Read Silimo 1 Timotius 1 Bible Online

1 Timotius 1 - Silimo bible

1 Timotius 1

¹Timotius nomlogo yo. Hede Kristus ebam heʼberik pegen ai en, an nomlogo demat egentikmu re, wene yu an Paulus en pelal wokho heʼbek perakpou wegi ai o. At Allah delnenebiso aʼge emin, Kristus Yesus en obapnonobua oluk nenede opogu lege aʼge ano emin, eʼbirek enat yoʼgo noboluk, at Kristus Yesus ebaget taga lemagoluk peraknobou wegesema wegi ai o. Nenaik Allah emin, nonue ʼgain Onuk Logo aʼge Kristus Yesus emin, eʼbirek enebabut op ano en, op aʼge wokhogulat, enedeaphobogulat, hede haʼbugaphobogulat, togu lemak o.

³An o Efesus en o Makedonia yema weriogoluk e, hat hede ʼgagalogo wene disogo oluk moʼgulhegis ani o, “Hat hebe o yema wolomup o. Welat e, is mu aʼge en e, wene demat aʼge puk. We, mu aʼge moʼgulhontogwi aʼge ai u erlakma en mo uagoluk enesaʼgo werise lomup o.

⁴Is ai en e, nonung eniak eseiyat dedilogulat, Nenebe asogo dagetil wege, oluk weneʼgomane edipmu en dakho erlakma en ʼbeleʼgil modok wagalat, ogwi aʼge ai pam enede eberak modok welemano oluk, u erlakma en ukpouwagoluk enesaʼgo weribat o,” oluk moʼgulhegis ani o. Wene ai aʼge ogwiam, dem wene nenede Allah pam heʼberik poluk oruakma, at en obapnonobua ai aʼge lok ago erlak o. We, ologun pam eniak loksogo sagalogwi ai o.

⁵Enede Allah en hoenebisoam e, onuʼgwarek onogola en e, “Wene an nebam erlak, nogola selak welegi,” oluk opogulat, enede demat Allah pam heʼberik poluk welagai ai en, aphwami enedesogo welagai o. Holuk e, is asogoat welemagoluk enesaʼgo werise lomup o, oluk moʼgulhegis ai o.

⁶Aʼge re, is logon en enebabut op togwi ai aʼge togulomtik e, ukpoluk ʼgwi-ʼgwani ʼburlat erlak om aʼge ai paget ogulat e, onuʼgwarek enat nal agai ai o.

⁷Is ai en e, “Wene Allah en nenesaʼgo weregei wene ano, nis en moʼgulontogu lomul,” oluk enagai en moʼgulontogularat de, wene ebe pobirak erlakma en, eneperlak welat e, “Wene ebe disogo yo. Demat pobisogo moʼgulentige o,” oluk ogwi aʼgeat de, pobirak erlak welat ogwi ai o.

⁸Wene Allah en nenesaʼgo weregei wene ai, nis en pobirak poluk, tu hegitsogo togu lomul holuk e, op o, oluk, nenalugat o.

⁹Demat aʼge re, wene Allah en nenesaʼgo weregei wene ai, aphwami hegitsogo togwi aʼge paget egei puk. We, aphwami enesaʼgo werak erlak holu puk togwi aʼge ai emin, Allah enebit welat wiak togwi aʼge ai emin, enebe Allah paget po erlakma en Allah iak sagalogo togwi aʼge emin, enialak enaiklak enebe modok waronobogwi aʼge emin, aphwami logon yogunat enebe ʼbeʼgi waronobogwi aʼge emin,

¹⁰ap en hwami yogunat tenontogulat, ap-ap yogunat tenontogulat, togwi aʼge emin, aphwami logon eneiyagai aʼge yogot hisagonobogwi aʼge emin, eniak esei ogwi aʼge emin, “Wene demat ik,” oluk Allah onuk hoʼbuk ʼbil-ʼbalat de, lalonobogwi aʼge emin, is ʼberlegat asogo togwi aʼge paget egei o. Ye, is logon enebabut dem wene obabenebiso aʼge ai sagalogo ukpoluk dagan togwi aʼge an u erlak aʼge logon ʼberlegat emin paget egei.

