Read Silimo 2 Tesalonika 1 Bible Online

2 Tesalonika 1 - Silimo bible

2 Tesalonika 1

¹His Allah eiyagai o Tesalonika odoktogulat, nenaik Allah emin, nonue ʼgain Onuk Logo aʼge Yesus Kristus emin, henemin hwedik welegep aʼge, narilak norokhwi o. An Paulus, Silas Timotius eʼbirek enemin en wene yu pelal wokho heneʼbek perakpou wege ai o.

²Nenaik Allah, nonue ʼgain Onuk Logo aʼge Yesus Kristus eʼbirek enebabut op ano en, op aʼge wokhontogulat, henede haʼbugaphonobogulat, togu lemak o.

³Narilak norokhwi o. His henede Kristus ebam heʼberik welegep aʼge ai, ado emin loksogoat heʼberik pogulat, his-his henebe loʼbok nede-hedesogo togu legep aʼge ai, logon emin loksogoat henedeabonobogulat, togu legep ai en, nis en his henebaget Allah erliktu aʼgeat erliktogwi modok welege o.

⁴Aphwami en di obotut yu obotut takhonobogukhweat de, henepe mosogo welat, henede Kristus ebam asogoat heʼberik welegep ai en e, nis en Allah eiyagai o di owi yu owi odoktogwi aʼge honobok moʼgulontogulat nenalong aga lege o.

⁵Allah en aphwami wene enebam pasulat, noʼgorliselat, hegitsogoat pasu oluk enagat ema o. His yogodak Allah eragam ʼgwigeptik iak hologo welegep aʼge ai paget, aphwami en di obotut yu obotut takhonobogukhwe asogo welegep ai en e, at en pobuk e, “His an neragam ʼgoguptik honowirak modogat wolomup o,” oluk, moʼgulhontouwa ai o.

⁶Nonue ʼgain Onuk Logo aʼge Yesus osi malaikat yoʼgo noʼgwi aʼge enemin ʼbogorl pam en enannisogo selakmayat odouk magale ogola ʼbu agaiam e, Allah en wene aphwami enebam hegitsogo pasulat, is en di obotut yu obotut takhonobogwi aʼge, oʼgo hegitsogoat wiagabenebiselat, ye, his di obotut yu obotut hogu legep aʼge ai, nis neneminat nonogola obapnenebiselat, tua o. Asogo tagalat e, is aphwami Allah ebe enaluk om enebit welat, nonue ʼgain Onuk Logo aʼge Yesus tegei wene op wene ano wo erlakma en ukpogwi aʼge ai wene enebam pouwa o.

⁹Is asogo wene enebam poluk e, nonue ʼgain Onuk Logo aʼge anni aʼbik en erliktogwi modok welagaimu ilem eba enat wiakma eba modogat welemagoluk peragonobouwa o.

¹⁰At wema ai erlige ebe wagoam e, uʼgwarek eiyagai enede at ebam heʼberik poluk welagai aʼge en, at ebe erliktogulat, hau doʼgoksogo worogulat, tuagoluk wema ai o. Ye, nis en wene ai nenaluk aʼge ʼbaksogo moʼgulhentau wegema re, his en, “Demat o,” oluk wegep ai en, his henemin enat, at erliktogup o.

¹¹At Allah en e, “His asogo togu lomup o,” oluk, yoʼgo henebesi ʼgelaʼgeat hegitsogo togu lorogup en, nis en his henebaget seʼban ogwi modok welege o. His honogola en e, “Nis op togullo e,” oluk, opogu legep aʼge ai, Allah en asogo takhenebasulat, ye, henede at ebam heʼberik poluk welat togu legep aʼge ai, at enat henede hurleaphenebasulat, at anni ai pam takhenebasu lemak o.

¹²Nenaik Allah, nonue ʼgain Onuk Logo aʼge Yesus Kristus eʼbirek enebabut op ano en takhenebasuam asogo togu lorogup ai en, his en e, nonue ʼgain Onuk Logo aʼge Yesus onuk ʼbalogo logo pogulat, at en e, his ogo logo henebasulat, tua ai o.