Read Silimo 1 Tesalonika 3 Bible Online

1 Tesalonika 3 - Silimo bible

1 Tesalonika 3

¹Nis his henebagerat nenede sebelu mia agama re, disogo ege. Nis o Atena yema nenemategat wolomul o.

²Oruakhwe re, at nonot Timotius, op wene Kristus tegei wene ano neneminat, Allah paget moʼgulentil noʼgu lege aʼge ano, aphwami en di obotut yu obotut takhonobogwi ai en, his henede Kristus ebam heʼberik pegep aʼge lebe uano oluk, henede ago wathenebiselat, henesaʼgo weriselat, taga lemagoluk heneʼbek perakpou wege ai o. Di obotut yu obotut takhonobogwi ai, Allah en poliknenebasulat e, “Asogo takhonobogu lema ani o,” oluk egei hegitsogoat taknonobogwi ai, henalugat o.

⁴Nis naduk his henemin welat, “Pobuk di obotut yu obotut taknonobogu lemayat o,” oluk, moʼgulhentige ano hegitsogo taknonobogwi ai henaluk o.

⁵Ai enat, at Iblis nenede ʼgagaliso aʼge ano en henede ʼgagalu omma, nis en his henebaget set hoporak togu lege ano ʼburlat almarom ai nebit e, oluk nede perik welat, nede sebelu mia agama re, “Enede Kristus ebam heʼberigat oruak a? Erlak a,” oluk at Timotius en henebabut ʼbalogo moʼgulnosumagoluk heneʼbek perakpou wegi ai o.

⁶Ye, at Timotius heneʼbek perakpou wegimu waga aʼge ano, yogodak togolik neneʼbek wagarik e, his henede Kristus ebam heʼberik welat, aphwami logon henedesogo togu legep aʼge ano moʼgulnentasulat, nis en, “Is enemin sarlok tolu e,” oluk nenagai opogu lege ʼgelaʼge, his en ogo asogoat nenebam eberak modok welat, “Is enebabut op aʼge ano enemin sarlok tolu e,” oluk, opogu legep aʼge ai, moʼgulnentau wagama re, nonogola nenagai aʼbik hogu lege o.

⁷Narilak norokhwi. Nis di obotut yu obotut wik-wiaksogo taknonobogukhweat de, his henede Kristus ebam heʼberigat welegep ai en e, his henebaget nenede op agama welege.

⁸Asogo welat, his nonue ʼgain Onuk Logo aʼge emin hwedik welat, ningsogo edik welegep ai en, nis ogo yogodak nenede yamuk egeimu welege o.

⁹Nis nenaik Allah ilemat welat, his henebaget nenagai hogwi modok welege ai paget, Allah hau modok aʼbik worogu legerikmu re, pobuk hau noʼgosogo woru ʼgelaʼgeat ago yo.

¹⁰His henede Kristus ebam heʼberik pegep aʼgeat de, owan ʼgelaʼge ai en, nis nenebe heneʼbek womultik en henede pobuk ago werakhonobumogoluk, seʼban his henebaget hup erlige ogwi modok welege o.

¹¹Nis pobuk heneʼbek wemagoluk e, nenaik Allah uʼgwarek emin, nonue ʼgain Onuk Logo aʼge Yesus emin, eʼbirek enat neneʼgebela hegitsogo yaknontuak o.

¹²Nis en his henebe nenedesogo welege ʼgelaʼge, his en ogo asogoat, his-his henedesogo togulat, aphwami ʼberlegat henedeabonobogulat, loksogoat henedeabonobogu lorogup en, nonue ʼgain Onuk Logo aʼge en henebabut enedeabonobogwi ai aʼge ebam louksogo logon eminat wokhentasu lemak o.

¹³Asogo takhenebasu lemarik e, nonue ʼgain Onuk Logo aʼge Yesus uʼgwarek osi eneminat wagoam e, henebe nenaik Allah uʼgwarek ebaget poluk, at ilem wene henebam erlak op degelak oruakma hentaumagoluk, henede hurleaphenebasu lemak o.