Read Silimo 1 Tesalonika 2 Bible Online

1 Tesalonika 2 - Silimo bible

1 Tesalonika 2

¹Narilak norokhwi. His henede en e, “Is Paulus lak neneʼbek wegesa ai re, we ʼburlat wom erlak o,” oluk honuʼgwarek henalugat o.

²His heneʼbek owan wom erlakma en, o Filipi eba oruakma, aphwami eba aʼge en onogola mi-miarak nonoboluk di obotut yu obotut taknonobogu legesa. Asogo aʼgeat de, nenaik Allah en iak op wene ano nonogorlok erlaksogo moʼgulhentaumagoluk taknenebesimu wegerik moʼgulhontogwi oruakma aphwami aʼbik en, “Wene ai nenebit o,” oluk, ogukhweat de, nenannisogo moʼgulhontogu lege ano, henalugat o.

³Wene moʼgulhontogulat henesaʼgo worogu lege ai re, his nal emagoluk wene dagansogo moʼgulhontogulat, nenede ʼbiren welat moʼgulhontogulat, neniak eseiyat lalogo moʼgulhontogulat, togu lege erlak o.

⁴At e, we, at Allah enat nenebabut ʼbalogo en e, “Op wene ai, hisat woluk noʼgu lorogup o,” oluk, yoʼgo nenebesi hegitsogoat moʼgulontogulat, aphwami enede opsogo moʼgulontogu lege puk. Erlak o. We, Allah nenebabut ʼbaliso aʼge ano ede opsogo moʼgulontogu lege o.

⁵Nis nenede en e, di aʼge yu aʼge nenematek nenebam wellep, oluk opogulat, neniak pam en nak erlebesogo moʼgulontogu lege erlak ai, his henalugat o. Ye, Allah alugat holuk e, at enat, “Ai demat o,” oluk u ai o.

⁶His en nis erliknonobogulat, is pema en ogo erliknonobogulat, aphwami aʼge en asogo erliknonobuagoluk ogu lege erlak o. We, at Kristus en yoʼgo nonoboluk peraknonobou wagama wene eiye welat neniak ningsogo moʼgulhonto aʼge hegirat welege o.

⁷Asogo aʼgeat de, enialak en enemalik alnanosogo wogonoboluk tenentarok welagai ai ʼgelaʼge, nis his henemin welat alnanosogo tenhentarok welat togu lege ai o.

⁸Nis en his henebe nenedesogo welege ai en, Allah iak ai nak soʼbuthentige puk. Erlak o. We, henebe nenede hwedik en, nonogola nenagai hogulat, nenebe eminat wokhentige ai o.

⁹Narilak norokhwi. Nis Allah iak op wene ai moʼgulhontogwiam, di aʼge yu aʼge paget, his logon henebam seget emano oluk, nis nonuʼgwarek en hup erlige nenannisogo togulat, set li-lagaiksogo togulat, togu lege ano, henalugat o.

¹⁰His wene demat oluk wegep aʼge nis nenemi welat e, aphwami en, “Is wiak tigisa o,” oluk, wene nenebam po erlakma en degelogo welat, hegitsogo nak togu lege ano, his Allah eminat henalukmu re, “Ai demat o,” oluk u ai o.

¹¹His Allah eragam ʼgwi laguptik erliktogumu eba ʼgoluk wolorogup en yoʼgo henebesi aʼge ano ogola agai epasu aʼge hegitsogoat togu lorogup en e, nis en enaiklak en eneiyagai enesaʼgo worogwi ʼgelaʼge, henebe loʼbok henesaʼgo worogulat, henede sebelogulat, henede ʼgagalogulat, togu lege ano, his henalugat o.

¹³Nis en wene Allah iak ano moʼgulhentigema, his en e, “Wene ai aphwami eniak aʼge erlak o. We, Allah iagat o,” oluk wegep ai re, demat Allah iagat wegep o. Ai en nis mo u erlakma en Allah hau worogwi modok welege o. At Allah en his henede Kristus ebam heʼberik pegep aʼge henede ʼgagaliso modok welago yo.

¹⁴Narilak norokhwi. Is Allah eiyagai logon Kristus Yesus emin hwedik welat, o Yudea eba odoktogwi aʼge, onuʼgwarek enarilak Yahudi aʼge enat di obotut yu obotut tagonobogu legesa hegitsogoat, his honuʼgwarek henarilak enat di obotut yu obotut takhonobogwi o.

¹⁵Is ap Yahudi aʼge enat, is ap pageat Allah iak moʼgulontogu legesa aʼge enebe waronobogulat, nonue ʼgain Onuk Logo aʼge Yesus ebe worogulat, tigisa ʼgelaʼgeat, nis di obotut yu obotut taknonobogwi ai, Allah en op oluk epasu erlak. Is ai aphwami enemin wiak nak welat,

¹⁶Allah en is aphwami oʼborl oʼgwe aʼge delonobuagoluk nis en op wene moʼgulentil lagaimu, aphwami en is eneʼgebelaʼgwe ʼbalogwi ʼgelaʼge, is aphwami Yahudi aʼge en e, “Wene op wene ai moʼgulentagup o,” oluk wene ʼbalogwi ai o. Asogo togulat, nin hwedik nan hwedik wiak togwi aʼge ano ebam louksogo togwi ai en, Allah olot het agalat, wene lok aʼge enebam pesi ai o.

¹⁷Narilak norokhwi o. Nis en e, his henematekma honoboluk wegerik, yogodak ya we lodu paget nenebe walegat welege aʼgeat de, nenede his henemin mesikmu welege ʼgelaʼge ai o. Asogo welat e, “Onorogole nenil entai lolo e,” oluk, page enat nonogola nenagai aʼbik opogulat heneʼbek womogoluk walhogu legerigat o.

¹⁸Walhogulat e, an Paulus nuʼgwarek agauwa naduk mesik weigoluk walhasulat, pobuk mesik weigoluk walhasulat, tegis aʼgeat de, Iblis en neʼgebelaʼgwe ʼbalegeimu en mo egi ai o.

¹⁹Nis en e, “Op ema o,” oluk nonogola nenagai hogu lege ai re, salak enebaget no. Nonue ʼgain Onuk Logo aʼge Yesus ebe wemarik e, “Op tigep o,” oluk, at ilem enagat taknonoboma nenalong ema ai, edip ʼge pam en no. Edip mu aʼge paget puk. His henebe henebagerat nenalong ema o.

²⁰Nonogola nenagai hogulat, nenalong agalat, togu lege ai his henebe henebagerat o.