼgain Onuk Logo aʼge Yesus Kristus en obapnonobua o,” oluk, henepe mosogo welegep aʼge emin, nis en his togu legep aʼge ai paget his henebaget meme u erlakma en, eberak modok welege.

⁴Narilak norokhwi o. His henebe Allah en edesogo welat polikhenebesimu welegep ai nenalugat o.

⁵Nis op wene woluk moʼgulhentau wege ano re, neniak pam nak moʼgulhontogu lege puk. We, Allah Arogun ano nonogola welat, annisogo letnentasukhwe, nonogola en, “Wene yu demat o,” oluk nenedemu pobi tigerik enat moʼgulhontogu lege ai. Nis o eba nenemin welat, his henebaget togu lege ano henalugat o.

⁶His di obotut yu obotut takhonobogukhweat de, honogola henagai hogu lemagoluk Allah Arogun en henede ʼgagalegeimu, henagai hogulat, op wene wegeptik e, nis nenebabut wogulat, nonue ʼgain Onuk Logo aʼge ebabut wogulat, tigep ai o.

⁷Nonue ʼgain Onuk Logo aʼge en tegei wene ano his oruakma eba en wiyaletil etil o Makedonia, Akhaya, laga ai o. Aʼge re, ai nak puk. His henede Allah pam heʼberigep aʼge eba, honobok op oluk, o di owi yu owi ʼberlegat lagama enalukmu re, nis en pobuk honobok moʼgulonto aʼge erlak aga o. Ai en e, aphwami o Makedonia aʼge emin, o Akhaya aʼge emin, op wene demat oluk wegesa aʼge ʼberlek en e, “Is op togwi o,” oluk, henebabut wokho togwi ai o.

⁹Is en ogo wene disogo ogwiat, “Is aphwami o Tesalonika aʼge en, Paulus lak enebe wogenebigisarik e, Demat o, Allah elaluk modok welago aʼge aiat o, oluk eragam welat, at ebaget togulat, at omlogo ʼbogorl pam en ʼbuma aʼge ai ebe yetharok welat, tuogoluk e, dogwi asua ukpoluk, onolukhwe edenogo Allah wogegisarik oruak o. Allah en omlogo waragama elalugaptegei aʼge, ebe Yesus aiat o. Ye, Allah olot het emarik wene aphwami enebam pasulat, nis Yesus ai enat delnonobua o,” oluk, honobok op ogwiat o.