¹¹Ye, wene ai hegitsogo, op wene ano an en moʼgulentil nese lemagoluk nebam pesi o. Op wene ai re, Allah erliktogulat, hau worogulat, togu lege aʼge ano iagat o.

¹²An naduk e, Yesus obok wiak ʼbaliselat, ebe nogola mi-miarak poluk Allah eiyagai aʼge di obotut yu obotut tagenebasulat, taga legi aʼgeat de, nonue ʼgain Onuk Logo aʼge Kristus Yesus en edeapnebegeitik, “Hat en pobuk an nebaget hebabut heʼbisogo taga lorogun o,” oluk, wene yu an nebam poluk yoʼgo nebasulat, anni wokneselat, tegei ai o. Asogo wiak taga legi eria hegit e, an nede nonue ʼgain Onuk Logo aʼge Kristus Yesus ebam heʼberik po erlak welat, asogo tu puk aʼgeat de, neperlak en taga legi ai re, at en nebe edeapnebesi ai en, hau werise legi o.

¹⁴Ai re, at nonue ʼgain Onuk Logo aʼge Kristus Yesus ebabut op en loksogo edeapnebesirik, nebabut e, at emin hwedik welat togwi ʼgelaʼgeat, nede at ebam heʼberik pasulat, aphwami logon nedeabenebasulat, loksogoat taga lemagoluk, nebe woknebegei ai o.

¹⁵Aphwami wiak togwi oruakma Kristus Yesus en nenebe delnenebigoluk ʼgwiangma yema ʼbu aga o, oluk egi ai, aphwami en e, “Wene ai demat o,” oluk dokhumsogo wo aʼgeat o. Aphwami logon wiak weiyat ʼgelaʼge togwi aʼgeat de, an nak e, wiak lok modogat taga legi ai o.

¹⁶Aʼge re, is aphwami logon pobuk enede Yesus ebam heʼberik pogwiam e, enelaluk modok welemagoluk, tagonobouwa aʼge onogola en opogulat e, “Paulus wiak tagokhweat de, Kristus Yesus ede ʼbugom erlakma en, epe mosogo modok welagarik en, edeap poluk ebe wesi ai re, at en aphwami wiak togwi aʼge asogo wogenebisoma hegi o,” oluk, Allah ebabut enak aʼge pobi tuagoluk, an naduk asogo woknebegei ai o.

¹⁷Nenaik ʼgain Onuk Logo aʼge Allah ai emategat o. At ebe nenil hogu lege erlak. Allah otok modok welago aʼge aiat o, oluk, erliktogulat, hau worogulat, togwi modok wolomok o, oluk, “Amin,” egi ai.

¹⁸Timotius nomlogo yo. An wene yu hesaʼgo wusogo moʼgulheik. Is logon en wene nadugat hat huʼgwarek paget ogulat e, “At disogo taga lema o,” oluk, egesa hegitsogo, op wene yu paget, weim enannisogo obogwi ʼgelaʼge, hannisogo moʼgulentasu lomup o.

¹⁹Is logon en, “Wene ai demat o,” oluk wogulat, onogola selak wolom aʼgeat de, pobuk wiak togwi ai en, ik so ik olomu moluk-melaksogo ʼbiso ʼgelaʼge, ʼbigisa ai o. Hat ai ʼgelaʼge tu erlakma en welat hogola en, “An wiak mesik tu erlak welat, nogola selak welegi o,” oluk hede Allah pam heʼberik poluk hannisogo taga lomup.

²⁰Is wiak asogo togwi ai, enebe logon e, Himeneus Aleksander eʼbirek en Allah obok wiak ʼbalogu legesema, pobuk enebabut heʼberlemarik wiak tu erlakma en mo uagoluk enebe Iblis wogegismu oruak ai o.