Read Silimo 2 Tesalonika 3 Bible Online

2 Tesalonika 3 - Silimo bible

2 Tesalonika 3

¹Narilak norokhwi. Wene ologun pam mesik yu moʼgulhentaik. Nonue ʼgain Onuk Logo aʼge iak perleneat wiyalagarik his oruakma eba wagama obat wegep ʼgelaʼge, asogoat wiyaletil lasumu is logon en opsogo wouwagoluk, nis nenebaget seʼban ogu lomup o.

²Is aphwami ʼberlek en, “Wene ai demat,” oluk wegesarik nak oruak puk. We, is logon wo erlak aʼge enebabut dagan togulat, wiak togulat, togwi aʼge en, wiagapnonobuogoluk togumu, Allah en delnenebise lemagoluk e, nis nenebaget seʼban ogu lomubat o.

³Aʼge re, nenede nonue ʼgain Onuk Logo aʼge ebam heʼberik pogwiam e, neniak hologo tiso aʼge ai en henede hurleaphenebiselat, at ebabut modok wiak aʼge ai en wiagaphenebiogoluk tagoam tenhentarok welema ai en, henede at ebam heʼberik poluk wolomup o.

⁴Tenhentarok oruakma, nis nonogola en e, “Is en e, nis en is enesaʼgo worogu lege aʼge ano, yogodak hegitsogo togulat, pobuk asogoat togulat, togu lema o,” oluk nonue ʼgain Onuk Logo aʼge emin hwedik welat demat opogu lege o.

⁵His henede en e, “Nenebe Allah ede o,” oluk pobi togulat, henebabut Kristus epe mosogo welat taga laga ʼgelaʼge, ebabut wogulat, loksogo togu lorogup en, nonue ʼgain Onuk Logo aʼge ebe henedemu welat, henede ʼgagalise lemak o.

⁶Narilak norokhwi. His henarilak honorokhwi logon Allah eiyagai aʼgeat de, wene nis en henesaʼgo werige aʼge ano hologo tu erlakma en ukpoluk, eneʼgik wogwi erlak sorli noʼgwi aʼge ai, emin hwedik wolorogup no yo.

⁷Nis e, his henemin welat neneʼgik en tenhogwi erlakma en sorli noʼgu lege erlak ano re, his en nis nenebabut wokho tu aʼge henalugat o.

⁸Nis en e, soʼboru his heneʼbek logon oʼgo ʼbalu erlakma en weat noʼgu lege erlagat o. We, his logon henebam seget wiak hogu lorogupno oluk e, nis hup erlige en modok set hoporak nonuʼgwarek enat nenannisogo takpoluk oʼgo ʼbalogo noʼgu lege ai o.

⁹Nis en e, his henebam ʼgonu moʼgulhonto elirat aʼgeat de, his nis nenebabut wagup en, ʼgonu u erlakma nonuʼgwarek en asogo togu lege ani o.

¹⁰Nis naduk henemin welat moʼgulhontogulat e, “His logon yabuk wo erlakma en enebabut sorli aʼge ai, soʼboru no erlakma en weat welemak o,” oluk, moʼgulhontogu legeat ani o.

¹¹Wene asogo moʼgulhentige aʼgeat de, is logon en e, “Aphwami is aʼge logon onuʼgwarek eniabugat de, horlogwi erlak welat, is mu aʼge onowene de, daloʼbok il denagai o,” oluk moʼgulnentigisema nenesaʼgo hweligerik en moʼgulhentige ai o.

¹²Nis en e, aphwami his aʼge enebabut asogo togwi aʼge ai, enil haʼbuksogo welat, onuʼgwarek eneʼgik enat yabuk wokho onsoʼboruat noʼgu lemagoluk, nonue ʼgain Onuk Logo aʼge Yesus Kristus emin hwedik welat, at en oso aʼge is aphwami enede ʼgagalogo enesaʼgo werige ai o.

¹³Narilak norokhwi. Op aʼge togulat, henebit erlaksogoat til laga lomup o.

¹⁴Wene pelal wokho heneʼbek perakpou wege aʼge ai, is logon enesaʼgo hologo tu enebit aʼge ai, eneʼgerli emagoluk is enebabut asogo togwi aʼge ai pobirak poluk, enemin hwediktak poluk wolorogup o.

¹⁵Asogo aʼgeat de, enemin il ʼbelak ʼgelaʼge togu lorogup o. We, “Nenarilak nonorokhwi Allah eiyagai aʼgeat o,” oluk, opsogo enesaʼgo worogu lomup o.

¹⁶Nonue ʼgain Onuk Logo aʼge nenede haʼbugapnenebiso aʼge ano uʼgwarek en di paget yu paget henede haʼbugaphenebiso modok welat e, henebe ʼberlegat tenhentarok welemak o.

¹⁷An en wene ʼberlegat pelal wasulat e, “At Paulus en ʼbalegeimu hegi o,” oluk, enak aʼge pobi tuagoluk, wene ologun wusogo hau wathenebiselat e, nuʼgwarek neʼgik enat ʼbaliso ano ʼgelaʼge, yogodak yu hau wathenebiselat ʼbalegis aʼge neʼgik enagat ai o.

¹⁸Nonue ʼgain Onuk Logo aʼge Yesus Kristus ebabut op ano en, his ʼberlegat opsogo tenhentarok welemak o.