Read Silimo 1 Tesalonika 5 Bible Online

1 Tesalonika 5 - Silimo bible

1 Tesalonika 5

¹Narilak norokhwi. Aphwami logon yogorlia wouwogoluk hubaʼgo wongat oruakma wagai ʼgelaʼge, nonue ʼgain Onuk Logo aʼge wema ai erlige asogoat oruakma wema oluk, his seʼgeksogo henalugat welegep ai o. Holuk, an en e, “Di erlige ema, yu erlige ema,” oluk, pelal wokho heneʼbek perakpou wom mia o.

³Aphwami en e, “Nis op lioksogo welege o,” oluk, ogukhwe re, hwami enemalik onogola aʼge wongat oruakma enebe dagonobuogoluk hegit agoam onoʼborl nonouk wiaksogo togwi ʼgelaʼge, asogoat is aphwami wongat oruakma wiagabenebisoam hweiye libom aʼge erlagat ema o.

⁴Aʼge re, narilak norokhwi. His o hiktakma wellep holuk e, aphwami wongat oruakma yogorlia wouwogoluk wagaimu enarogun lebikpogwi ʼgelaʼge, ai erlige his wongat oruakma henarogun lebikpelep ai o. Aʼge re, his o hiktakma welegep erlak ai en, henarogun lebikpouwa erlak o.

⁵Aphwami o erlige dakharakma welagai ʼgelaʼge, his ʼberlegat o dakharak ai eiye aʼgeat welegep o. Nis e, hubaʼgo o hiktakma welagai ʼgelaʼge, ai aʼge eiye welege puk. Erlak o.

⁶Holuk e, is ado nogo ʼgelaʼge nogogwi ai, nis asogo nogogulom mia o. We, nenebabut heberlogo welat, nenede weʼgerlogoat wolomok o.

⁷Aphwami nogogwi ai re, hubat nogogwi o. Ye, anggur eʼgen aʼbosu noluk enede ʼbalagai ai re, hubaʼgoat noluk ʼbalogwi o.

⁸Aʼge re, nis o dakharakma welege aʼge yu, nenebabut heberlogo welat e, aphwami muon en waronobuano oluk sing enebagaseʼgwe ʼbuktogwi ʼgelaʼge, nenede Allah pam heʼberik welat, aphwami enebe nenedesogo welege ai aʼgeat ʼbuktogulat, enaʼgul pam waronobuano oluk enaʼgul sum erik aʼge ʼbuktogwi ʼgelaʼge, Allah en delogo obapnonobua oluk, nenede op welege ai aʼgeat ʼbuktak poluk, togu lomok o.

⁹Allah olot het nis nenebam poluk wiagapnenebiogoluk poliknenebesi erlak o. We, nonue ʼgain Onuk Logo aʼge Yesus Kristus en delogo obapnonobuagoluk poliknenebesi o.

¹⁰At Yesus ebe nis nenebaget emin nenelaluk modok wolomogoluk waragarik e, pobuk wema ai, nenebe waromulmu wema de a? Nenelaluk oruakma wema ya. Op nak o. At ebe wemarik, emin nenelaluk modok wolomul ai o.

¹¹Ai en, his yogodak ya togu legep ʼgelaʼgeat, his-his henesaʼgo wat-wat togulat, henede ago wat-wat togulat, togu lomup o.

¹²Narilak norokhwi. Honuelak tenhentarok oruak ai, nonue ʼgain Onuk Logo aʼge en edikhenebesimu welat, his henebaget enannisogo togulat, henesaʼgo worogulat, togwi ai en e, isat eneragam welat, hau doʼgoksogo waronobogu lomup o.

¹³Is asogo togwi ai en, honogola en e, “Nonuelak ʼgain isat welemak o,” oluk opogulat, enebe henedesogo wolomup. Asogo welat e, his-his henebabut lioksogo togu lomup o.

¹⁴Narilak norokhwi. His en e, is logon yabuk sorli welat onoʼborl ʼboktak aʼge ai enesaʼgo worogulat, onogorlok wiak aʼge ai onogorlok erlagap pogulat, enanni erlak aʼge ai lerontogulat, asogo togulat aphwami ʼberlek enebaget e, heniak yamuksogo moʼgulontogu lomup o.

¹⁵Aphwami en his logon wiagaphonobogwiam e, oʼgo-oʼgo wiagabonobo erlakma en welat, his-his henebaget emin, aphwami ʼberlek enebaget emin, enebabut opsogo togwi ai aʼgeat logo pogu lomup o.

¹⁶Honogola henagai hogwi modok wolomup.

¹⁷Seʼban hwedik modok ogwi wolomup o.

¹⁸Allah en e, “His Kristus Yesus emin hwedik welat, di aʼge yu aʼge ʼberlegat paget an hau watnobogulom o,” oluk epasu ai en e, asogoat togu lomup o.

¹⁹Allah Arogun iak sebelogo pogulat,

²⁰Allah iak at Arogun en enede ʼgagalogo moʼgulentasu aʼge ai, honogola en mi-miarak pogulat, togu lorogup no yo.

²¹Di aʼge yu aʼge wouwogoluk e, “Yu op, ai wiak,” oluk henede en walholuk, op aʼge holuk e, heneʼgik ʼbetesogo tenak welat,

²²wiak aʼge di wiak yu wiak aʼge holuk, ʼberlek tu erlakma enat wolomup o.

²³Asogo oruakma, at Allah nenede haʼbugapnenebiso aʼge ano en, henebe ebesik uʼgwarek ebaget poluk welemak o. Oruakma, nonue ʼgain Onuk Logo aʼge ebe wagoam, henede emin, henebe emin, henebabut emin, wene henebam po modok erlakma en, degelak oruakma wemagoluk, at enat ʼgwelakhentarok welemak o.

²⁴At nenaik ʼgain Onuk Logo aʼge Allah yoʼgo nenebesi aʼge ano en, “Disogo takhenebaik o,” oluk obok moʼgulnentasu aʼge hegitsogo nak tiso ano en tenhentarok welemarik, demat takhonobouwayat o.

²⁵Narilak norokhwi. Nis nenebaget seʼban ogu lomup o.

²⁶His en e, “Paulus lak en hau asogo wathenebigisa o,” oluk, Allah eiyagai welat enebabut togwi ʼgelaʼgeat, henarilak honorokhwi Allah eiyagai aʼge logon ʼberlegat hau henemde motok opsogo warenebil lu o.

²⁷Wene pelal wokho perakpou wege aʼge ai, henarilak honorokhwi Allah eiyagai aʼge logon ʼberlegat enilem onuk moʼgulogup en nonue ʼgain Onuk Logo aʼge onuk ʼbalogo moʼgulhentegis ai o.

²⁸Nonue ʼgain Onuk Logo aʼge Yesus Kristus ebabut op ano en opsogo tenhentarok welemak o.